Nuk ka vullnet politik për shkatërrimin e strukturave paralele

Nuk ka vullnet politik për shkatërrimin e strukturave paralele!

Fatbardha Zeka, BOTA SOT





Opozita thotë se qeveria nuk po bën mjaft për shtrirjen e sovranitetit

Veriu i Kosovës vazhdon të mbetet ndërmjet okupimit dhe lirisë së brishtë. Pavarësisht që KFOR-i dhe tash policia e EULEX-it thonë se po e mbajnë rendin dhe qetësinë, zbatimi i Kushtetutës së Kosovës është i pamundur nga institucionet e Kosovës.
Ndërsa, të premten shumë kush filloi të gëzohej se me ndalimin e një vizite të një zyrtari serb, përkatësisht të një ministri të qeverisë së Serbisë, do të fillonte zbatimi i Kushtetutës
Shumë shpejt u mor vesh, se nuk ishin institucionet që kishin vepruara të pavarura, për të dëshmuar sovranitetin, por ishin tutorët evropianë, misioni i EULEX-it që me kërkesë të Brukselit ishte bërë kërkesa zyrtare.
Qeveria optimiste që sovraniteti do të shkatërrojë strukturat paralele
Strukturat paralele serbe në veri dhe në enklava të Kosovës, funksionojnë edhe pas një vitit të pavarësisë. Mungesa e vullnetit politik dhe interesimi i institucioneve ndërkombëtare ka bërë që këto struktura të mos shkatërrohen, ende, por sipas qeverisë këto struktura do të shkatërrohen me shtrirjen e sovranitetit dhe me sundimin e ligjit në tërë territorin e Kosovës. Zëvendës kryeministri Ramë Manaj, duke e quajtur përgjigje komplekse thotë se ato janë pjesë ë krimit të organizuar dhe procesi i shkatërrimit të këtyre strukturave tashmë ka filluar.
“Strukturat paralele serbe në pjesën veriore po nxiten drejtpërdrejt nga Beogradi zyrtarë, ato janë pjesë ë krimit të organizuar, pjesë e dorës së zgjatur të Beogradit dhe ato shkatërrohen me shtrirjen e sovranitetit dhe të sundimit të ligjit gjithnjë e më fuqishëm në tërë Kosovë, ky proces tashmë ka filluar dhe me punën e EULEX-it, gradualisht hap pas hapi, do të shpërbëhen edhe strukturat dhe funksionimi i tyre. Tani më ka filluar të ndalohet hyrja e personave të pa dëshiruar dhe ky proces do të jetë në fuqizim dhe shtim të efikasitetit gjithnjë në të ardhmen”, thotë Manaj. Por, a do ti shkatërrojë vetvetiu sovraniteti dhe prania e EULEX-it atje, ato struktura?
Ndërkaq komisioni për siguri vlerëson se derisa strukturat paralele serbe të jenë të financuara nga qeveria e Serbisë, është vështirë të bëhet shkatërrimi i tyre.
Gani Geci, anëtarë i Komisionit për siguri në Kuvendin e Kosovës thotë se këto struktura financohen drejtpërdrejt nga ana ne qeverisë së Serbisë, si dhe hyrja e bandave serbe nuk mund të ndalohet meqë sovranitetit nuk është i shtrirë në tërë territorin e vendit.
“Strukturat paralele serbe në Kosovë janë të financuara drejt për drejtë nga Qeveria e Serbisë dhe një pjesë e tyre edhe e policisë të Republikës Kosovës financohen edhe nga qeveria e Kosovës. Dhe deri sa këto struktura paralele financohen nga një shtet tjetër është vështirë të shkatërrohen. Sa i përket hyrjes së bandave, ato nuk po ndalohen pasi që sovraniteti i Kosovës nuk është i shtrirë në gjithë territorin, pavarësisht që Kushtetuta e Republikës së Kosovës thotë që Kosova është shtet sovran dhe i pa ndashëm, por qeveria nuk ka arritur të shtrijë tërë sovranitetin plotë në të gjithë territorin e Kosovës dhe meqë nuk ka sovranitetit në tërë territorin e Kosovës atëherë nuk ka mundësi edhe me i ndalë bandat”, thotë Geci.
Opozita, mungon vullneti politik
Ndërkaq, për opozitën këto struktura nuk shkatërrohen meqë mungon vullneti politik, dhe se tek institucionet e vendit është krijuar një varfëri e madhe. Ahmet Isufi, deputet në Kuvendi e Kosovës, nga radhët e AAK-së thotë se institucioneve iu duhet një guxim i madh për tu bërë edhe integrimi i vendit, dhe se hyrja e bandave nuk po ndalohet ngase institucionet tona po presin zgjidhje nga BE-ja.
