Jeta sekrete e shenjtores Nëna Tereze

nga **Agim Gashi** Tue Aug 24, 2010 10:50 pm

Jeta sekrete e shenjtores Nëna Tereze

"Time": Ekziston një lloj kritike se ju dhe Motrat tuaja jetoni nën një regjim tepër të ashpër, kur është fjala për kushtet e jetesës.
Nënë Tereza: Ne kemi zgjidhur këtë. Ky është ndryshimi midis nesh dhe të varfërve. Kështu ne jemi më afër te varfërve tanë. Si mund të jemi besnikë ndaj tyre në qoftë se bëjmë një lloj tjetër jetese? Në qoftë se ne kemi të gjitha gjërat që mund të blihen me para në këtë botë, atëherë çfarë lidhjeje do të kishim me të varfërit? Çfarë gjuhe do të flisnim me ta? Tani në qoftë se njerëzit thonë se është shumë nxehtë, unë mund t'u them shikoni dhomën time.

"Time": Nxehtë njësoj, apo jo?
Nënë Tereza: Bile edhe më nxehtë, sepse nën dhomën time është kuzhina. Një burrë ka qëndruar këtu si kuzhiner në shtëpinë e fëmijëve. Ai ishte i pasur më përpara, por tani është shumë i varfër. Ka humbur çdo gjë. Ai më tha: "Nënë Tereza, nuk mund ta ha këtë lloj ushqimi". Unë i thashë: "Unë e ha për çdo ditë". Ai më shikoi: "Nëse e ha Ti, edhe Unë do ta ha". Ai u largua jashtëzakonisht i gëzuar. Sikur të mos i kisha thënë të vërtetën ky burrë do të ishte larguar shumë i zemëruar, dhe nuk do ta kishte pranuar kurrë varfërinë. Nuk do ta pranonte kurrë këtë ushqim, sepse ishte mësuar me lloj-lloj ushqimesh të tjera. Kështu i harroi një herë e mirë.

Të varfrit e dinë çka është gëzimi

"Time": Cili ka qënë vendi më i kënaqshëm në jetë që mund të keni vizituar ndonjëherë?
Nënë Tereza: Kalighat. Kur njerëzit vdesin në paqe, në dashuri me Zotin, është diçka shumë e bukur. Kur i sheh njerëzit tanë të varfër të gëzuar së bashku me familjet e tyre, këto janë gjëra shumë të bukura. Të varfërit e vërtetë e dinë çka është gëzimi.

"Time": Disa njerëz mendojnë se është iluzion se të varfërit janë të lumtur, pasi që ata duhet të kenë shtëpi për të jetuar.
Nënë Tereza: Nuk të bën të lumtur vetëm ana materiale. Është diçka më shumë, është një ndjenjë e thellë e paqes në zemër. Janë njësoj kënaqësi. Ky është dallim i madh midis të pasurve dhe të varfërve.

"Time": Ç'mendoni për ata që janë të shtypur?
Nënë Tereza: Gjithmonë do të jetë kështu. Pikërisht për këtë ne duhet të shkëmbejmë me të varfërit gëzim e dashuri.

"Time": A është roli i vetëm i Kishës për t'i bërë ata sa më të lumtur në Krishtin?
Nënë Tereza: Ju dhe Unë, jemi Kisha apo jo? Ne duhet të shkëmbejmë me njerëzit tonë. Vuajtjet janë pasojë e dëshirës për rezerva, pasojë e mosdhënijes dhe mos shkëmbimit. Krishti e ka bërë të qartë. Çka do që të bëni për të pamundurit e bëni për mua. Nëse pranoni një fëmijë keni pranuar mua. Qartë.
"Time": Në qoftë se flet me një udhëheqës politik, i cili mund të bëjë më tepër për popullin e tij, a kërkoni prej tij të bëjë më shumë?
Nënë Tereza: Unë nuk them ashtu. Unë i them ndaje gëzimin me popullin tënd. Ndoshta politikani nuk mund t'i ushqejë ashtu siç bëj Unë. Por, ai duhet ta ketë të qartë në mendjen e tij të nxjerrë ligje e rregullore të përshtatshme për të ndihmuar popullin e tij.

