Fillon Haga, dueli i radhës Kosovë - Serbi

Fillon Haga, dueli i radhës Kosovë - Serbi

Melazim Koci, Hagë
Hagë, 1 dhjetor 2009 -- Në Hagë, sot në orën 10:00, fillon procesi i interpretimit juridik të shpalljes së pavarësisë së Kosovës nga ana e Gjykatës Ndërkombëtare të Drejtësisë. Procesi është iniciuar nga Serbia dhe miratuar nga Kombet e Bashkuara.



E para që do të prezantojë qëndrimin rreth pavarësisë së Kosovës është Serbia dhe ky prezantim do të fillojë sot në orën 10:00 për të zgjatur 3 orë.
Në orën 15:00 fillon për tri orë rresht prezantimi i argumeneteve të Kosovës. Fjalën e hyrjes do ta mbajë ministri i Jashtëm i Kosovës, Skënder Hyseni, ndërsa pas tij, Kosova do të prezantohet nga ekspertët dhe këshilltarët ndërkombëtarë – Majkëll Vud, Daniel Myler dhe Shën Marfi.
Pas ditës së sotme dhe deri më 11 dhjetor do të ketë dëgjime dhe deklarime të shteteve që janë pro ose kundër pavarësisë së Kosovës.
Pritet që nga 29 vende, sa do të dëshmojnë në Hagë (përjashtuar Kosovën dhe Serbinë), 15 të jenë në anën e Kosovës, ndërsa 14 në anën e Serbisë. Në anën e Kosovës, pos tjerëve, do të dëshmojnë Shtetet e Bashkuara të Amerikës, Britania e Madhe, Gjermania, Franca, Kroacia..., ndërsa në favor të Serbisë do të jenë Rusia, Kina, Vietnami, Spanja, Venezuela...
Mendimi këshillëdhënës, jo obligativ, i GJND-së rreth shpalljes së pavarësisë së Kosovës mund të pritet në pranverën e vitit 2010. (rel)