Blerim Rrecaj: E shtunë, e diel…

nga **Agim Gashi** Tue Oct 20, 2009 10:21 pm

Blerim Rrecaj

E shtunë, e diel…

E shtunë. Tetori merr teposhtëzën. Dhe ditët e tij mbërthehen një e nga një. Dhe ne jemi paksa të trullosur. Pak-sa e Shumë-sa… E shkruajta këtë dhe u rropata nëpër shtëpi për t’u kthyer te ky lokal edhe për t’u takuar me njërin që punon si gazetar në Klan Kosova dhe i cili kërkonte një banesë për t’u vendosur sepse do ta lironte banesën, ku tash sa kohë banonte si qiraxhi. Tri pika(…)Pos tjerash mora edhe një telefonatë të largët për një çështje që ka të bëj me drejtësinë. Halli hallit nuk i ngjan por sa në të vërtetë jemi në gjendje ta kuptojmë hallin e tjetrit a t’i ndihmojmë a t’i gjendemi pranë…Dhe ç’të bëj por vetëdijshëm a pavetëdijshëm ulem përballë këtij kompjuteri dhe për të lexuar një shkrim me titull “Ruajtja e fesë dhe e identitetit”. Ose komentin që titullohet : “EULEX-i nxit konfliktet në rajon (1)”.Përsëri tri pika(…) Dhe u bë një gjashtëpikësh imi e jo i Ban Ki Munit…Për ta lexuar në gazetë për procesin kundër aktivistëve të Lëvizjes Vetëvendosje të cilët akuzojnë gjyqtarët për shantazh dhe ndonjëri prej tyre mundohet të shfajësohet nga këto akuza. Rryma ka nisur të ndalet mjaft shpesh. Dhe...Jo, jo kurrgjë. Po afrohet edhe fundi i kësaj së shtuneje të 17 tetorit. Nesër bëhen pesëmbëdhjetë vite nga vdekja e gjyshit tim, e gjyshit tonë shpirtmirë, shpirtbardhë që u largua nga kjo botë gati pa u vërejtur dhe se i pranishëm gjendet në kujtimet tona. Dhe i cili bëri shumë e shumë vepra të mira që i dijmë e nuk i dijmë. Na merrte ne fëmijëve dhe na lëshonte si pëllumba të lirë. Nuk bënte dallime. Sa përpiqej e kujdesej për lumturinë tonë. Vëllau i cili jeton në Gjermani ndodhej atje edhe kur vdiq gjyshi dhe për çdo pushim që vije shkon dhe i heq barishtet e ferrat që mbijnë mbi varrin e tij në fshat. Duket se ndjen një dhimbje ndoshta të çuditshme. Mund të më thoni se e ke përzier krejt muhabetin e s’po di më për çka po flet. Mund të keni të drejtë. E unë kujt t’i jap të drejtë, ndokujt që mund të thotë se shtune e shtatëqind vjet s’do të bëhet mirë këtu apo atij që thotë se mirë, mirë do të bëhet… Ndoshta desha të them se me vepra të mira shumë mund ta ngrisim vetveten tonë dhe ato do t’i kemi mburojë prej të këqijave, prej syrit të keq…Më zuri e diela dhe shkuan edhe gjashtë minuta të saj…Do vargje këngësh që i kam dëgjuar e që thonë: ‘Dashuri moj dashuri ku jam unë e ku je ti’ , ose ‘mos ta ndijnë se çka thotë bota, mos ta ndijnë për fjalët e kota’ …pse më bëjnë mjaft përshtypje e ndonjëherë edhe vetë i nxjerr nga goja duke i shoqëruar me tinguj melodik ashtu siç i kam dëgjuar…Edhe e diela zbardhi pas atij gjumi nate. Një e diel me shi, e lagur, me erë që fryn dhe me një qiell të hirtë. Ftohtë dhe shumëkush thotë pritet të bjerë borë...Lukthi pak më është i rënduar nga ajo kapuçino që e piva në njërin nga ato aparate të vendosura së fundmi nëpër kryeqytet…

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30