Mbi 10 mijë serbë pajisen me letërnjoftim të Kosovës

Mbi 10 mijë serbë pajisen me letërnjoftim të Kosovës






Nga Express

Ministria e Punëve të Brendshme të Kosovës ka pajisur rreth 10500 qytetar të komunitetit serb me letërnjoftim të Republikës së Kosovës. “Gjithashtu është e një rëndësie të veçantë se MPB-ja në mënyre që të ofrojë shërbime sa më të mira dhe profesionale për qytetarët ka hapur Qendrat e Regjistrimit Civil në të gjitha komunat e Republikës së Kosovës dhe është duke bërë përgatitje edhe për hapjen e Qendrave të reja në përputhje me procesin e decentralizimit”, thuhet në një njoftim të Ministrisë së Punëve të Brendshme.

Ministria e Punëve të Brendshme me këtë rast fton qytetaret e Republikës së Kosovës të aplikojnë dhe të pajisen me dokumente identifikimi dhe të votojnë me këto dokumente në zgjedhjet lokale qe po afrohen.

“Gjithashtu ju informojmë se Qendrat e Regjistrimit Civil ende punojnë me orar të zgjatur prej orës 08:00-19:00 prej të hënës deri të premten dhe të shtunave prej orës 08:00 – 16:00. Ministria e Punëve të Brendshme gjithashtu zotohet se do të vazhdojë të përmirësoje punën në përmirësimin e shërbimeve ndaj qytetareve”, thuhet në këtë komunikatë.