Urat e shumta dhe shtresat e bardha të Rugovës

Urat e shumta dhe shtresat e bardha të Rugovës

Beqir Sina, New York
Shoqata shqiptare-amerikane “Rugova” festoi 1-vjetorin e krijimit


Hys Shkreli: "Rugovës, për 100 vjet askush nuk i dha asgjë, mirëpo ajo i dha Kosovës liderin e saj"


BRONX - NEW YORK CITY: Shoqata “Rugova” festoi me anë të një manifestimi kulturor e argëtues1-vjetorin e krijimit të saj. Në ceremoninë e organizuar me këtë rast, ditën e diel, në njërin prej lokaleve më të njohura në Bronks- Nju Jork "Maestro's Restaurant" morën pjesë anëtarët e kryesisë së kësaj shoqate, përfaqësues të shoqatave e organizatave të tjera, aktivistë e veprimtarë të komunitetit. Morën pjesë edhe Ansambli Folklorik Autokton "Rugova", grupi muzikor Elita-3 dhe këngëtarët Klementina Morina e Besim Muriqi.

Po ashtu në këtë manifestim ishin të ftuar edhe aktivistë të dalluar të komunitetit shqiptar, kryetari i LDD-ës, Agim Rexhaj, nënkryetari i “Vatrës”, dr. Gjon Buçaj, anëtari i bordit të LQSHA, Zef Balaj, nënkryetari i SHA-"Dibrane" Lavdërim Cami dhe nga shoqata “Drenica”, Rifat Drenica, të cilët edhe e përshëndetën 1- vjetorin e krijimit të shoqatës "Rugova".
Festa e 1-vjetorit të krijimit të shoqatës u zhvillua në një sallë të bukur të krijuar me një ambient festiv, enkas për këtë rast, para afër 500 bashkëkombasëve tanë të pranishëm, kryesishtë mërgimtarë nga treva e Rugovës, Peja e rrethinat e saj. Njëvjetori i Shoqatës "Rugova" në Nju Jork, kishte si qëllim të ofrimit të bashkëkombasve tanë në diasporë, në gjallërimin e aktiviteteve të ndryshme në drejtim të ruajtjes dhe ngritjes së ndjenjes sonë kombëtare dhe ruajtjen e vlerave të kulturës, traditave dhe zakoneve tona.



Njëvjetori i shoqatës “Rugova” u shoqërua me një koncert festiv në qytetin e Bronksit- Nju Jork, ku jeton një komunitet i konsiderueshëm shqiptarësh, i treti në këtë zonë për nga madhësia numerike mes shumë etnive që e karakterizojnë këtë qytet amerikan, ku jetojnë të gjitha racat dhe fliten të gjitha gjuhët e botës.



Kjo festë, e para e këtij komuniteti, u shënua duke e pasuruar programin me shumë valle e këngë të krahinës së Rugovës, luajtur nga Ansambli Folklorik Autokton Rugova, recitime nga dy vogëlushet Elonora e Qendresa Lajçi, monologu nga poeti Shaban Lajçi, këngët e vallet e bukura burimore folklorike nga grupi folklorik autokton "Rugova". Luajtja në instrumentet karakteristike të kësaj krahine, daullja, lahuta, çiftelia, tepsia, gjethi e fyelli krjuan një ambient mjaft të mrekullueshëm në interpretimin e tyre.

Kryetari i Shoqatës “Rugova”, Isuf Rexhaj, mori fjalën e rastit dhe përshëndeti të gjithë të pranishmit në sallë duke ju uruar festën, dhe duke falënderuar shumë në kontributin e anëtarëve të kësaj shoqate dhënë në themelimin e fondit për blerjen e ndërtesës së shoqatës dhe blerja e truallit për varreza të komunitetit rugovas..

Më tej ai tha se ky manifestim i shoqatës "Rugova" do të bëhet tradicional dhe do të mbahet në fillim të tetorit, që është muaji kur edhe u krijua shoqata "Rugova", e cila u themelua më 11 tetor 2008. Kryetari i shoqatës z Isuf Rexhaj tha se kjo shoqatë është e regjistruar si organizatë jopërfituese, e hapur për bashkëpunim me të gjitha subjektet e tjera që veprojnë në komunitet. Shoqata "Rugova" do të jetë shoqatë kryesisht kulturore e sociale, e cila do të afirmojë vlerat kulturore e historike të trevës së Rugovës, por edhe do të ndihmojë organizimin e jetës dhe punës së mërgimtarëve tanë nga kjo trevë dhe mbarë trevat shqiptare.


Sipas tij, roli i saj do të jetë i dyfishtë: organizimi i jetës, punës dhe aktiviteteve tona kulturore këtu në Shtetet e Bashkuara të Amerikës, por edhe lidhje me vendlindjen. Po ashtu kjo shoqatë do të punojë edhe me inkuadrimin e mërgimtarëve tanë në jetën e sistemin amerikan dhe forcimin e miqësisë shqiptaro- amerikane. Për të arritur këto qëllime shoqata "Rugova" ka filluar përgatitjen për dy projektet tona të para: blerjen e një ndërtese për nevojat e shoqatës dhe të komunitetiti dhe blerjen e një trualli të përbashkët për varreza, në Nju Jork.




