Vendoset gurthemeli i shtatores së Fehmi Lladrovcit

Vendoset gurthemeli i shtatores së Fehmi Lladrovcit

Me rastin 11 vjetorit të rënies heroike të njërit prej komandantëve të parë të UÇK-së, Fehmi Lladrovci në sheshin e qytetit në Drenas është vënë gurthemeli i shtatores së dëshmorit Lladrovci, me ç’rast kryeministri Hashim Thaçi ka thënë se Fehmiu dhe bashkëshortja e tij Xheva do të jenë figura të krenarisë për të tashmen dhe të ardhmen e kombit shqiptar.




Kryeministri i Qeverisë së Republikës së Kosovës, Hashim Thaçi, i shoqëruar nga zëvendëskryeministri Hajredin Kuçi, sot ka ka bërë homazhe pranë varrezave të dëshmorëve të kombit Fehmi e Xhevë Lladrovci në fshatin Gllanasellë dhe më pas ka vënë gurthemelin e lapidarit të Fehmi Lladrovcit në sheshin e qytetit në Drenas.
Kryeministri Hashim Thaçi para mijëra qytetarëve në qendër të Drenasit tha se ky do të jetë monument i kujtesës për të kaluarën, i krenarisë për të sotmen dhe i marrjes së zotimeve për të ardhmen për të gjithë ne, për gjeneratat e reja.
"Sot është një ditë e shënuar për historinë e kombit shqiptar dhe për shtetin e Kosovës, është 11-vjetori i rënies heroike të komandantit të UÇK-së, Fehmi e Lladrovci dhe Xhevë Lladrovcit, një datë kjo që shënon kthesën historike në luftë për liri, pavarësi dhe për shtet sovran”, ka thënë kryeministrit Thaçi, duke shtuar se Fehmiu dhe Xheva gjithmonë kanë qenë burim frymëzimi për të gjithë bashkëluftëtarët, duke inspiruar bashkëluftëtarët, por edhe duke qenë në ballë të fushëbetejave.
“Jemi sot këtu të gjithë së bashku në sheshin Fehmi Lladrovci, në sheshin e lirisë, për të filluar ndërtimin e monumentit të Fehmiut. Një monument ky që do të jetë monument i kujtesës për të kaluarën, i krenarisë për të sotmen dhe i marrjes së zotimeve për të ardhmen për të gjithë ne", ka thënë z. Thaçi.
Më tutje kryeministri Thaçi pohoi se sot jemi këtu për të bërë nderimet më të larta shtetërore për luftën e UÇK-së, të gjithë atyre që sakrifikuan gjithçka për lirinë dhe shtetin e Kosovës. “Sot jam shumë i lumtur për të gjitha këto ndryshime edhe këtu në Drenas por edhe në gjithë Kosovën”, theksoi kryeministri Hashim Thaçi.