Luan Xhuli:Cikël poetik

nga **Agim Gashi** Sun Sep 13, 2009 11:34 pm

AJO SHËNJË...

Ajo shënjë nën gushë

si djegje dielli,

ishin buzët e mia

të nxehura prej teje...

Ajo shënjë nën gushë

si një vulë hëne,

ishin ledhatimet e mia

dërguar prej erës...

Ajo shënjë nën gushë

si re e shkarkuar,

ishte fryma ime

rrëmbyer prej ajrit...

Ajo shënjë nën gushë

si gjethe e pjekur,

ishte stina ime

me ditët e tua...

Atë shënjë nën gushë

se fshehëm prej turpit,

ishte dielli ynë

që kish ndaluar të çlodhej...!

mars 09

Gjërat e vjetra

Të vjetrat,

si hedh.

Kam një muze të vogël,

koleksion

të miqve dhe dashurive,

që i rikthehem...

Këpucët p.sh

i vesh gjithnjë,

gishtat më dhëmbin nga ngushtimi

e fyti ngushtohet prej nostalgjisë së herëshme...

I rruaj,

me aromën e vertetë që kishin,

me djersën në udhëtimet e gjata

e te vështira të njohjes..

Rrobat,

kundërmojnë naftalinë...

Me numur shumë herë më të vogël

nga sa i kam sot,

mbeten adoleshente ëndrash

që i kanë zili dashuritë...

Gjithnjë rrëfehemi tek njeri- tjetri

për ç’ka smundëm

dhe që mbeti e vetmuar ,

në trotuarë mendimesh...

Sot,

një palë këpucë të vjetra më kërkojnë..,

Mbetur në sepetet e harresës

diçka duan të thonë...

I vesha,

duke ndjerë labirinthet e gabimeve,

ku dhe ato,

kaq kohë,

ishin kthyer në memecë të heshtjes...

POEZI E BOTUAR

Në restelat e një arke ngarkimi,

si rrobat e vjetra të një hamalli,

dikush

kishte lexuar dy vargje....

Ishin të miat.

Muza,

kishte harruar të më jepte letër...

Vetëm dy vargje,

shkurt,

si telegram i derguar nënës,

kur bëhej merak që s’dërgoja letra...

“Të dua e të puth me mall”

Mbi një arkë të heshtur,

botimi im i parë,

Pa redaktor dhe shtëpi botuese

pa kopertinë dhe indeks përmbajtjeje...

Vetëm dy vargje

me mall nëne

dhe dashurie...

“I rëndë shpirti që s’flet

Ju lutem

mos më vidhni shpresën...”

Ato vargje shkruar me ngut

mbi arkën boshe,

Motra të kujtesës dhe të ashpërsisë,

rreshtohen çuditërisht

si libri më i mirë,

në biografinë e dikurshme të një hamalli-poet !

Mars 2009

U MËRZITA

U mërzita

me të mërziturit ,

njëlloj si mizat

me zhuzhatjen e tyre.

Dua të ndroj botë

ose të ndroje ajo...!

(ngadalë se mos na dëgjojnë...)

Ti thurr poezi

për ata që sjetuan

me vargjet

vjedhur nga të gjallët.

U mërzita

me këtë çati mbi supe,

me mure hiçi dhe shqetësimi..

Do ti pushkatoj...

dhe ëndrat

dhe vehten,

duke u bërë sorë e mërzitëshme...!!

mars 09

ZGJEDHIM I RI I FOLJES “JAM”

Une jam (Ai qe kam qene )

Ti je (Ai qe s’ishe dje )

Ai eshte (e nesermja s’dihet..)

Ne jemi (as mish ,as peshk..)

Ju jeni (Kur u bete te pasur....! )

Ata (ato) jane (perseri ne pushtet...?)

Ah, kohe

e pa kohe,

qe s’na mesove

zgjedhimin.....

SI TË BISEDOJA ME TY

L.L.

Mbetemi

që të dy derivatë të vdekjes .

Jeta,

sistem me tre të pa njohura ,

na ngatëron hapat dhe ekuilibrin..

Dashuria,

Ecja

dhe të tretët

që ndërtojnë ferrin –peshtymë...

E para,

ka qepalla drite

dhe e dyta,

kangjella që s’ja sheh lehtë fytyrën...

Të tretët,

bashkudhetarë joshës me dyshimin...

Ushtrim i vështirë

që thëret Lindjen...

Dhe unë ,

dhe ti,

besojmë...

mars 09

Mon	Tue	Wed	Thu	Fri	Sat	Sun
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31