Marrëveshje ndërmjet ministrive - 'Një banor një fidan'

Marrëveshje ndërmjet ministrive - 'Një banor një fidan'

Prishtinë - Ministri i ministrisë së Bujqësisë, Pylltarisë dhe Zhvillimit Rural, Idriz Vehapi dhe ministri i Punës dhe Mirëqenies Sociale, Nenad Rashiq, kanë nënshkruar të martën marrëveshjen për bashkëpunim për realizimin e projektit "Një banor një fidan" me të cilën synohet të pyllëzohen 816 hektarëve, ndërsa që gjatë implementimit të projektit do të punësohen rreth 1 mijë 735 punëkërkues. Të dy ministrat janë zotuar se do të angazhohen maksimalisht në realizimin e projektit për pyllëzim. Projekti në fjalë quhet "Një banor një fidan", dhe ka për qëllim pyllëzimin e 816 hektarëve të sipërfaqeve të zhveshura në Kosovë, kurse do të realizohet nën patronatin e kryeministrit, Hashim Thaçi. Bëhet e ditur se gjatë implementimit të këtij projekti pritet të punësohen rreth 1 mijë e 735 punëkërkues. Ndërkaq, sipas memorandumit të arritur mes MBPZHR dhe MPMS, kjo e fundit obligohet që me rastin e implementimit të projektit të punësoj punëkërkuesit e regjistruar në zyrat komunale dhe rajonale të punësimit. "Përmes kësaj marrëveshjeje MPMS dhe MBPZHR synojnë që të ulet shkalla e papunësisë dhe njëkohësisht ky projekt parasheh zhvillimin dhe koordinimin e të gjitha aktiviteteve që të dy ministritë janë të obliguar t'i përmbushin për një Kosovë me ambient më të pastër dhe sipërfaqe më të gjelbëruara", thuhet në një kumtesë të ministrisë. Projekti "Një banor një fidan" mëton të shndërrohet në një aktivitet tradicional në Kosovë dhe pos uljes së shkallës së papunësisë, ka për qëllim krijimin e një ambienti sa më të pastër në Kosovë.
I. Shabani