Beka: Avokati i Popullit po hetohet për keqpërdorime

nga **Agim Gashi** Mon Jul 06, 2015 11:45 pm

Beka: Avokati i Popullit po hetohet për keqpërdorime

Kryeprokurori i Prokurorisë Themelore në Prishtinë, Ymer Beka tha se në institucionin që ai e drejton nuk ka pasur asnjë aferë prej që ka nisur ta menaxhojë atë dhe nuk ka ndërhyrje, “me aq sa unë kam informata”.

Kryeprokurori Beka iu kundërpërgjigj edhe Avokatit të Popullit duke thënë se nuk pret që ta lavdërojë Kurteshi pasi ai, siç tha Beka, “është nën hetime për keqpërdorim të detyrës zyrtare.
“Në vitin 2013, policia e ka dërguar një informacion se ka shpërdorime të mjeteve buxhetore në institucionin e Avokatit të Popullit. Pasi prokuroria ka filluar hetimet, ai ka ardhur në vizitë tek prokurori i shtetit, në atë kohë Ismet Kabashi, ku të ftuar në zyrën e Z. Kabashi ishim edhe unë e edhe Avokati i Popullit. Në atë takim mu ka drejtuar se “kush je ti të më hetosh mua” dhe tha se “unë jam njeriu i tretë në shtet në hierarki”. Pra u soll jo mirë. Unë ju përgjigja, ‘Z.Kurteshi, kur kam lëndë për hetime, nuk e shikoj se kush jeni ju. Secili që shkel ligjin ne e ndjekim’. Ai më pati thënë se dikush bën hetime të qëllimta. Pasi kanë filluar hetimet intensive, si shenjë mllefi, ai del publikisht dhe thotë se Prokuroria Themelore është çerdhe e krimit të organizuar. Pra, është frustrim i tij dhe më sulmon edhe mua”, ka thënë Beka, transmeton Koha.net.
Kryeprokurori i Prokurorisë Themelore në Prishtinë, Ymer Beka, ka treguar edhe për atë se për çfarë hetohet Sami Kurteshi.
“Ky ka keqpërdorur paranë duke bërë takime dhe manifestime. Pra, materialin për ndeja e ka përdor për një firmë të familjes së vet. Nuk ka respektuar procedurat e prokurimit dhe mendojmë se ka bërë përfitime materiale në institucionin e Avokatit të Popullit. Ka avancuar persona në detyrë dhe ka rritje të pagave përgjysmë më shumë dhe ka bërë ndikime në disa raste”, ka thënë Beka.
Sa i përket akuzave të Kryetarit të Gjykatës Themelore në Prishtinë, Hamdi Ibrahimi, ndaj prokurorisë, Beka tha se kjo ishte arsyeja që edhe kam kërkuar të vij në “Puls” sepse na ka akuzuar pa fakte.
“Problemet nuk janë në prokurori por në gjykata. Problemi mbi 90% është në gjykata, mos të flasim në lëmin civile se ato janë për të ardhur gjynah. Lëndët zgjasin aq shumë sa mund të pensionohesh deri në përfundim të tyre. Mund të ndodhë të mos përfundojë lënda kurrë duke i zhagitur lëndët civile. Në lidhje me lëndët për korrupsion, kemi dënime qesharake, dënime me kusht nga gjykata për korrupsion, ose tek uzurpimet, dënime me të holla. I caktohet masa e arrestit shtëpiak njeriut i cili nuk është hiq nga Kosova. Nëse bëhet ndërhyrje, ato bëhen në gjykatë. Pra defektet janë edhe tek menaxhimi. Kemi standarde të dyfishta tek dënimet. Për një vepër të njëjtë dënohen krejt ndryshe. Hamdi Ibrahimi mundohet të menaxhojë me dorë të hekurt. Ai duhet ta dijë se nuk është koha e komunizmit dhe ky kryetar ka harruar se nuk janë më masat e dhunshme ku ka punuar ky në vitet të 90-ta”, ka theksuar Beka.
Tutje, ai ka thënë se Hamdi Ibrahimi ka folur me duar në xhepa për sa i përket vjetërsimit të lëndëve duke na akuzuar neve, ndërsa e vërteta është kjo e se “prokuroria jonë ka shumë pak lëndë që parashkruhen, pra janë dhjetëra”.
“Ndërsa në gjykatë, prej se është Kryetar Hamdi Ibrahimi, janë këto shifra që janë parashkruar: në vitin 2013 janë parashkruar 1018 lëndë, në vitin 2014 janë parashkruar 1740 lëndë, në 6 mujorin e parë të vitit 2015 janë parashkruar 1100 lëndë. Këto shifra janë të gjykatave. Nuk ka çka kërkon nëpër emisione televizive kur nuk ki çka tregon pa rezultate. Ky kryetar përzihet edhe tek punët e gjykatësve, madje edhe punëtorët janë nën presion, por, nuk fitohet autoriteti me forcë”, theksoi ai.
Kryeprokurori i Prokurorisë Themelore në Prishtinë, Ymer Beka, ka bërë një krahasim në lidhje me aktakuzat e vendorëve dhe ato të EULEX-it, duke thënë se aktakuzat e vendosurve janë më të mira.
“Për aferën e marrjes së kreditit në një bankë, vlera e së cilës është 1.7 milionë euro, gjykata ka vendos një masë dhe barra e vendosjes i mbetet gjykatës. Prokurorja nuk ka parashtruar ankesë. Gjykata merr përgjegjësi e jo ne”, ka thënë Beka.
Në fund, Kryeprokurori i Prokurorisë Themelore në Prishtinë, Ymer Beka, ka bërë me dije se janë duke u hetuar 60 këngëtarë për shmangie të tatimit.
“Janë persona që i shihni në media, këngëtarë të njohur, dhe puna po ecën mirë dhe shumë këngëtarë kanë pranuar të bashkëpunojnë me prokurorinë”, ka theksuar Kryeprokurori i Prokurorisë Themelore në Prishtinë, Ymer Beka
.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31