Ferdinand Nikolla:Ju flet Kosova, shteti prej letre!

nga **Agim Gashi** Thu Feb 18, 2010 11:23 pm

Ferdinand Nikolla

Ju flet Kosova, shteti prej letre!

Më qoftë gëzuar ditëlindja e dytë! Shteti juaj i pavarur po feston nën dizajnin e ‘Saatchi & Saatchi’, meqë i fala ca milona për një videoklip që nuk shfaqi pasurinë, identitetin, kulturën dhe vlerat e popullit tim, por shfaqi hartën e Kosovës së panjohur ndërkombëtarisht. Këtë bota në google mund ta kishte shikuar. Duke mos dashur t’u prishë pushtetarëve harmoninë e festës, po i bëjë një përshkrim të shkurtër funksionimit tim 10 vjeçar.

Për 10 vite, a arrita të kontrolloj tërë territorin tim?

Edhe pas një dekade, nuk arrita të kontrollojë tërë territorin tim, duke dështuar kështu në funksionin tim unik që më jep karakterin e shtetit sovran dhe të pavarur. Unë (Kosova) as nuk vendosa viza, as kartona të gjelbër, as pagesa për sigurim, e asgjë tjetër që të tjerët vendosën ndaj meje. Nuk përfitova gjë as nga marrëveshja e CEFTA-s, vetëm ngulfata prodhuesin vendor. U bëra shtet i “hapur” dhe fqinje e “mirë”, por në dëm të popullit tim!

Cila qe politika e jashtme e imja?

Të dashur qytetarë, që prej kur i hapa ambasadat nëpër botë, shumë nga to nëpër hotele, a keni vërejtur (sidomos ju në diasporë) ndonjë të mirë në jetën tuaj të përditshme, apo, e keni patur vështirë t’i gjeni adresat dhe numrat e hoteleve ku qëndrojnë ambasadorët tuaj! Më tregoni të dashur qytetarë, çka bëra, unë shteti juaj për të burgosurit në Luginën e Preshevës dhe ata të Malësisë së Malit të Zi, për t’i ndaluar persekutimet çnjerëzore politike kundër tyre? Kur i dërgova pushtetarët e mi t’i vizitonin njerëzit tanë në këto vende? Pse ata kurrë se bënë këtë, ndoshta sepse nuk deshtën dhe nuk ditën. Ata mbetën peng i politikave ditore dhe protokoleve e rezolutave që të tjerët u servonin mbi tavolinë. A e keni kuptuar ju të dashur qytetarë çka mëtoj të arrij unë shteti juaj me politikën e jashtme, pos njohjeve të reja për pavarësinë time?

Çfarë arsimimi dhe edukimi ju ofrova për 10 vite?

Përveç ndërtimit të disa godinave shkollore/universitare, cilësia mbeti e njëjta. Ende nxënësit mësojnë përmendësh lëndën e fizikës e kimisë në mungesë laboratorësh, ndërsa studentët vlerësohen nga profesorët e pareformuar, me nga tri pyetje (gërvisht dhe fito)! Kjo ndodh sepse unë shteti juaj dijta vetëm të ndërtoj (godina), e jo të ndërtoj sistem të mirëfilltë arsimimi e edukimi. Sot, fatkeqësisht, shumë nxënës/studentë në vend se të thonë fjalët ‘është dashur’, ata thonë ‘u duft’. Shpesh herë këtë e thonë edhe vet pushtetarët e mi!

Çfarë mirëqenie garantova për ju për 10 vite?

Pensionet e gjyshërve/gjysheve tona të cilët e ndërtuan këtë vend dhe më gjerë, ende u jap nga 40 euro, sa për të mos i lënë të vdesin urie. A ekziston ndonjë krim më i madh se ky që unë bëjë çdo ditë ndaj popullit tim?! Qe dhjetë vite, mësimdhënësit, policët, shërbyesit civil, punëtorët shëndetësor, etj, punojnë në kushte mizore, me paga që s’mund të ngopen as më bukë. Mbi dy million qytetarë ende nuk gëzojnë sigurimin shëndetësor/jetës, kjo sepse unë, shteti juaj, u dhashë këtë obligim kompanive private të sigurimeve, shumica prej tyre të inkriminuara bashkë me mua. Të gjithë shoferët e Kosovës paguajnë sigurim për veturë dhe atë çdo vit paguajnë shumën e njejtë, as më lirë e as më shtrenjtë, pavarësisht nëse kanë apo s’kanë pësuar ndonjë aksident gjatë vitit. Pse nuk u zbres çmimin atyre që nuk pësojnë aksidente, ndërsa rrisë çmimin atyre që pësojnë?! Pse po e lejoj edhe këtë krim ekonomik t’ju ndodhë juve dhe pse po u marrë çdo vit atë që nuk më takon?! Edhe sa krime duhet t’i bëjë unë, shteti juaj, për të kuptuar se si po vras popullin tim?!

Çfarë infrastrukture u ndërtova për 10 vite?

