Fushë-Kosova bëhet me Qendër Regjistrimi të Automjeteve

Fushë-Kosova bëhet me Qendër Regjistrimi të Automjeteve


Nga Express

Ministria e Punëve të Brendshme (MPB) inauguroi sot në Fushë-Kosovë Qendrën për Regjistrim të Automjeteve. Deri më tani, qytetarët e kësaj komune për të regjistruar veturën e tyre është dashur të shkojnë në Prishtinë për t’i kryer procedurat e nevojshme.

Në ceremoninë e rastit, ministri i Zenun Pajaziti, theksoi se kjo qendër u shërben qytetarëve për t’i kryer më lehtë shërbimet e tyre. Sipas tij, sivjet dhe vitin e ardhshëm, do të përmbyllet procesi i përmirësimit i kushteve të punës për punëtorët dhe objektet e tjera të gjendjes civile, patentshoferëve dhe regjistrim të automjeteve.

“Po ashtu do të vazhdohet pjesa tjetër e projektit tonë që ka të bëj me ngritjen e cilësisë së shërbimeve për qytetarë dhe kjo nënkupton sistemin dhe për procedurat e nxjerrjes së dokumenteve të reja. Për Fushë-Kosovën ky është hap cilësor, pastaj për punëtorët tanë dhe për qytetarët që kanë mundësi që më shpejtë të pajisen me dokumentet e tyre”, theksoi Pajaziti.

Në komunën e Fushë-Kosovës janë më shumë se 6 mijë vetura aktive që tash e tutje mund t’i kryejnë shërbimet në Qendrën e Regjistrimit të Automjeteve.