Fatmir Salihu:Këndi poetik i së premtes në diasporë

Këndi poetik i së premtes në diasporë

Fatmir S. Salihu

A K S I O M Ë

asgjë nuk mbaron aty ku ndërron jetë Ti!
dhe pikë.
por -
çdo gjë definitivisht përfundon po lejove:
Ëndrra me të ikë!






R U B I K O N

të Persekutuarit
të Dëbuarit
të Rënët
Dëshmorët
Heronjtë Tanë
me shumë Virtyte
Personifikime
Ylber Vizionesh
Lartësi
Lum ne
Lum e Lum
lanë këtë botë
për një botë të Re
krejt Tanët
krejt për Ne!
sa Krenari!


dje -
askush
asgjë nuk mund
t`ua ndalonte
Flijimin!
të Persekutuarve
të Dëbuarve
të Rënëve
Dëshmorëve
Heronjve Tanë!

sot -
të Persekutuarve
të Dëbuarve
të Rënëve
Dëshmorëve
Heronjve Tanë
sikur
ua kanë ndaluar
të Na takojnë edhe Ne
(profiterët e foltoreve!)
zhurmaxhinjtë e marketingut!





V A J H A L L E



kur zë e lëndohet Sistemi i Vlerave
(ndjesë pastë!)
gjithë sortë lakej-butak-larash-sharlatanë
bashkëjeton perfekt
me përqindje matematikore
me gjithë potencialin barbar
i qasen kolonizimit me thes në krah…
përcaktojnë rregulla neandertale
e pjellin në kontinuitet:
demolim!
bastardim!
dekompozim!


kur seriozisht zë e lëndohet Sistemi i Vlerave
(pastë ndjesë!)
ajri tymos qelbësirë bishti
që imponohet si improvizim Koke
ndërkohë që Koka
Koka e gjorë
përpëlitet për mbijetesë
mizerable
ngulfatur në uragan
injorance!


kur çoroditet Sistemi i Vlerave
(ndjesë pastë!)
gjykohen gjeneratat
e komunitetit
të palindur
të tërheqin zvarrë
gjatë shumë gjatë
arkivolin e stërngarkuar
me mbeturina!






I N M E M O R I A M M Ë R G I M I


ishte e ku nuk ishte
nuk pushoi e për çka nuk luftoi
argat memec me bagazh nderi
pa pretendime
(familjen peng e të derdhë!)
pa lekë e gjithë katandi
krejt i lënë e harruar
pastaj këtu përfundoi!