Shqipëri: 130 mijë studentë fillojë vitin e ri akademik

Shqipëri: 130 mijë studentë fillojë vitin e ri akademik

Bota sot, Tiranë
Në Shqipëri në të gjitha universitetet shtetërore dhe private nis viti i ri akademik për periudhën 2009-2010. Në vëmendje kryesore është numri i madh i studentëve, 130 mijë studentë dhe prej tyre 30 mijë ulen në auditorë për herë të parë .



Topi e Berisha urojnë studentët dhe stafin akademik për një nismë të mbarë studimore.
Akademia e Arteve në Tiranë është dekoruar sot nga presidenti i Shqipërisë, Bamir Topi. Titulli “Mjeshtër i Madh” i është dhënë këtij fakultetit në ditën e parë të fillimit të vitit të ri akademik 2009-2010.

TIRANË - Presidenti i Republikës, Bamir Topi dekoroi të hënën Akademinë e Arteve me titullin Mjeshtër i Madh në shenjë mirënjohjeje për gjithë figurat që kanë dalë nga ky auditor. Ai zgjodhi Akademinë për të përcjellë urimet e tij për një vit akademik sa më të mbarë për të gjithë studentët dhe pedagogët që nisën shkollën dhe punën për vitin 2009-2010. "Universitetet duhet të shkojnë drejt përmirësimit të cilësisë", u shpreh Presidenti në mesazhin e tij, ndërsa u bëri thirrje studentëve tanë që studiojnë jashtë të kthehen e të punojnë në atdhe. Kreu i shtetit vuri në dukje se Akademia ka mbështetjen e padiskutueshme të MASH.
Rreth 30 mijë studentë nisin për herë të parë studimet me kohë të plotë e të pjesshme në të gjitha ciklet e studimeve në rang vendi, ndërkohë që numri i përgjithshëm i studentëve për këtë vit akademik arrin në mbi 100 mijë. Në vend numërohen 11 universitete publike dhe mbi 20 private. Ndërkohë, Kryeministri Sali Berisha ka uruar studentët në mbarë vendin nga Universiteti i Kamzës. Ai premtoi mbështetje për kërkimin shkencor. Kreu i qeverisë tha se çelja e vitit të ri akademik është një ditë e rëndësishme për botën akademike shqiptare. "Ndje një kënaqësi të veçantë për faktin që sot ulen 30 mijë studentë nga auditoret. Dua të përgëzoj të gjitha universitetet shqiptare, studentët dhe stafin akademik për një nismë të mbarë të fushës shkencore dhe studimore", theksoi kreu i Qeverisë Berisha.
Urimi i ministrit të arsimit
Sikurse u shpreh në urimin e tij me rastin e kë tij fillimviti, ministri shqiptar i Arsimit Myqerem Tafaj, për herë të parë universitetet shqiptare do të ofrojnë të gjitha ciklet e studimeve që parasheh Karta e Bolonjës.“Bëhet fjalë për studimet bachelors, studimet master dhe studimet e doktoratës,"- tha zoti Tafaj.Një ndër çështjet e debatueshme deri tani në arsimin e lartë ka qenë ajo e akreditimit të universiteteve, renditja e tyre sipas cilësisë së mësimdhënies. Ministri Tafaj tha se brenda vitit të ardhshëm do të përfundojë klasifikimi akademik i universiteteve shqiptare.
Akreditimi i tyre pritet të bëhet nga një kompani e huaj.
Në ecurinë e arsimit të lartë në Shqipëri në vëmendje kanë qenë edhe investimet për rritjen e cilësisë së mësimdhënies. Ministri i Arsimit Myqerem Tafaj bëri të ditur se në Universitetet shtetëerore do të ketë ambiente të reja studimi dhe kërkimi shkencor.“Universitetet publike do të përfitojnë 25 laboratore të reja,“- tha ministri Tafaj ndërsa shtoi se “reforma më e rëndësishme do të jetë reforma e financimit të arsimit të lartë me synim rritjen e autonomisë universitare”.Të gjitha këto parashohin një rritje të numrit të studentëve në universitetet shqiptare, që në vitin 2013 pritet të arrijnë në 150 mijë . Ministri i Arsimit tha se brenda vitit pritet të përfundojë klasifikimi i universiteteve për nga cilesia e diplomave ndërsa një tjetër reformë do të jetë edhe autonomia financiare e universiteteve publike.