Shaip Beqiri:DIPTIK I DËSHMISË SË DASHURISË

nga **Agim Gashi** Sun Jan 23, 2011 2:01 pm

DIPTIK I DËSHMISË SË DASHURISË

Shaip BEQIRI

GRIMI E VETJA

Më në fund
Ja edhe njajo hapësira e madhe
E pambarim

Krejt e lirë dhe e zbraztë
Përfundi flatrave të gjymta

Po ti nuk di kurrgjë për të
Mësa për valën që të shtyn
Kah bregu i zhveshur në erë

Nis të përftosh hapësirë tjetër
Të ngjashme me veten

Së pari pikas mënjollën
Që shpërthen rrëzë një trungu
Diku thellë midis zemrës sate
E rrënjës që të ruan nga rrufetë

Ngadalë
Rrok degën e ngatërruar
Të mbetur pezull ndër ëndrra

Kështu tremb zogun në fluturim
Dhe këput gjethin që s`fëshfërin

Pastaj
Vjeshtës ia çel udhën
Që të mbulosh çdo gjurmë
Me grimin e brymtë të saj

Në degë skuqet molla
E në mollë stërkandrret malli

Përnjëherë të shfaqet papandehur
Vala që të nxjerr të tretur
Në bregun tjetër

Po ti kurrë s’do të dish
Përse gjithnjë trillohet vjeshta

RITMI E ASGJË

Erdhi koha të hyjmë
Në lëkurën e njëri tjetrit

Të vërtetës së madhe
Që na sillet rreth shtëpisë
Patjetër t`i besojmë

Para se të ëndërrohemi
Ajo do të na zgjojë

Zhveshur deri në asht
Mish i gjallë të dalim
Nëpër pyll fshehtësie
Yllin tonë të kërkojmë

Koha e dashur tashmë erdhi
Muzikë pagjumësie të dëgjojmë
Ritmin e këputur të zemrës sonë

Pas perdes së tejdukshme
Dritaren hapakrah ta lëmë

Koha është të shikohemi
Si në pasqyrë të thyer
Në sytë e njëri tjetrit

Ti do t`i japësh gji
Asaj rrenëze të rrallë
Unë do t`i fryj fshehtas
Pluhurit të saj të gjallë

Do të gjendemi thellë
Përtej lotit të tretur

Fatin do ta mbështjellësh
Rreth ashtit tim të mbetur
Në një gërranë të kaltëruar

Ah koha është të vdesim moj
Ende pa jetuar

Pregaditu nga Haxhi Muhaxheri

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31