Komisioni disiplinor suspendon gjyqtarin Retkoceri

Komisioni disiplinor suspendon gjyqtarin Retkoceri






Nga Express

Komisioni Gjyqësor Disiplinor i Këshillit Gjyqësor të Kosovës (KGJ) ka marrë vendim që ta suspendojë Rrahman Retkocerin, gjyqtar në Gjykatën e Qarkut në Prishtinë, për shkelje të rëndë të Kodit të Etikës dhe sjelljes profesionale për gjyqtar.

KGJK, nëpërmes një komunikate për shtyp, bën të ditur se Komisioni Disiplinor ka shqyrtuar deklaratën publike të gjyqtarit Retkoceri dhe mori vendim që ai të suspendohet nga funksioni, me të drejtë në pagë.

Suspendimi fillon nga data 8 tetor 2009, deri në marrjen e ndonjë vendimi tjetër. “Gjatë kohës së suspendimit, të lartpërmendurit i ndalohet ushtrimi i çfarëdo aktiviteti që ndërlidhet me veprimtarinë e gjyqtarit”, thuhet në vendimin, i cili u është shpërndarë edhe medieve.

Retkoceri, njëri nga gjyqtarët e kolegjit në rastin “Grupi i Llapit”, pas shpalljes së vendimit, kishte dalë me deklaratë në media se ai nuk ka qenë pro vendimit për dënimin e Rrustem Mustafës, Latif Gashit e Nazif Mehmetit.

Kjo deklaratë konsiderohet shkelje e kodit të etikës, për çka ndaj tij është kërkuar inicim i procedurës disiplinore.
Burime të Expressit kanë bërë me dije se deklarata e Retkocerit ka ardhur pasi që ky gjyqtar, përmes mesazheve telefonike ka marrë kërcënime. “Gjyqtari ka marrë mesazh kërcënues, ndërsa rastin në fjalë po e heton Policia e Kosovës”, ka thënë një burim i gazetës, brenda policisë.

Retkoceri, që nga 7 korriku i sivjetmë, ka qenë pjesë e kolegjit gjykues në procesin gjyqësor kundër Rrustem Mustafës, Latif Gashit e Nazif Mehmetit. Pas 12seancave gjyqësore, kolegji nën drejtimin e gjyqtarit të EULEX-it, Francesko Florit dhe në përbërje të ndërkombëtarit tjetër, Tron Kundersen e gjyqtarit vendor, Rrahman Retkoceri, ka shpallur verdiktin.

Me aktgjykimin e shpallur më 2 tetor 2009, për kryerjen e veprës penale të krimeve të luftës përkatësisht rrahjes dhe torturës ndaj civilëve, Latif Gashi është dënuar me gjashtë vjet burgim, Rrustem Mustafa me katër, ndërsa Nazif Mehmeti me tre vjet burgim. Dy të fundit janë në liri, derisa Latif Gashi është në paraburgim.