‘Pesëshja’ problematike e integrimit të Kosovës në BE

‘Pesëshja’ problematike e integrimit të Kosovës në BE






Fatbardhë Zeka, Bota Sot
Pengesat diplomatike

Edhe pse Kosova është njohur nga shumë vende të BE-së, dhe nga shtetet të tjera të rëndësishme në botë, madje tani ka njohje nga 62 shtete, një gjë të tillë nuk janë duke e bërë edhe pesë shtetet tjera të Bashkimit Evropian e njëherësh anëtare të OKB-së. Spanja, Rumania, Sllovakia, Greqia dhe Qipro ende nuk kanë lidhë marrëdhënie diplomatike me Kosovën dhe nuk e kanë bërë asnjë hap për të njohur pavarësinë e saj. Ndërkohë diplomacia e Kosovës njohjet nga pesëshja e BE-së i vlerëson si njohje të një interesi strategjik për Republikën e Kosovës në procesin e integrimit të saj evropian e verioatlantik.
Njohjet vazhdojnë, “pesëshja” pengesë!
Problemin e pakapërcyeshëm të këtyre pesë vendeve e kanë të njohur edhe zyrtarët e lartë të Ministrisë së Punëve të Jashtme. Ata mendojnë se mos njohja nga pesë vendet e Bashkimit Evropian janë vërtetë pengesë për integrimin e Kosovës në BE.
“Kosova aktualisht nuk mund të bëhet pjesë e Bashkimit Evropian pasi ende nuk e kanë njohur pesë shtetet e BE-së, do të thotë që ajo dihet se janë pengesë për integrim” thotë Albana Beqiri, zëdhënëse e MPJ-së. Mirëpo, sipas saj, njohjet nuk kanë ngecur, pasi që numri i njohjeve tani më është 62 shtete, dhe procesi i pavarësisë së Kosovës tashmë është i pa kthyeshëm.
“Nuk mund të themi se njohjet janë duke u vonuar pasi që Kosova aktualisht është e njohur nga 62 shtete, dhe ka hyrë tashmë në procesin e pa kthyeshëm të njohjeve dhe të pavarësisë së saj, sepse pavarësia është një proces i pa kthyeshëm dhe Kosova është një aktualitet i ri gjeopolitik edhe njohjet po vazhdojnë, prandaj nuk mund të pajtohemi me atë se njohjet kanë ngecur pasi që procesi i njohjeve është proces politik i cili nuk varet shumë nga dëshira e palës kosovare se sa që varet nga vendimi që merr secili shtet veç e veç karshi pavarësisë së Kosovës” thotë zëdhënësja Beqiri. Ajo theksoi se Ministria e Punëve të Jashtme nuk bënë dallime me rajone që të lobojë për njohjen e pavarësisë së Kosovës, ajo lobon në të gjitha vendet që nuk e kanë njohur Kosovën, për të është shumë e rëndësishme secila njohje nga cilido shtet që të vij. “Procesi i njohjeve është një proces tërësisht politik që nuk varet nga dëshira e Kosovës. Ssecili shtete e ka në agjendën e tij punën e njohjeve të Kosovës. Këtyre shteteve vazhdimisht iu rikujtohet kjo përmes lobomit, përmes kanaleve të ndryshme diplomatike të cilat shfrytëzohen për lobim. Prandaj ne jemi në pritje të njohjeve nga vendet e BE-së për t’u kapërcyer vërtet ky hendek” theksoi ajo.