Berlin: Do t’i kthejmë 14 000 kosovarë

Berlin: Do t’i kthejmë 14 000 kosovarë

Berlin: Do t’i kthejmë 14 000 kosovarë



Gjermania synon të riatdhesojë 14 mijë refugjatë nga Kosova

Gjermania synon të riatdhesojë 14 mijë refugjatë nga Kosova.
Zëdhënësi i Ministrisë së Brendshme të Gjermanisë, Stefan Paris, deklaroi se Gjermania ka për qëllim të nënshkruajë një marrëveshje me Qeverinë e Kosovës për të mundësuar kthimin e organizuar të këtij kontingjenti.
Qëllim tjetër i marrëveshjes me Prishtinën zyrtare është dhe garantimi i të gjitha standardeve për të drejtat e njeriut për të kthyerit, thanë burimet pranë Ministrisë së Brendshme të Gjermanisë.
Këto të fundit theksuan se planifikojnë të kthejnë rreth 2500 persona në vit. Vitin e kaluar janë kthyer 900 kosovarë nga Gjermania.
Vendimi i Qeverisë gjermane ka hasur në kundërshtimin e përfaqësuesve të opozitës.
Anëtarja e parlamentit, Ulla Jelpke, përfaqësuese e së majtës, tha se rreth 10 mijë persona nga kontingjenti që pritet të kthehet, janë romë. Kthimi i tyre në Kosovë paraqet rrezik për ta, theksoi Jelpke.
“Kosova është një vend ku pakicat janë thellësisht të diskriminuara dhe persekutohen”, tha parlamentarja Jelpke.
Agjencia e Kombeve të Bashkuara për Refugjatë, UNHCR, pas vizitës në rajon, disa muaj më parë, tha se ende ekziston mundësia e tensioneve etnike, kurse kushtet e jetesës janë shumë të vështira.
Pak javë më parë në Kosovë janë kthyer disa dhjetëra strehimkërkues nga Gjermania, shumica e të cilëve i përkisnin komunitetit rom.
Përfaqësuesit e kësaj bashkësie përsëritën se nuk janë kushtet për kthim. Si pengesa kryesore ata theksojnë vështirësitë ekonomike dhe mungesën e strehimit.
Gjermania i paguan çdo të kthyeri 750 euro, përveç shpenzimeve të udhëtimit.