Tirana, sheshi i festës mbarëshqiptare të demokracisë

Tirana, sheshi i festës mbarëshqiptare të demokracisë



Sot, nga sheshi “Skënderbej”, rikonfirmohet “po”-ja e fuqishme, për aspiratën e integrimit në BE. Mbarë Shqipëria kremton sot 8 dhjetorin, festën e madhe të lirisë, ditën e shembjes së komunizmit dhe të rrënimit – njëherë e përgjithmonë – të mbeturinave politike të Ramiz Alisë
Prej disa ditësh kryeqyteti shqiptar, Tirana, vendi nga ku filloi lëvizja anti komuniste e të rinjve studentë dhe që u përshkallëzuar në të gjithë vendin, u zbukurua me dekore të veçanta që simbolizojnë ditën e triumfit të të drejtave të njeriut, mbi të gjitha lirinë. Sot, më 8 dhjetor, mbarë vendi ka arsye madhore për të reflektuar rreth të shkuarës së hidhur, vuajtjet, mundimet, torturat çnjerëzore të një prej regjimeve më barbare që ka njohur ndonjëherë njerëzimi, pushkatime, varjet në litar. Të gjitha këto akte makabre, kanë vetëm një emër, Komunizëm....
Do të mjaftonte një ditë e ftohtë dhjetori, prag një dimri të acartë që do ti faturonte shembjen përfundimtare të sistemit të kalbur keqbërës, grabitqarë që mbahej në këmbë në formë rrënoje nga Ramiz Alia, Gramoz Ruçi, Skënder Gjinushi e disa të tjerë që ende gjallojnë në politikën e ditëve të sotme si një rrezik permanent për demokracinë. 8 dhjetori mbahet mend gjallë nga të gjithë pjesëmarrësit studentë të asaj kohe që mobilizuan një qytezë të vogël në Tiranë, por të madhe në ideale dhe frymë progresiste për liri dhe prosperitet që do të ndeshej dhëmb për dhëmb me forcat e sigurimit të shtetit. Barrikadat e vendosura përgjatë rrugës së Elbasanit kurrsesi nuk do të ndalnin vrullin demokratik të qindra e mijëra të rinjve, të stërlodhur dhe stërmunduar nga regjimi i egër diktatorial. E jo vetëm këta por edhe mijëra qytetarë të kryeqytetit e që në ditët në vijim do të zbarkonte e gjithë Shqipëria, për të zhbërë udhëheqësit famëkeq të regjimit komunist.
Lëvizja e 8 dhjetorit shënoi rrëzimin e Murit të Berlinit shqiptar. Shqipëria, një nga vendet më të shtypura në Evropë, do të ndeshej me regjimin komunist deri në grahmat e fundit të tij. E si të mos mjaftonte kjo, mbetjet e regjimit i mbijetuan valës së parë të demokracisë.
Me ardhjen në pushtet të Partisë Demokratike, Shqipëria hyri në një stad të ri demokratizimi, një stad i panjohur dhe sigurisht i vështirë për tu kapërcyer me gjithë problemet e mëdha dhe njëherazi katastrofave që trashëgimia komuniste kishte lënë. Por, vullneti i forcave politike të djathta dhe me në krye Presidentin e asaj kohe e njëherazi Kryeministrin aktual Sali Berisha, ishte realist dhe me bindje të qartë që Shqipëria të çmontohej përfundimisht nga e kaluara diktatoriale.
Por, kundër rrymës demokratike, punoi një grup, një çetë famëkeqe komunistësh që në vitin e mbrapshtë të ‘97-ës do të shënonin rebelimin komunist, momente që do të hynin në histori si më të përgjakshmet dhe që morën qindra jetë njerëzish, thjeshtë e vetëm që të vinin në pushtet, komunistët e rinovuar si, Ruçët, Gjinushët, Gjonët, Doklet etj, që cenuan deri në thelb rendin demokratik dhe e kthyen Shqipërinë në hesapet e tyre.
Shqipëria, tashmë i ka kaluar vitet e errëta. Arriti t’i neutralizojë mbetjet e regjimit komunist dhe të konfirmohej si një vend lider porsa i takon stabilitetit dhe demokracisë së konsoliduar. Por, puna nuk ndalet këtu.
Në katër vitet e mandatit të shkuar qeveria e kryeministrit Berisha, luftoi në palcë krimin e organizuar dhe lidhjet e tij me politikën, pavarësisht se ende asnjë politikan nuk ka përfunduar pas dyerve të qelisë. Të mos harrojmë se sapo është miratuar në parlament ligji antimafia. Një tjetër iniciativë kjo që synon të rrisë nivelin e demokracisë në vend dhe të asgjësojë fenomenet e rrezikshme për vendin, ekonominë dhe rendin social. Me anë të kësaj nisme, e cila vetëm pak ditë pas aprovimit në parlament, dje ka dhënë frytet e para ndaj abuzimit total të bashkisë së Tiranës dhe mafies gërshet, Shqipëria mund të çlirohet përfundimisht nga kthetrat e klikës masonike, trashëgimtarë të nomenklaturës komuniste, që çdo natë, çdo ditë, punojnë në interes të kundër me interesat shqiptare, punojnë të interes të kundër të projektit ambicioz të Partisë Demokratike dhe kryeministrit Berisha, për Shqipërinë Evropiane.
Ndaj, sot ka një mori arsyesh për të festuar dhe për një pjesëmarrje masive.
Sot festohet për Shqipërinë në NATO, për Shqipërinë pa viza, për Shqipërinë e integruar në Bashkimin Evropian.
Sot, nga sheshi “Skënderbej”, të gjithë njëzëri i themi ‘PO’ Evropës.