Kuçi: Çështja e mërgimtarëve prioritet

Kuçi: Çështja e mërgimtarëve prioritet

Bota sot
Qeveria e Kosovës ka marrë kritika për mungesë të një numri ministrash dhe të vetë kryeministrit në kohën e pyetjeve parlamentare.



Hajredin Kuqi

Edhe në seancën e radhës Qeveria e Kosovës ka marrë kritika për mungesë të një numri ministrash dhe të vetë kryeministrit në kohën e pyetjeve parlamentare, përderisa shumë pyetje kanë mbetur pa përgjigje, ngase shumica prej tyre ishin për kryeministrin Hashim Thaçi.
Dy zëvendëskryeministrat kanë dhënë përgjigje në shumicën e pyetjeve, të cilat kanë pasur të bëjnë me diasporën, shëndetësinë, etj.
Zëvendësministri Hajredin Kuçi në pyetjen e deputetit të AKR së, Riza Smaka, përkitazi me formimin e Ministrisë së Diasporës, ka thënë se Qeveria e ka si prioritet kryesor çështjen e diasporës, dhe për këtë është përkujdesur që të nxjerr edhe ligje.
"Më 10 shtator, Qeveria e Kosovës ka miratuar Projektligjin për mërgatën e Kosovës", ka thënë Kuçi me këtë rast, duke shtuar se do të jetë qëllim kryesor ruajtja e identitetit kombëtar të mërgimtarëve të Kosovës, gjuha, kultura dhe tradita e tyre.
Kuçi ka theksuar se edhe puna e punëtorëve të Ministrisë së Punëve të Brendshme, të cilët gjatë muajve të verës kanë punuar me orar të zgjatur për t'i pajisur mërgimtarët me dokumente, dëshmon përkushtimin që ka Qeveria e Kosovës për diasporën e saj.
Ndërkaq ministri i Punëve të Brendshme, Zenun Pajaziti, i pyetur për procesin e liberalizimit të vizave, ka thënë para ligjvënësve se ky nuk është vetëm proces i brendshëm i Kosovës, por është edhe proces i Bashkimit Evropian, cili ka përfshirë të gjitha vendet e rajonit.
Ndërkohë, një varg kritikash nga ligjvënësit, sidomos ata të opozitës janë bërë për mungesën e kryeministrit dhe ministrave përkatës.
Kjo gjë ka shtyrë deputeten e AAK së, Donika Kada që të mbajë një konferencë për media, në të cilën ka lexuar pyetjen që për adresë ka pasur ministrin e Bujqësisë, Idriz Vehapi.
Ndryshe, Kuvendi i Kosovës në mbledhjen e sotme ka shqyrtuar Projektligjin për organizimin sindikal, për të cilin ka pasur pajtueshmëri në mesin e shumicës së grupeve parlamentare që të kthehet prapa ky projektligj dhe të vijë bashkë me Projektligjin e punës që të shqyrtohen njëherësh.
Legjislativi i vendit në rend dite për shqyrtim ka edhe raportin vjetor të Bankës Qendrore të Kosovës, Projekt strategjinë kundër korrupsionit dhe debatin për gjendjen tregtare në vend dhe raportet tregtare të Kosovës me shtetet tjera.
Gjithashtu, për shqyrtim është edhe raporti për monitorimin e Ligjit për mbeturina dhe rekomandimi i Komisionit Ad Hoc për emërimin e anëtarëve të Bordit të Radio Televizionit të Kosovës.