Korrupsioni në çdo sektorë

Korrupsioni në çdo sektorë

Ismail Shabani
Publikohen të gjeturat e korrupsionit.

Prishtinë, 8 dhjetor - Komisioni Evropian ka paraqitë konstatimet e Studimit të korrupsionit në Kosovë për vitin 2009. Në Kosovë korrupsioni ekziston në shumë forma dhe në të gjithë sektorët. Parandalimi dhe luftimi i korrupsionit duhet të jetë rrënjësor dhe të gjitha institucionet e Kosovës duhet të punojnë në bashkëpunim të ngushtë me njëra tjetrën, pasi që ka nivel të ulët të interesit politik në Kosovë për ta luftuar këtë dukuri, po ashtu edhe mungesë nga ana e qytetarëve për të raportuar, u tha në mbledhjen publike ku u paraqitën konstatimet e Studimit të korrupsionit në Kosovë. Kjartan Björnsson, shef i operacioneve në Zyrën ndërlidhëse të KE-së, tha se konstatimet e studimit duhet të shfrytëzohen në mënyrë konstruktive për të krijuar një mënyrë efikase për luftimin e korrupsionit. “Në Kosovë korrupsioni ekziston në shumë forma dhe në të gjithë sektorët. Parandalimi dhe luftimi i korrupsionit duhet të jetë rrënjësor dhe të gjitha institucionet e Kosovës duhet të punojnë në bashkëpunim të ngushtë me njëra tjetrën. Duhet të kthehet besimi i publikut dhe duhet të rritet rezistenca kundër sjelljes dhe praktikave të korruptuara”, tha Bjornsson. Ai theksoi se në Kosovë ka një mungesë të vullnetit politik, për ta luftuar korrupsionin dhe ka një gjyqësi me të meta, pasi që ka një dobësi në zbatimin e ligjit. “Rrjete shoqërore dhe lidhjet e ngushta familjare dhe besnikëria klanore ofrojnë mbështetje, kështu që keq bërja nuk bëhet e njohur. Si pasojë, sjellja e korruptuar kopjohet dhe përsëritet. Rrjetet (grupimet) profesionale – mungesa e transparencës në marrëdhëniet midis politikanëve, shërbyesve civilë, udhëheqësve publikë, familjeve dhe bizneseve të tyre krijon një ambient të mbyllur ku ka mundësi dhe ku presioni i korrupsionit është i lartë”, tha Bjornsson.
Hasan Preteni, kryetar i Agjencisë për Kundër-Korrupsion në Kosovë, tha se për fat të keq korrupsioni në vendin tonë ende nuk është duke u gjykuar. Ai tha se raportet e Agjencisë po hasin në veshë të shurdhër. Sipas tij, ka ngritje të aktakuzave, mirëpo nuk ka gjykime. Slagjana Taseva, e cila ka kryer këtë studim të KE-së, tha se dokumenti është relevant dhe vë në pah manifestimet kryesore të korrupsionit dhe ndahet në tri modele të veçanta të sjelljes, që janë të ngulitura fuqishëm në të gjithë sektorët e shoqërisë. “Njëra ndër to, është mundësia e njohur edhe si keq bërje, pasi që korrupsioni gjerësisht pranohet si një mundësi për përfitim financiar dhe si pasojë, rezistenca individuale dhe kolektive ndaj presionit të korrupsionit është e ulët”, tha ajo. Sipas saj, grupimet shoqërore, lidhjet e ngushta familjare dhe besnikëria klanore, ofrojnë mbështetje, kështu që keq bërja nuk bëhet e njohur, dhe si pasojë e kësaj sjellja e korruptuar kopjohet dhe përsëritet. Përgatitja dhe publikimi i studimit është pjesë kyçe e projektit të financuar nga BE-ja, në mbështetje për institucionet kundër korrupsionit në Kosovë.