Njohja e Kosovës shtet i pavarur

Njohjet për ditëlindje
Skënder Hsyeni pret njohje të reja për Kosovën nga një varg vendesh të ndryshme. Një pjesë e këtyre njohjeve do të ndërlidhen simbolikisht me njëvjetorin e shpalljes së pavarësisë. Në ditët e para të shkurtit shpallet konkursi për 22 ambasadorët e parë. Do të emërohen dy oficerë ndërlidhjeje në Bruksel, një në Bashkimin Europian dhe një në NATO.

Nga Bekim Greiçevci më 27.01.2009 në ora 8:09

Ministri i Jashtëm Skënder Hyseni po pret njohje të reja për Kosovën nga një varg shtetesh, një pjesë e mirë e të cilave do të realizohet më 17 shkurt, ditën kur shteti i ri mbush një vjet të pavarësisë. Në një takim të mbyllur me Komisionin Parlamentar për Punë të Jashtme, të hënën, Ministri Hyseni citohet të ketë thënë se nota për njohje u ka dërguar 39 vendeve të ndryshme.

Ky komision ka ftuar kryediplomatin kosovar të paraqesë projeksionet diplomatike të Kosovës për muajt e ardhshëm. Hyseni ka pohuar se shumë shpejtë do të hapen edhe 12 ambasada të reja të Kosovës, ndërkaq në pjesën e parë të shkurtit do të shpallet konkursi për 22 ambasadorët e parë.

Tash për tash Kosova ka dhjetë ambasada në botë, që udhëhiqen nga të ngarkuar me punë. Përzgjedhja e njerëzve që do të marrin titullin e ambasadorit nuk do të jetë proces i lehtë. “Konkursi me siguri do të hapet në fillim të shkurtit. Është në përfundim e sipër hartimi i akteve nënligjore, instrumentit të domosdoshëm për të përcaktuar kushtet e konkursit. Është një kornizë mjaft komplekse, e cila përcakton një varg kompleks imunitetesh dhe privilegjesh për ambasadorët, për diplomatët e Kosovës të rangjeve të ndryshme”, ka thënë Ministri Hyseni, në një prononcim për media.

Para anëtarëve të Komisionit Parlamentar që udhëhiqet nga Sabri Hamiti, Ministri Hyseni ka shpalosur edhe plane tjera të Ministrisë së Jashtme. Ai ka bërë të ditur se do të emërohen dy oficerë ndërlidhjeje në Bruksel, një në Bashkimin Europian dhe një në NATO. Gjithashtu, Hyseni ka paralajmëruar edhe hapjen e konsullatave në shumë qytete të mëdha të vendeve të fuqishme që kanë njohur pavarësinë e Kosovës.

Ministria e Jashtme planifikon që gjatë këtij viti Kosova të nënshkruaj marrëveshje dypalëshe dhe shumëpalëshe me shtete të ndryshme. Hyseni ka vlerësuar se kjo do të reflektojnë pozitivisht në afirmimin ndërkombëtar të Kosovës, por edhe tek Gjykata Ndërkombëtare e Drejtësisë (ICJ).

Kjo gjykatë është ngarkuar të jap nxjerrë një opinion këshillëdhënës lidhur me legalitetin e shpalljes së pavarësisë së Kosovës. Çdo shtet anëtar i OKB’së ka të drejtë të paraqesë qëndrimin e vet për këtë çështje përmes një deklarate që duhet dorëzuar deri më 17 prill të këtij viti. Javën e kaluar Spanja, një nga pesë vendet e BE’së që nuk pranojnë pavarësinë e Kosovës, ka bërë të ditur se deklarata e saj do të jetë e përafërt me qëndrimin e Beogradit.

Mirëpo, me plot siguri mund të pritet që shumë shtete, veçanërisht ato perëndimore, do të deklarohen në favor të Kosovës në Gjykatën e Drejtësisë, por Ministri Hyseni nuk ka pranuar të përmend asnjë nga këto vende.

“Është në diskrecion total të secilit anëtar të OKB’së, vend përkrahës i Republikës së Kosovës, që të bëjë ose të mos bëjë deklaratë dhe ne nuk do të duhej të flisnim publikisht në emër të atyre vendeve”.

Përfaqësues të opozitës kosovare vlerësojnë se Kosova nuk i ka mirë punët në marrëdhëniet ndërkombëtare, për shkak se nuk është bërë mjaft gjatë vitit të kaluar.
Lidhur me këtë, Ardian Gjini i Aleancës për Ardhmërinë e Kosovës (AAK) ka deklaruar se Kosovës i janë humbur shumë shanse. “Gjithçka që po ndodh tani, edhe ambasadat e reja që do të hapen, ne po ashtu i përshëndesim sepse duhet të hapen ato ambasada, por ka pasur mundësi që të ishin kryer shumë më herët, ka pasur mundësi që edhe konkurset të hapen më herët”.

Sipas tij, pamjen të cilën e jep Kosova, çoftë me qeverisjen brenda, çoftë me punën që e bën si politikë e jashtme, “jep një pamje të çoroditur e cila është edhe më e keqe, sesa që ishte dashur të jetë në vitin e saj të parë të pavarësisë”

Ai ka kritikuar pushtetin se nuk bërë një vizitë zyrtare, si për shembull në Hungari, për të falënderuar këtë vend që ka njohur shumë shpejt Kosovën. Gjini ka thënë se “pamja që është krijuar, brenda për brenda Kosovës, korrupsioni në rritje, papërgjegjësia në punë, ndikojnë drejtpërdrejt edhe në numrin e njohjeve”.