"Po ashtu, tha kryetari i shoqatës, ne planifikojmë që të ndihmojmë edhe aksione të ndryshme në vendlindje, në Rugovë dhe viset e tjera shqiptare. Këtu, për shembull, një nga angazhimet tona në vendlindje do të jetë caktimi i lokacionit të përherëshëm të Lojrave Popullore, ose të një Festivali Tradicional të Lojarve e Valleve të Rugovës. Ngritja e një Pllakati Memorial, me të gjithë emrat e të gjithë heronjve të Rugovës e më gjerë, që ranë për mbrojtjen dhe lirinë e kombit tonë.


Së fundi, në fjalën e tij kryetari i kësja shoqate, Isuf Rexhaj, tha se për të gjitha këto plane e projekte do të punojmë, por edhe do të ftojmë në bashkëpunim të gjithë ata që mund të kontribuojnë, sidomos biznesmenë e intelektualë të sukseshëm, aktivistë e punëtorë të dalluar, gjithmonë do t'u shërbejmë interesave të kombit tonë duke vazhduar të prezantojmë dhe afirmojmë kulturën dhe traditën rugovase dhe mbarëshqiptare. Zoti e bekoftë shoqatën “Rugova”, kombin shqiptar dhe kombin amerikan!
Rugovës, për 100 vjet askush nuk i dha asgjë, mirëpo ajo i dha Kosovës liderin e saj.


Gazetari i mirënjohur shqiptaro - amerikan, Hys Shkreli, u kujtoi rugovianëve, duke thënë: "kur e keni lëshuar Rugovën, ju keni menduar se po e leni Rugovën prapa. Por ju kurrë nuk e keni lënë atë, sepse kudo që keni shkuar e keni marrë nga një copë Rugovë me vete dhe kudo që keni shkuar e keni gjetur nga një pëllëmbë Rugovë... Dhe sonte kjo është më e madhja Rugovë që kam parë ndonjëherë në Amerikë, tha ai.

Për të evitentuar rëndësinë e kësaj treve Shkreli, tha se "Rugova me Drenicën, Shalën e Llapin ishin rezistenca e fundit e komunizmit jugosllav. Ajo Ishte strehorja e fundit e heronjve që rezistuan okupimin e Kosovës në fund të Luftës së Dytë Botërore, për këtë arsye pushtetet e kaluara sllave e dënuan Rugovën. Ajo për më shumë se 80 vjet, ishte një burg i madh i Kosovës, e izoluar tërësishtë nga civilizimi..."

Mes të tjerave, gazetari i mirënjohur Hys Shkreli, potencoi se "Rugovës për 100 vjet askush nuk i dha asgjë, mirëpo ajo i dha Kosovës liderin e saj. Rugova, tha Shkreli në fjalën e tij, së bashku me Plavën e Gucinë, ishte kufiri më i përgjakuar i veriut të Kosovës, Gryka e Rugovës dhe Gryka e Kaçanikut ishin dy grykat legjendare të Kosovës, të cilat i hapën derën mikut e ia mbyllën armikut, kudo dhe kurdo që ai ia mësyu Kosovës. Rugova, ka theksuar ai, ishte Pullazi i Kososvës, aty ku u strehuan shqiponjat e fundit të Kosovës, aty ku u strehuan edhe heronjtë nga lufta e fundit e Kosovës.

Shkreli e quajti Rugovën si të ishte Olimpi i Kosovës, Kolorado e Kosovës, por, tha ai, ishte edhe Tibeti i Ballkanit. Duke folur me nota poetike, ai tha se Rugova është rajoni më i bardhë i Kosovës, i bardhë më borën që e mbulon, i bardhë për historinë e saj, i bardhë për ujin që shkumëzon, i bardhë për veshjen e saj tradicionale, e bardhë më plisat e saj shqiptarë, i bardhë edhe me shkëmbijtë e saj. Rugova pra është sot agimi, mëngjesi i Kosovës. Atje puthin të parat rreze agimin; atje, në Rugovë përfundon edhe dita në Kosovë.


Në fund ai tha: "Falë shoqatës shqiptaro - amerikane "Rugova", një pjesë e historisë, traditës, bukurisë e mikpritjes rugovase, është sonte këtu me ju dhe për ju. E përgëzoj këtë shoqatë në Ditëlindjen e saj të parë dhe e hap këtë mbrëmje duke hapur kaptinën e re më të sukseshme të kësaj shoqate dhe këtij komuniteti në këtë vend të bekuar, i cili na ofroi sofrën atëherë kur të tjerët na e rrëmbyen atë.

Duke shpresuar se kjo Shoqatë të jetë ajo ura e njohur e Rugovës, që lidh dy brigje, dy shkëmbinj, lindjen me perëndimin, e ne këtë rast të shërbejë si lidhje juaja me vendlindjen dhe lidhje e kombit tonë me atë amerikan, ka përfunduar fjalën e tij gazetari i mirënjohur shqiptaro - amerikan, Hys Shkreli, i cili përshëndeti me këtë rastë 1- vjetorin e krijimit të shoqatës “Rugova”.