Sejdiu: Rrota e historisë nuk mund të ndalet dhe as të kthehet pas

Sejdiu: Rrota e historisë nuk mund të ndalet dhe as të kthehet pas

Bota sot
Presidenti Sejdiu duke iu kundërpergjigjur kryetarit rus, Dimitri Medvedev, përsëriti edhe njëherë se Kosova është e pavarur mbi argumente të fuqishme, fillimisht mbi vullnetin e popullit.



Presidenti i Kosovës, Fatmir Sejdiu në takim me
ambasadoren Tarja Lajtianen

Presidenti i kosovës, Fatmir Sejdiu i është kundërpërgjigjur sot presidentit të Rusisë Dimitri Medvedev, duke thënë se rrota e historisë as nuk mund të ndalet dhe as kthehet pas. Sejdiu njohu angazhimin e Rusisë në të kaluarën, në kuadër të Grupit të Kontaktit dhe mekanizmave tjerë dhe shfaqi shpresën për një qasje të re të Rusisë ndaj Kosovës në të ardhmen. Presidenti Sejdiu e vlerësoi sot irracionale qasjen e Rusisë ndaj Kosovës. Ai përsëriti se Kosova është e pavarur mbi argumente të fuqishme, fillimisht mbi vullnetin e popullit. Sejdiu foli sot edhe për rëndësinë e vendosjes së marrëdhënieve diplomatike me Maqedoninë.“Rrota e historisë as nuk mund të ndalet dhe as nuk mund të kthehet, Kosova është e pavarur mbi argumente të fuqishme, në radhë të parë mbi vullnetin e popullit të saj, të zhvillimeve të mëhershme, të cilësisë që ka patur dhe në kuadër të të gjitha proceseve të tjera që kanë ndodhur, prej intervenimit e deri tek nderimit i institucioneve të proceseve demokratike, në proceset e bisedimeve, andaj jemi ku jemi dhe Kosova është e pavarur”, ka theksuar presidenti Sejdiu.
Presidenti i Rusisë Dimitri Medvedev, gjatë vizitës së djeshme në Beograd ka thënë se Rusia do të vazhdojë të mbështes Serbinë në çështjen e Kosovës, për të mbrojtur sovranitetin dhe integritetin territorial.
Sidoqoftë, duke iu kundërpërgjigjur deklaratave të tilla kreu i shtetit të Kosovës paralajmëroi njohje të reja, ndërsa vlerësoi lartë vendosjen e marrëdhënieve diplomatike me Maqedoninë.
“Kosova dje ka përfunduar procesin e vendimit të themelimit të ambasadës së saj në Republikën e Maqedonisë që është një shenjë e mirë e bashkëpunimit të mirë në mes dy vendeve dhe bashkëpunimet e shkëlqyeshme me vendet e tjera të rajonit. Unë them se është një mesazh paralel i ndjenjës sonë për Serbinë, që nesër të hapen mundësitë e bashkëpunimit ekonomik dhe të komunikimit të lirë të qytetarëve, e të hapen mundësit e eksportit reciprok dhe jo të vazhdohet me pjesën e shtrëngesave”, ka thënë Sejdiu.
Presidenti Fatmir Sejdiu i ka bërë këto komente , pas takimit me ambasadoren e re Finlandës, në Kosovë, Tarja Lajtianen, e cila i dorëzoi letrat kredenciale dhe ofroi mbështetjen e vendit të saj për integrimin e Kosovës në Bashkimin Evropian. Ndërkaq, ambasadorja Laitiainen, pasi shprehu kënaqësinë e saj për takimin me Presidentin Sejdiu, tha se Finlanda ka qenë mbështetëse e Kosovës, është edhe tash dhe do të jetë edhe në të ardhmen.
Ambasadorja Laitiainen foli edhe për prezencën e Finlandës në vendin tonë, me ushtarët në kuadër të KFOR, prezencën e fuqishme në EULEX dhe gjithashtu me prezencën bilaterale me hapjen e ambasadës në Prishtinë.
"Ne jemi pjesë e EULEX-it, ne natyrisht jemi edhe politikisht të përfshirë në këtë proces. Ne jemi këtu për ta mbështetur perspektivën evropiane për Kosovën edhe ne të ardhmen. Dhe është e qartë që Kosova ka të ardhme evropiane dhe kjo është parë edhe në raportin e fundit të Komisionit Evropian", ka deklaruar ambasadorja Tarja Lajtianen. Finlanda është një ndër vendet e para që e ka njohur Pavarësinë e Kosovës.