Ministri Gashi porositi nxënësit si të mbrohen nga Gripi A H1N1

Ministri Gashi porositi nxënësit si të mbrohen nga Gripi A H1N1

Bota sot
Ministri i Shëndetësisë Alush Gashi, ka udhëzuar nxënësit dhe mësimdhënësit se si të sillen në situatat e mundshme me raste të shtuara të Gripit A H1N1, në prag të sezonit vjeshtor dimëror, kur pritet që fluksi i të prekurve nga gripi të rritet.




Ministri i Shëndetësisë i Republikës së Kosovës, Alush Gashi.
Ministri ka siguruar se vendi posedon doza të mjaftueshme të medikamentit Tamiflu, të cilin do ta përshkruajë ekskluzivisht infektologët, ndërkohë që do të blihet edhe numër i mjaftueshëm i vaksinave kundër Gripit A H1N1


Ministri i Shëndetësisë i Republikës së Kosovës, Alush Gashi, ka qëndruar të hënën në shkollën fillore “Ismail Qemali” të Prishtinës, ku mësimdhënësve dhe nxënësve të kësaj shkolle, u ka përcjellë disa porosi se si të sillen ata në situatat e mundshme me raste të shtuara të Gripit A H1N1, në prag të sezonit vjeshtor-dimëror, kur pritet që fluksi i të prekurve nga gripi të rritet. Ministri Gashi, kërkoi nga mësimdhënësit që të bashkëpunojnë dhe të komunikojnë vazhdimisht me prindërit në mënyrë që të përcjellin gjendjen shëndetësore të fëmijëve, në rast të përhapjes së gripit A/H1N1. Gjatë kësaj vizite ministri Gashi tha se mësimdhënësit duhet të kenë komunikime të rregullta me prindërit, në mënyrë që të parandalohet përhapja e gjerë e virusit. Ai u ka sugjeruar prindërve që në rast së fëmija i tyre ndien shenja të dyshimta gripi, të ndalet në shtëpi, të njoftohet menjëherë mësimdhënësi dhe të kontaktohet mjeku që do ta caktojë terapinë. Sipas tij, kur pandemia e gripit A H1N1 është në shkallën e gjashtë dhe kur virusi është edhe brenda Kosovës, është esenciale që të ngrihet edhe më tej niveli i higjienës, të shtohet përkujdesja dhe mbi të gjitha të përcillen rekomandimet e institucioneve përgjegjëse. Ministri ka siguruar se vendi posedon doza të mjaftueshme të medikamentit Tamiflu, të cilin do ta përshkruajë ekskluzivisht infektologët, ndërkohë që do të blihet edhe numër i mjaftueshëm i vaksinave kundër Gripit A H1N1, derisa zëvendësdrejtoresha e Institutit Kombëtar të Shëndetësisë Publike, Selvete Krasniqi, ka thënë se përgatitjet për ballafaqim me gripin janë të mira dhe shumë shpejt, IKSHP do të startojë me analizën e mostrave për grip të derrit dhe grip të shpezëve në Kosovë.

Ministri Gashi, u ka premtuar mësimdhënësve dhe nxënësve se në agjendën e tij dhe të ministrit të Arsimit, Enver Hoxhaj, janë edhe disa tema të tjera, me interes për nxënësit dhe rininë e Kosovës, dhe të cilat do të zhvillohen në vazhdimësi.