Shazim Mehmeti: BALADË PËR NUSEN E SELIM DASHIT

Shazim Mehmeti: BALADË PËR NUSEN E SELIM DASHIT

E bënë si e bënë, i gjetën nuse dhe e martuan Selim Dashin.
I vëllai që ia dinte hallin të vëllait, para se ta mbyllnin në dhomë me nusen, i tha: «Mos harro! Bëri qejf nuses, Selim Dash!»
Dhe, Selim Dashi e mori me gjithë mend: posa u fut në dhomë me nusen, e mori trumbetën dhe filloi t'i binte gjithë hare!
Nusja, (që paguante një fatkeqsi të sajën, e që tashmë e pa edhe këtu sa është sahati), ia nguli sytë e bukur, dhe fare e padrojtur e pyeti: «Ç'bën me këtë trumbetë, o Selim Dash?»
– Ty të bëj qejf, iu përgjigj Selim Dashi me zgërdhitje, Bali më ka porositur të mos harroj!
Ajo i hodhi një sy përkëdhelues, meqë ishte tepër e pjekur, tepër e njerëzishme dhe tepër e vetëdishme për fatkeqësinë e saj të re. Dhe, meqë i erdhi edhe tepër keq për Selim Dashin, ia mori kokën dhe ia futi midis gjinjëve. Ia bëri të gjitha qejfet, dhe e vuri në gjumë...
Të nesërmen, akoma pa zbardhur dita, ajo iku me erën dhe e vari veten te një lis.