Ulqini solli lirikën e detit, Berati dhe Lezha motive kombëtare

Ulqini solli lirikën e detit, Berati dhe Lezha motive kombëtare

Kastriot Shehdadi

Mbrëmja e katërt në kalanë e Gjirokastrës ku mbahet festivali folklorik është hapur me grupin e 60 shqiptarëve nga Mali i Zi ku pos epikës kanë sjell dhe lirikë deti. Programi i tre grupeve artistike nga Mali i Zi, “Liria”, “Gruda” dhe “Ulqini”, kanë “zbarkuar” për herë të dytë radhazi në skenën e madhështore të qytetit të gurtë, por kësaj radhe për të konkurruar me të drejta të barabarta dhe me plot dinjitet me traditat e tyre folklorike. Ndaj, dhe nga prezantimi i tyre kanë “rrëmbyer” duartrokitjen e artdashësit gjirokastrit pasi në fonotekën e tyre shpirtërore kanë shpalosur me plot mjeshtri një copës së jetës së tyre, duke e transformuar kulturën e tyre tradicionale në një art të vërtetë. Tinguj baritor me kavall, interpretuar nga Shtjefën Ujkaj, ishte hapja e programit të këtij grupi për tu befasuar më pas spektatori befasohet në vallen “Dyluftimi me shpata”, interpretuar nga artistët e rinj Emin Palaj dhe Naxha Nikaj, interpretim ky që i kanë kujtuar spektatorit se traditat e tyre të lashta nuk harrohen kurrë, pavarësisht se folklori i tyre kultivohet dhe konservohet jashtë trojeve amë. Shoqëria “Gruda” erdhi në festival me një këngë me çifteli të titulluar “Përshëndetje nga Malësia”, kënduar nga Gjon Gjolaj për t’ia kaluar radhën kërcimit “malësorçe” interpretuar nga Mark dhe Maria Kalaj, ishte një perlë e vërtetë që “tronditi” platenë e skenës së kalasë. Pas ulqinakëve beratasit nga vet Berati, Kuçova dhe Skrapari janë mirëpritur me një tjetër përshtypje tek publiku që në skenë zunë vend nën ritmin e ëmbël të dajreve dhe përmes tingujve përhapen ndjesinë epiko-lirike. Ndërsa tryezat që po mbahen për çdo ditë po trajtojnë tema interesante të cilat ndërlidhen me vlerat e festivalit. Ndër këto tema sot ishte edhe problemi aktual i veshjeve popullore. Ndërkohë edhe Instituti Albanologjik i Prishtinës, promovojë edicionin më të ri të botimeve të saj duke dhënë shumë argumente të një punë të frytshme në lëmin e folklorit dhe të letërsisë.