Për 10 vite, unë, shteti juaj, i administruar/sunduar nga vendorët dhe ndërkombëtarët, nuk arrita të ndërtoj asnjë autostradë fillim e mbarim që do të lidhte tri qytete bashkë. Për 10 vite vetëm ndërtova ca rrugë lagjesh e komunash, të cilat pas një muaji/viti u shkatërruan, ngase u mora kompanivë ndërtuese të hollat që u dhashë dhe u kërkova të ndërtojnë rrugë me ‘cilësi’! A e dini pse për 10 vite rrugët e Kosovës nuk u pastruan kurrë nga bora, sepse kompanive përgjegjëse për pastrimin e borës u mora të hollat që u dhashë dhe u thashë të lënë borën të shkrihet vet, sepse shteti nuk ju kërkon llogari për aksidentet – edhe ashtu qytetarët janë injorantë dhe nuk marrin vesh në këto punë! Më thoni ju të dashur qytetarë, sa spitale, çerdhe fëmijësh, fusha sporti, teatro, shkolla profesionale, parqe, vende dëfrimi, etj, ndërtova për 10 vite? Më thoni ju çka bëra në malet e Rugovës, çka investova në parkun kombëtar të Sharrit, pos villave pa leje për pushtetarët e mi ? Më thoni kur arrestova e burgosa zyrtar komune e qeverie për korrupcion e krim, apo vetëm ju gjobita për kalim shpejtësie, e ju arrestova se protestuat në paqe. Më thoni ju që jetoni në fshatra, a ua solla ujin, rrymën, kanalizimin, asfaltin, apo për 10 vite vetëm u mësova fjalën ‘participim’!

Cili qe identiteti im për 10 vite?

Pas pavarësisë krijova ca institucione të reja, si: Focën e Sigurisë së Kosovës, e që në uniformat e ‘ushtarëve’ tanë në vend se të shkruaja FSK, shkrova ‘KSF’. Ndërsa, edhe pse me ligj e quajta policinë tonë, policia e Kosovës, në uniformat dhe veturat e tyre shkrova ‘POLICE’ ! Pse e ndryshova identitetin (gjuhën shqipe) vetëm për të qenë mirë më të tjerët, e keq me popullin tim. Pse i bëra të huaj policët/ushtarët e mi. Pse zhduka dhe eliminova çdo gjë të bukur kuq e zi, çdo gjë që tigëlloi në gjuhën time të lashtë e të shtrenjtë amtare. Pse u solla me Shqipërinë sikur ta kisha njerkë, jo amë, u distancova dhe nuk mora asgjë nga identiteti jonë i përbashkët. Çfarë krijese u bëra unë Kosova?!

Cili qe vizioni im për 10 vite?

Për një dekadë nuk arrita t’i tregoj qytetarëve të mi vizionin për Kosovën përparimtare dhe të zhvilluar! Politikat ditore, shkurtëpamëse, të pastudiuara dhe provinciale që zbatova më kanë sjellur në kolaps ekonomik, papunësi, paperspektivë për të rinjtë e mungesë të mirëqenies e të sigurisë për më të vjetrit. Këto politika që nuk buruan nga populli im më kanë sjellë në prag të luftës civile. Unë që arrita t’i marrë qytetarit çdo gjë, madje edhe shpirtin po qe nevoja, nuk arrita t’u tregoj atyre vizionin për të ardhmen përparimtare vendore, regjionale dhe europiane. Nuk arrita t’i qendis popullit tim të urtë një plan, i cili qartë tregon se çka do të bëjmë sot për të pasur sukses nesër; çka do të bëjmë sot për të pasur mirqenie dhe punë nesër? Unë arrita vetëm të organizojë tryeza, konferenca, vizita e takime me të hollat e popullit tim dhe arrita t’u flas juve me një gjuhë teknike gjysëm shqipe që kurrë as vet nuk e kuptova!

Çfarë pushteti u ndërtova për 10 vite?

Kur dëgjoj lajmet, lexoj gazetat, shikoj shtrëngimet e duarve mes politikajve, shikoj billbordat e pushtetarëve bukurosha të ngjyrosur më shumë se femrat, më duket sikur kam ndërtuar një shtet demokratik, ndërsa kur shoh gjendjen e familjeve, pensionistëve, policëve, taksistëve, të rinjve, punëtorëve të krahut, kur shoh të sëmurët, lypësit, baltën, rrugët me gropa, konvojet e ushtrive të të gjithë botës, filloj të mendoj nëse kam ndërtuar shtet demokratik apo diktatorial, apo as njëra e as tjetra, por kam ndërtuar një shtet prej letre, që një ditë as një stuhie të vogël s’do të mund t’i përballoj dot!

A thua i dashur popull unë Kosova dhe ju e merituam këtë?!

Ferdinand Nikolla:Ju flet Kosova, shteti prej letre! 23946_323887363680_187205523680_3522899_951061_n

Ferdinand Nikolla

Marrë nga LDD Gjermani

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30