Presidenti uron fillimin e vitit të ri shkollor

Presidenti uron fillimin e vitit të ri shkollor


Nga Express

Një ditë pasi Ministria e Arsimit ka njoftuar se mësimi do të fillojë më një shtator, Presidenti i Republikës së Kosovës, Fatmir Sejdiu, ka uruar nxënësit dhe mësimdhënësit e vendit.





“Nesër është 1 shtatori, dita kur nis viti i ri shkollor. Rreth 500 mijë nxënës të shkollave fillore dhe të mesme në mbarë vendin, do t’u rikthehen bankave shkollore për ta vazhduar betejën e madhe për thellimin dhe nxënien e njohurive të reja”, thuhet në urimin e Presidentit dërguar medieve.

Presidenti ka uruar edhe nxënësit që për herë të parë do të ulen në bankat shkollore, duke iu uruar suksese në botën e madhe të dijes.
“I përgëzoj ata në mënyrë të veçantë, duke iu dëshiruar hyrje të suksesshme në botën e madhe të dijes, të cilën po e nisin sot”, thuhet më tej në urim.

Sivjet për herë të parë në bankat shkollore pritet të ulën më shumë se 36 mijë nxënës.

Në urimin e Presidentit thuhet se gjatë viteve më të rënda të historisë së Kosovë, në dekadën e fundit të shekullit XX, mësuesit, arsimtarët, nxënësit dhe prindërit e tyre e mbajtën me vullnet, me vetëdije dhe me atdhedashuri të pashoqe shkollën shqipe.

“Ata meritojnë dhe do ta kenë përherë mirënjohjen tonë për sakrificat e shumta, të cilat mundësuan që shkolla jonë të mbijetojë”, thekson në urimin e tij presidenti Sejdiu.

Edhe Ministria e Arsimit dhe drejtoritë komunale të arsimit kanë bërë përgatitjet teknike që mësimi të fillojë më një shtatorë, njësoj sikur ka filluar edhe vitet e tjera.

“MASHT , ka bërë të gjitha përgatitjet për fillim të vitit të ri shkollor, prandaj porosit nxënësit dhe mësimdhënësit që me një shtator të jenë në bankat shkollore dhe të fillojnë mësimin sipas orarit të përcaktuar në kalendarin për vitin shkollor 2009-2010”, thuhet në njoftimin e Ministrisë së Arsimit.