Presidenti Sejdiu kthehet nga SHBA-të me shumë premtime për njohje

Presidenti Sejdiu kthehet nga SHBA-të me shumë premtime për njohje

Shqipe Osmani, Bota Sot
Presidenti Sejdiu tha se ka marrë konfirmimin për njohjen e Kosovës nga Malavi, Katari, Tualo, dhe këto njohje do të bëhen shumë shpejt.



Sejdiu është takuar edhe me kryeministrin e Spanjës, nga i cili ka marrë premtimet se do të angazhohet për përshpejtimin e procesit të njohjes së Kosovës. “Ai theksoi edhe përkushtimin e Spanjës që të kontribuoj në procesin e politikave të përbashkëta të BE-së për mbështetje të Kosovës, në kohën kur ajo të jetë përfaqësuese e presidencës së BE-së”.


Presidenti i Republikës së Kosovës, dr. Fatmir Sejdiu është kthyer optimist nga vizita në Shtetet e Bashkuara të Amerikës se për Kosovën do të ketë njohje të reja nga ato vende, të cilat deri më tash kanë hezituar ta njohin shtetin e ri në botë.
Presidenti Sejdiu dhe ministri i punëve të Jashtme Skënder Hyseni, kanë qëndruar në SHBA në kohën kur mbahej Asambleja e Përgjithshme e OKB-së. Të dy përfaqësuesit e shtetit, edhe pse nuk kanë pasur të drejtë të marrin pjesë në punimet e Asamblesë së Përgjithshme, për faktin se Kosova nuk është anëtare e OKB-së, megjithatë ata kanë shfrytëzuar rastin që të përfitojnë nga takimet për të bërë ftesë për njohjen e Kosovës. Ata janë takuar me presidentë, kryeministra, ministra të jashtëm të vendeve të ndryshme, ambasadorë, në mënyrë që të lobojnë për njohjen e pavarësisë së Kosovës në ato vende të cilat hezitojnë ta njohin shtetin e ri në botë.
Gjatë kësaj vizite presidenti Sejdiu ka zhvilluar një takim edhe me presidentin e SHBA-ve, Barak Obama, të cilin e ka njoftuar për zhvillimet në vend, dhe punën që po bëjnë institucionet e vendit në ndërtimin e shtetit. “Presidentit Obama i shpreha falënderimin që SHBA-të i kanë dhënë në vazhdimësi Kosovës dhe natyrisht përkushtimin e tyre të ritheksuar se do të vazhdojnë me këtë mbështetje pa asnjë hezitim”, tha Sejdiu.
Pas kthimit në Kosovë, Sejdiu konfirmoj edhe një herë mbështetjen e SHBA-ve për proceset në Kosovë. Ai tha se ka marrë konfirmimin për njohjen e Kosovës nga Malavi, Katari, Tualo, dhe këto njohje do të jenë shumë të shpejta. Ndërsa, siç tha ai, Kuvajti dhe Pakistani kanë dhënë mbështetje për Kosovën dhe janë të shprehur të gatshëm në përshpejtimin e procedurave për njohjen e Kosovës. Ndërkaq, duke komentuar reagimet e përfaqësuesve serb ndaj pjesëmarrjes së delegacionit të Kosovës në Asamblenë e Përgjithnjë, Sejdiu tha se i janë përgjigjur këtyre reagimeve në takimet që ka pasur. “Ne nuk ua vëmë veshin protestave që Serbia i bënë, sepse ato janë tërësisht iracionale dhe mendoj se edhe për Serbinë është më mirë që të kthehet në racionalitet sa më shpejt dhe të jetojnë me frymën evropiane dhe kjo do të ishte më mirë”, tha Sejdiu, duke falënderuar të gjitha vendet që shprehen dashamirësi dhe mbështetje për Kosovën, duke e cilësuar këtë si shenjë të mirë për vendin.
Sipas tij, Beogradi pavarësisht tendencave për të penguar proceset në Kosovë, nuk do të arrijë ta bëjë një gjë të tillë, ngase siç tha Sejdiu, Kosova në këtë frymë të bashkëpunimit dhe kërkimit të mbështetjes së mëtejshme nga vendet që kanë influencë të veçantë në botë, SHBA, Britania e Madhe, Franca, Gjermania, Italia, por edhe vendet tjera, premtojnë angazhime të drejtpërdrejta.
Presidenti Sejdiu, gjatë qëndrimit njëjavor në SHBA është shoqëruar edhe nga bashkëshortja e tij dhe ministri i Punëve të Jashtme Skënder Hyseni. Ky i fundit është duke vazhduar vizitën e tij në SHBA me qëllim të kërkimit të sa më shumë njohjeve për Kosovën.