Për vrasjen në Ulpianë, arrestohet një shtetas shqiptar

Për vrasjen në Ulpianë, arrestohet një shtetas shqiptar






Nga D. Myrtaj

Policia e Kosovës ka arritur të identifikojë dhe të arrestojnë një të dyshuar për vrasjen që ka ndodhur mbrëmë në lagjen Ulpiana të kryeqytetit.

I arrestuari është Arben M. (1980), shtetas i Republikës së Shqipërisë, konfirmon policia nëpërmes një komunikate për shtyp.

“Pas marrjes së disa informatave të rëndësishme përmes rrugëve operative hetuesit kishin identifikuar së paku një të dyshuar për vrasjen e raportuar në orët e mbrëmjes të datës 28. 09. 2009, në lagjen e Ulpianës në Prishtinë. Pas analizimit të informatave të grumbulluara edhe nga dëshmitarët e rastit, hetuesit e drejtorisë Rajonale të Prishtinës kishin shpërndarë të gjitha të dhënat për personin e dyshuar në të gjitha drejtoritë rajonale dhe pikat kufitare në Republikën e Kosovës”.

Policia ka saktësuar se sot rreth orës 15, në pikën kufitare në mes Kosovës dhe Shqipërisë, në Vërmicë, zyrtarët e policisë kufitare të Kosovës kishin ndaluar për kontroll rutinor një veturë të tipit Golf, ngjyrë e bardhë, me targa të Republikës së Shqipërisë.

“Pas identifikimit të pasagjerëve dhe gjatë kontrollit të dokumenteve në këtë veturë, zyrtarët policorë identifikuan personin e dyshuar për rastin e vrasjes në lagjen e Ulpianës”, bëhet e ditur në komunikatë.

Të arrestuarit i është caktuar masa e ndalimit policor për 48 orë dhe brenda afateve të caktuara ligjore thuhet se do të dërgohet para organeve të drejtësisë.

Vrasje me thikë në Ulpianë

Blerim Burhani, 41 vjeç, nga Prishtina ka vdekur nga plagët e marra me thikë, nga një sulmues ende i panjohur.

Ngjarja ka ndodhur mbrëmë, rreth orës 22:45, në lagjen Ulpiana në Prishtinë.

Vdekjen e viktimës e ka konstatuar ekipi mjekësor në vendin e ngjarjes.

Florije Ahmeti, zyrtare për informim e policisë në Prishtinë, tha se policia është duke punuar intensivisht për të zbardhur krimin e kryer, mirëpo deri më tani nuk është arrestuar askush dhe se nuk dihen motivet e krimit.