Shaban Cakoli: MBAHU MEDVEGJË

Shaban Cakoli: MBAHU MEDVEGJË

Mbahu e fortë, Medvegjë, moj motër,
Mos i leni plang e votër!
Mos ia mbyll dyert kapixhikut,
Mos ia kënaq zemrën armikut!
Mos mbyll magjën, mos mbyll derën,
Pragut t' shpisë, mos ja qit therrën !
Mos mbyll odat dhe oborret,
Mos ua le katilave vorret!
Mos ua shuaj oxhaqeve timat,
Se nga varret - t' mallkojnë trimat!
Mos i le të shkreta trojet,
T' mallkon gjaku, t' mallkojnë krojet!
Mos i le malet krenare,
Se t' mallkon nëna shqiptare!
Mos ua mbyll shkollat fëmijëve,
Se na i bëjnë kotarë të thive !
Mos ia le ngrohtësinë Gejzerit,
Se t' mallkojnë plagët e tmerrit!
Mos e le jetim Sijarinën ,
Djepit tënd, mos ia kthe shpinën !
Mos e le me lot Tupallën ,
Se s' kanë varret me kënd t' çmallën !

Nga libri:"Kushtrim lirie" Gjilan, më 2005, faqe 62. Demir KRASNIQI