Edhe 1887 persona janë të pagjetur

Edhe 1887 persona janë të pagjetur

Rreth 1900 njerëz mbeten të zhdukur, kritikohen institucionet.-Manaj: Nuk mund të bëjmë më shumë.- 'Thirrjet e Nënave' nga Gjakova nga dita e nesërme në grevë në Prishtinë



Kosova kërkon edhe 1887 persona të pagjetur për fatin e të cilëve edhe dhjetë vjet pas luftës nuk dihet asgjë. Kështu u tha sot me rastin e shënimit të ditës ndërkombëtare të të pagjeturve në të cilën ditë u organizuan disa aktivitete. Për familjarët e të pagjeturve adresa e kritikave mbteten institucionet e Kosovës, të cilat sipas tyre nuk po bëjnë krejt atë që duhet për zbardhjen e fatit të të pagjeturve. Përfaqësuesit e institucioneve nga ana tjetër deklarohen se nuk mundë të bëjnë më shumë. Në mesin e 1887 personave të pagjetur të cilët i mungojnë Kosovës është edhe Afrim Haziri nga komuna e Skënderajt. Nëna e tij Azize Haziri e cila kishte ardhur nga Skënderaj për të marrë pjesë në shënimin e ditës së të pagjeturve kujton kohën kur u nda nga biri i saj atë kohë 22 vjeçar. Ajo kritikon institucionet e Kosovës për neglizhencë në zbardhjen e fatit të djalit të saj dhe të gjithë të pagjeturve të Kosovës. 30 gushti -Dita Ndërkombëtare e të Pagjeturve u shënua edhe në Kosovë me disa aktivitete ku u kërkua ndriçimi i fatit të të pagjeturve. Me këtë rast aktivistët e nismës së të rinjëve për të drejtat e njeriut dhe rrjeti i aktivistëve nisma ime, në rrethojat e ndërtesës së Qeverisë së Kosovës vendosën 1887 pikëpyetje në fletë të bardhë, numër ky që përkon me atë të personave të pagjetur. Qeveria dhe institucionet e Kosovës duhet të jenë më vigjilente dhe t'i përmbahen premtitmit për zbardhjen e fatit të të pagjeturve,tha Haki Kasumi nga Asociacioni i Familjeve të të Zhdukurve të Kosovës. Zëvendëskryeministri i Kosovës Ramë Manaj, ndërkaq vlerëson se qeveria dhe institucionet përkatëse kanë bërë përpjekje maksimale për zbardhjen e fatit të të pagjeturve, por sipas tij problem kyç mbetet bashkëpunimi me Beogradin. "Jo vetëm familjarët por edhe institucionet dhe të gjithë njerëzit në Kosovë mbeten të pakënaqur deri në ndriqimin e fatit të njeriut të fundit. Janë edhe afër 1900 persona për fatin e të cilëve nuk dihet asgje. Ju them me përgjegjësi të plotë se qeveria dhe institucionet tjera në Kosovë po bëjnë përpjekje maksimale për të zvogluar numrin e të pagjeturve. Janë bërë përpjekje maksimale në vazhdimësi janë zhvilluar takime, janë formuar komisione qeveritare etj,por problemi kyq mbetet bashkëpunimi me Beogradin dhe politika aktuale e Beogradit nuk premton shprese sepse e trajton këtë problem si politik, përderisa ne dhe krejt vendet e botes e trajtojnë si problem humanitar", ka thënë zëvendëskryemnistri i Kosovës Ramë Manaj. Ndryshe, që nga dhjetori i vitit 2008, janë kryer 88 operacione në terren dhe 45 zhvarrime, janë marrë 405 mostra të eshtrave për analizë të ADN-së, janë zhvarrosur 66 individë, janë kryer 61 vizita në familje dhe familjeve u janë dorëzuar 61 mbetje mortore. Dje, Nysrete Kumnova, kryetare e OJQ "Thirrjet e Nënave" nga Gjakova ka deklaruar për opinion se që nga dita e hënë do të hyjnë në grevë në Prishtinë, sipas saj "derisa të ndriqohet rasti i mbetjeve mortore në morgun e Prishtinës.