Faleminderit Kosovë! Faleminderit Toni Blerët e vegjël të Kosovës

nga **Agim Gashi** Fri Jul 09, 2010 10:38 pm

Faleminderit Kosovë! Faleminderit Toni Blerët e vegjël të Kosovës

Ndërsa gjatë një takimi me qytetarët e Kosovës në qendër të Pristinës, pas aktiviteve zyrtare, ish kryeministri britanik pasi ka uruar qytetarët për shtetin e pavarur dhe sovran, tha se nuk është penduar fare për kontributin e tij dhënë për çlirimin e Kosovës 11 vjet më parë. Përkundrazi, ai theksoi se kjo është një mrekulli që i sheh qytetarët e Kosovës të jetojnë në shtetin e tyre të pavarur. "Kur ne u bashkuam në solidaritet para 11 vjetëve kemi bërë atë që ka qenë e drejtë, kemi bërë atë të drejtën. Mua nuk më vjen keq për atë, nuk jam penduar atëherë, nuk jam penduar as sot dhe është e mrekullueshme ta shoh popullin e Kosovës në shtetin e vet", tha Bler. Ndërsa porosit qytetarët se tash Kosovën e pret sfida tjetër, ajo e betejës së paqes, Bler premton se nuk do të mungojë as ndihma e miqve të Kosovës. "Ju keni luftuar shumë për ta krijuar këtë shtet të Kosovës, e tash e keni një betejë tjetër, një betejë të paqes dhe ajo është që ta shohim këtë shtet të pavarur të Kosovës duke pasur një të ardhme evropiane, si pjesë e BE së në të ardhmen, një shtet që plotësisht merret me punët, jo vetëm punët e tij, por me të gjithë punët e botës". Bler tha se kjo është një betejë e paqes, por kjo është edhe e ardhmja e tyre dhe ata që ndihmuan dhe krijuan këtë shtet të Kosovës, "ju siguruan dhe do t'ju ndihmojnë edhe për këtë sfidë", tha Bler. Bler për të gjitha ato që i ka bërë në të kaluarën për Kosovën, falënderon bashkëshorten tij, Çeri, duke thënë se ajo e shtyri që të bëjë gjënë e duhur. Bler përgëzoi të gjithë qytetarët e Kosovës, duke thënë se është një kënaqësi dhe privilegj që ai gjendet në mesin e tyre dhe rikujtoi takimet me shumë prej tyre para 11 vjetëve: "Për gjithë ju këtu, disa prej jush që ju kam takuar para 11 vjetëve, disa që kam takuar në kampet e refugjatëve atëherë, është kënaqësia ime, ndjenja, privilegji që të jem me ju këtu sot, për të festuar me ju sot, t'ju uroj sot, dhe t'ju uroj të gjitha të mirat në të ardhmen. Falemnderit Kosovë", është shprehur ish kryeministri Bler. Ndryshe, për ta pritur ish kryeministrit britanik, sot në Prishtinë ishin mbledhur me mijëra qytetarë nga të gjitha viset e Kosovës, të cilët mbanin në dorë flamuj të Kosovës dhe të Britanisë së Madhe, si dhe fotografi të shumta të Toni Blerit. Në mesin e fëmijëve ishin të pranishëm edhe Toniblerët e vegjël, të cilat i uruan mirëseardhje atij duke u prezantuar në gjuhën angleze, po ashtu edhe dy vajzat, të cilat 11 vjet më parë i kishin dhuruar lule.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30