Pretesta të ish trupave të TMK-së

Protestuesit kërkojnë dorëheqjet e ministrit e komandantit të FSK-së

Ramiz Bojaj, BOTA SOT





Vazhdojnë protestat e ish-pjesëtarëve të TMK-së

Rreth 200 pjesëtarë të ish-Trupave të Mbrojtjes të Kosovës protestuan të hënën para ish-shtabit të TMK-së. Në krahasim me protestat paraprake, kjo e sotmja ishte më agresive, sepse protestuesit provuan të hyjnë dhunshëm në ndërtesën e Shtabit të Përgjithshëm të FSK-së. Në tentativë për t’u futur brenda objektit në fjalë, ata ndaluan nga njësiti special i policisë së Kosovës. Pjesëtarët e Këshillit organizativ theksuan se mbështesin kërkesat e mëhershme për rishikimin e procesit të seleksionimit, si dhe kërkojnë dorëheqjen e ministrit Mujota dhe të komandantit Selimi.
Përkrahet FSK-ja, por kritikohen anëtarët e bordit seleksionues
Muhamet Gubetini, kryetar i Këshillit protestues, një ish-pjesëtar i TMK-së që nuk është pranuar në FSK, theksoi se protestat vijnë për shkak të moskonkretizimit të Marrëveshjes ndërmjet ministrit të MFSK-së, Fehmi Mujotës dhe Këshillit organizativ të protestave. Ai thotë se përkundër premtimeve ende nuk është plotësuar asnjë nga pikat e Marrëveshjes."Qëllimi i protestës është konkretizimi i Marrëveshjes me udhëheqësit e Qeverisë. Deri më tash nuk janë realizuar kërkesat tona që kemi kërkuar përgjegjësi prej institucioneve më të larta të vendit, por edhe nga ato ndërkombëtare rreth mënyrës testuese për pjesëtarët e FSK-së. Në këtë kontekst kërkojmë dorëheqjen morale të atyre pjesëtarëve që kanë qenë pjesë e bordit seleksionues", tha në protestën e ditës së hënë , Muhamet Gubetini, kryetar i Këshillit protestues dhe ish-kapiten në Trupat Mbrojtëse të Kosovës. Ai thotë se arsyeja që kërkojnë dorëheqjen e Ministrit dhe Komandantit të FSK-është për shkak të moszbatimit të kritereve të vlerave në testin kalues të pjesëtarëve të FSK-së. “Nuk jemi kundër FSK-së, përkundrazi jemi të lumtur që është formuar forca jonë e sigurisë, përderisa në qëndrojmë përkrah pjesëtarëve të cilat janë pranuar në FSK, por problemi është tek stafi përzgjedhës, theksoi z Gubetimi. Ai theksoi se duke qëndruar besnik rreth kërkesave në fjalë kanë vendosur që protestat e tilla të vazhdojnë edhe ditën e martë në orën 12.00. Edhe protestuesit e tjerë, ish-pjesëtarë të TMK-së, adresojnë nota kritike ndaj udhëheqësve të MFSK-së dhe përfaqësuesve të tjerë qeveritarë. “NATO-ja nuk është fajtore, sepse nuk di për secilin anëtar të TMK-së, veç e veç, por qeveritarët janë ata që e kanë prurë situatën deri këtu”, tha Agim Dërguti, ish-pjesëtar i TMK-së dhe tash protestues pranë ndërtesës së SHP të FSK-së. Ai është shprehur se ndien pakënaqësi ndaj Këshillit Organizativ, duke shpërfillur edhe “rregullat” e KO-së.
Sipas policisë, protesta është shpërndarë e qetë
Reagimi i pjesëtarëve të Policisë së Kosovës në mbrojtën e Shtabit të Përgjithshëm të FSK-së ishte i udhëhequr nga njësitë speciale të PK-së, të cilat gjatë kohës së mbajtjes së protestës shoqëroheshin nga njësia elite. Sipas zëdhënëses së Policisë Rajonale, Fikrie Ahmetit, edhe gjatë ndërhyrjes ndaj disa personave që tentuan të hyjnë dhunshëm në objekt nuk është evidencuar asnjë polic ose protestues i lënduar. “Përkundër veprimeve të njësisë speciale të policisë në ruajtjen e objektit të FSK-së, ku ishin të vendosur edhe zyrtarët e lartë të kësaj force, protesta është shpërndarë e qetë”, vlerësoi zëdhënësja, Ahmeti, duke shtuar se përkundër veprimeve shpesh të dhunshme, protestuesit i janë përgjigjur me përgjegjësi urdhrave të policisë. Ajo shtoi se protesta ka filluar në orën 12.00 dhe ka përfunduar në orën 13.30. Në këtë protestë janë angazhuar njësitë e specializuara të quajtura “Njësi Mbështetëse Operative Rajonale e Prishtinës”. “Pavarësisht nga disa përpjekje për reagime të dhunshme, Policia e Kosovës ka arritur të mbajë nën kontroll tërë ecurinë e protestës, duke mos evidencuar asnjë rast delikat të lëndimit ose arrestimit”, vlerësoi znj. Ahmeti. Këtë e forcojnë edhe zyrtarë të QKU-së, të cilët vlerësojnë se asnjë rast i vetëm i ndonjë pjesëtari të protestës ose edhe të policisë nuk kanë kërkuar ndihmë në qendrën emergjente. “Asnjë i lënduar i vetëm qoftë nga policia apo edhe nga pjesëmarrësit në protestë nuk kanë kërkuar ndihmë në QKU”, vlerësoi zëdhënësi, Shpend Fazliu. Duke iu kundërpërgjigjur pakënaqësisë së shumë pjesëtarëve të TMK-së, të mbetur jashtë FSK-së, përfaqësuesit e institucioneve vendore kanë hapur edhe një mundësi, duke hartuar një strategji të re në mënyrë që një numër të këtyre pjesëtarëve të TMK-së të inkuadrohet në Policinë e Kosovës. Gjatë mbajtjes së protestës të ditës së hënë, përpos numrit të shtuar të Policisë së Kosovës edhe pranisë së njësive speciale, vërehej edhe një numër i pjesëtarëve të karabinierëve të KFOR-it italian.