ZIA E KFOR-IT PËR DORËN E DJATHTË TË MILLOSHEVIQIT

KFOR-in e ka kapluar një zie e thellë. Radioja e KFOR-it (K4), e cila punon në seksionin shqip dhe atë serbisht, ka ndërprerë emisionet në këtë të fundit, i goditur nga një pikëllim i madh.

Pikëllimi për vdekjen e Patriarku të 44-t të Kishës Ortodokse Serbe, Pavle (Gojko Stojkovic;).

Që prej vitit 1957 Pavle shërbeu në Rashkë dhe Prizren. Gjatë këtyre viteve Serbia e Rankovicit po bënte kërdinë mbi familjet shqiptare nëpërmjet ‘fushatës së mbledhjes së armëve’ (kujto edhe ‘Procesin e Prizrenit’). Më shumë se 300.000 shqiptarë u shpërngulën në Turqi nga ky terror serb. Pas 33 vjetëve sa shërbeu në Kosovë, Pavle u zgjodh në krye të Kishës Ortodokse Serbe, më 1990, pikërisht atëherë kur Slobodan Miloševici e konsolidoi mirë e mirë pushtetin e tij në krye të Serbisë, dhe po përgatiste planin për zgjerimin e Serbisë nëpërmjet shkatërrimit të Jugosllavisë dhe batërdinë mbi kroatët, boshnjakët e shqiptarët.

Pasi Miloševici siguroi pushtetin politik dhe atë ushtarak si President i Serbisë, ai tashmë kishte edhe pushtetin shpirtëror serb, natyrisht, nëpërmjet dorës së tij të djathtë Patriarkut Pavle, nëpërmjet të cilës mbante në dorë heshtën e kryqëzatës ndaj popujve joserbë. Kur Miloševici filloi luftërat kundër popujve tjerë, Patriarku Pavle u mor me bekimin e kriminelëve të rinj, në mënyrë që ta lehtësonte e pastronte shpirtin e tyre nga pesha e dyshimit a ngurrimit për kryerjen sa më efektive të masakrave. Ai kontribuoi jo vetëm që këta besimtarë të tij të vrisnin sa më shumë, por të masakronin me bindjen e palëkundur të misionit hyjnor në shërbim të Zotit. Pavle po bënte diçka që s’mund ta bënte Miloševici pa Kishën Ortodokse Serbe: bekimin nëpërmjet të cilit vrasja kthehej në një obligim shpirtëror, detyrë morale, urdhër të shenjtë. Gjatë luftrave në Kroaci, Bosnje e Kosovë, Pavle ishte babai shpirtëror i Radovan Karaždicit, Ratko Mladicit dhe Željko Ražnatovicit – Arkanit.

Nëpërmjet nderimit dhe pikëllimit për një figure të tillë, KFOR-i po tregon fytyrën e tij të vërtetë. Kjo do të thotë që KFOR-i e konsideron Kosovën si pjesë të Serbisë. Natyrisht që KFOR-i jo vetëm që nuk do të mbante zi, ta zëmë, për Adem Jasharin, por ai madje edhe e pat bastisur kompleksin memorial të Jasharajve. Në anën tjetër mban ditë zie për njeriun që qysh prej fillimit e pati vendin aty ku shkojnë të gjithë përbindëshat e kësaj bote: në Ferr. E ngushëllimet – veç KFOR-it.

Lëvizja VETËVENDOSJE!


(Ne foto - e cila s'ndodhet ne komunikaten zyrtare te Levizjes, por ketu e qita une, A.V.- shihet zevendesi i Pavles, Amfilohije)