Dje ishte kongresi i disfatës së Edi Ramës

Dje ishte kongresi i disfatës së Edi Ramës





Deputeti i Partisë Demokratike, Ferdinand Xhaferri, deklaroi vetëm një ditë pas Kongresit të Jashtëzakonshëm të Partisë Socialiste, se “ky kongres u karakterizua nga censura, e cila është standardi i vetëm i PS-së".
Zoti Xhaferri u shpreh nëpërmjet një konferencë për shtyp, se "Kongresi nuk kishte asnjë alternativë, votimi i fshehtë nuk ekzistonte dhe demokracia e brendshme përfaqësohej nga Kryetari i Asamblesë Kombëtare të PS-së, Gramoz Ruçi". "Dje u mbajt Kongresi i disfatës elektorale të Edi Ramës. Dje pamë se si Edi Rama dhe mercenarët e tij kërcënuan kundërshtarët politikë dhe gazetarët", tha Xhaferri. I pyetur se kur do të mblidhet Kongresi i Partisë Demokratike, z. Xhaferri u përgjigj me humor se kjo forcë politike është ende në festë dhe nuk ka nevojë për Kongres".

LSI: Rama kundër të gjithëve me një gjuhë staliniste






Lëvizja Socialiste për Integrim reagon pas akuzave të Edi Ramës, duke e quajtur fjalimin e tij në Kongresin e Jashtëzakonshëm të PS-së që u zhvillua dje, si gjuhë staliniste kundër të gjithëve, dhe veçanërisht kundër LSI-së.
Zëdhënësi i kësaj force, Ralf Gjoni, deklaroi se LSI do të punojë fort për të përfaqësuar votën e saj në pushtet, si dhe votën e të gjithë socialistëve që nuk mund t’i përfaqësojë më Edi Rama. “Degradimi i lidershipit te PS-së dhe gjuha staliniste e Edi Ramës dje kundër të gjithëve, dhe në mënyrë të veçantë kundër LSI-së, na forcon bindjen në drejtësinë e vendimit tonë për këtë koalicion të rëndësishëm dhe historik me PD-në për të garantuar stabilitetin e qeverisjes së vendit dhe suksesin e reformave që bashkojnë Shqipërinë me Evropën”, thekson zëdhënësi Gjoni në një deklaratë për shtyp.
Pyetjes nga gazetarët rreth bashkëpunimit të kërkuar prej Ramës me 5 anëtarët e LSI (Xhufi, Klosi, Brokaj, Legisi e Muci), Gjoni iu përgjigjet se, “LSI ka struktura zyrtare, ka një kryesi, ka një kryetar i cili është mandatuar nga shumica dërrmuese e konventës së jashtëzakonshme për të negociuar me PD-në, për bashkëqeverisje gjatë 4 viteve të ardhshëm dhe për të garantuar suksesin e reformave që do çojnë Shqipërinë më afër Evropës”. Pyetjes se Rama të paktën po kërkon bashkëpunim, Gjoni i përgjigjet se, “pas krimit elektoral të orkestruar prej tij dhe strukturave kriminale nën diktatin e tij, tashmë është tepër vonë për Edi Ramën të kërkojë bashkëpunim me LSI-në. Ai kërkon të shkatërrojë dhe të krijojë kaos, ndërsa ne do të veprojmë në shërbim të interesave të gjera të qytetarëve shqiptarë”.