“Strukturat paralele në Kosovë nuk po shkatërrohen sepse është krijuar një varfëri e madhe e institucioneve të Kosovës ndaj Bashkësisë Ndërkombëtare duke pritur edhe më tutje që të hyjë në nominimin, ndërsa ne tani më jemi shtet dhe adresa e parë dhe e vetme që mundet me iniciuar zgjidhje janë institucionet e Kosovës, prandaj duhet një guxim më i madh që të bëhet edhe integrimi i pakicave në Kosovës, por njëkohësisht të veprohet edhe ndaj mekanizmave të cilët po dirigjon Serbia përmes tyre. Hyrja e bandave në Kosovë nuk po ndalohet ngase institucionet tona ende po kujtojnë që janë nën UNMIK-un dhe ende po presin që BE-ja ti kryejë detyrat tona prandaj një masë më energjike e institucioneve gjithnjë duke e kërkuar ndihmën e bashkësisë ndërkombëtare normalisht do të munde të bëjë një gjendje efikase”, theksoi deputeti Isufi.
Mirëpo, për LDD-në asgjësimi i strukturave paralele serbe është një strategji Beogradit.
Naser Rugova, deputete në parlamentin Kosovës nga radhët e LDD-së thotë se qeveria dhe ministritë përkatëse duhet të punojnë ë shumë dhe të jenë të vendosura të shkatërrojnë strukturat paralele serbe.
“Problemi i asgjësimit të strukturave paralele serbe jo vetëm në pjesën veriore të shtetit tonë, por edhe në pjesët tjera të Kosovës të banuara me minoritete serbe ka qenë një strategji e regjimit të Beogradit që mos t’i njoh strukturat legale dhe legjitime të dala nga vota e popullit dhe zgjedhjet e lira dhe ta instrumentalizojnë komunitetin serb në dëm të zhvillimit të funksionalizimit të shtetit dhe të institucioneve të Kosovës, në këtë kontest tani një shtet i pavarur dhe sovran, konsiderojë që institucionet e republikës së Kosovës konkretisht qeveria, ministria e punëve të brendshme, ministria e drejtësisë dhe mekanizmat tjera institucional duhet të punojnë shumë seriozisht dhe të jenë të vendosur që të shkatërrohen këto struktura serbe që realisht po e dëmtojnë edhe imazhin, por edhe po e pengojnë funksionalizimin e plotë të shtetit”, thotë Rugova.
Sipas tij këto struktura po e pengojnë edhe ligjin dhe rekomandon nga institucionet që të marrin hapa konkret në koordinim me BE-në.
Ai gjithashtu tha se mos ndalja e hyrjes së bandave është dobësi e funksionalizimit të shtetit dhe mungesë e kontrollimit të kufijve.
Shpresat tek EULEX-i
Edhe AKR-ja si njëra nga partitë opozitare mendon se arsyeja e mos shkatërrimit të strukturave paralele serbe është mungesa e vullnetit politik dhe veçanërisht e institucioneve ndërkombëtare.
“Mos shkatërrimi i strukturave paralele serbe është sepse ka mungesë të vullnetit politik sidomos nga institucionet ndërkombëtare, të cilat kanë përgjegjësi në zbatimin ligjshmërinë në Kosovë, dhe mungon iniciativa e institucioneve të Kosovës dhe të mekanizmave të cilat janë për luftimin e strukturave paralele serbe” u shpreh Ismet Mulaj, anëtarë i kryesisë së AKR-së.
Ndërkaq ,për ekspertët e sigurisë strukturat paralele serbe janë evidente sidomos nëpjesën veriore të Kosovës, por pse ato nuk po eliminohen nuk dhanë një përgjigje, por vlerësojë se problemi qëndron në faktin se nuk kontrollohet i gjithë territori i vendit. Ramadan Qehaja, ekspertë për çështje sigurie thotë se ardhja e EULEX-it duhet të ndërrojë disa gjëra të cilat duhet të shkojnë në drejtim të duhur. “Strukturat paralele janë evidente sidomos në pjesën veriore të Kosovës, por edhe në brendi të territorit dhe ato janë duke funksionuar, por pse nuk po ndërmerren masa që ato të eliminohen unë përgjigje të saktë në këtë pyetje nuk kam, por mendojë që me ardhjen e EULEX-it, shpresojmë që disa gjëra këtu do të shkojnë në drejtim të duhur edhe pse konsiderojë se kërkesat tona në këtë drejtim është dashur të jenë shumë më të ashpra se sa deri më tani, prandaj problemi qëndron aty që ne nuk po mundemi ta kontrollojmë një pjesë bukur të madhe të territorit, fjala është për pjesën veriore të Kosovës” vlerësoi Qehaja.