"Time": Është puna ime për t'i bërë politikanët sa më të sinqertë, ndërsa puna juaj është të ndani gëzimin me të varfërit.
Nënë Tereza: Ashtu është. Duhet të jetë për të mirën e popullit e të Zotit. Kjo do të ishte me të vërtetë e frytshme. Një njeri më tha se po i prish njerëzit duke u dhënë peshk për të ngrënë. Duhet t'u japësh grepin për të zënë peshk. Unë iu përgjigja: Njerëzit e mi, nuk mund të ngrihen në këmbë, e jo më të gjuajnë peshk. Pra, Unë do t'u jap peshk për të ngrënë dhe kur të jenë mjaft të fuqishëm, do t'ua dorëzoj ju. Atëherë ju mund t'ua jepni grepin për të peshkuar.

"Time": Murgeshat katolike thonë se ju duhet të shpenzoni më shumë energji që Vatikani të shugurojë gratë për meshtarë.
Nënë Tereza: Kjo punë nuk më përket mua.

"Time": Ç'mendoni për lëvizjet feministe të murgeshave në Perëndim?
Nënë Tereza: Unë mendoj se duhet të jemi më shumë të zëna me Zotin tonë se me të gjitha ato, më shumë me Jezusin dhe proklamatën e Fjalëve të Tij. Ato që mund të japë gruaja nuk mund t'i japë burri. Për këtë arsye Zoti i ka krijuar veças. Murgeshat, gratë, dhe çdo grua. Gruaja është krijuar për të qenë zemra e familjes, zemra e dashurisë. Në qoftë se e humbasim këtë, humbasim çdo gjë. Ato e japin këtë dashuri në familje ose në shërbime dhe për këtë është krijuar gruaja.

Buzëqeshja e madhe

"Time": Bota do të dijë më shumë për ju.
Nënë Tereza: Jo, jo. Ata le të vijnë dhe t'i njohin të varfërit. Unë dua që ata t'i duan të varfërit. Unë dua që ata të bëjnë përpjekje t'i gjejnë të varfërit më së pari në familjet e tyre, t'u sjellin paqe, gëzim e dashuri në familje më së pari.

"Time": Malkolm Mugeridge ka thënë një herë se sikur ju të mos ishit bërë murgeshë dhe sikur të mos kishit zbuluar dashurinë e Krishtit do të kishit qenë një grua shumë e vështirë. A mendoni se është i vërtetë ky pohim?
Nënë Tereza: Nuk e di. Nuk kam kohë të mendoj për këto gjëra.

"Time": Njerëzit që punojnë me ju thonë se ju jeni e pandalueshme. Ju gjithmonë i fitoni ato që kërkoni.
Nënë Tereza: Është e vërtetë. Të gjitha për Krishtin.

"Time": A është problem kjo çështje?
Nënë Tereza: Për shembull, kohët e fundit shkova te një individ i cili nuk më dha çka kisha nevojë. Unë i thashë, Zoti të ndihmoftë dhe vazhdova. Ai më thirri pas dhe më pyeti se çka kisha për të thënë në qoftë se më jepte diçka. Unë iu përgjigja se do t'i jepja "Zoti të bekoftë" dhe një buzëqeshje të madhe. Kaq dhe jo më shumë. Atëherë më thirri dhe më dha çfarë i kisha kërkuar në fillim. Ne duhet të jetojmë thjeshtë, siç thotë Ungjilli.

"Time": Ju njëherë e keni takuar Haile Mariam Mengistu, udhëheqësin e frikshëm komunist dhe ateist të Etiopisë. Ju e keni pyetur atë nëse lutet. Si e morët guximin t'i bëni një pyetje të tillë?
Nënë Tereza: Edhe ai është një ndër fëmijët e Zotit. Kur shkova në Kinë një zyrtar i lart më pyeti: "Çka është komunisti për ju"? Unë iu përgjegja: "Fëmijë i Zotit". Të nesërmen në mëngjes gazetat kineze shkruanin se Nënë Tereza ka thënë që komunistët janë fëmijët e Zotit. Unë isha e lumtur, sepse pas një kohë shumë të gjatë u shkrua emri i Zotit në gazetat e Kinës. Mrekulli.

"Time": A keni pasur frikë ndonjëherë?
Nënë Tereza: Jo. Kam vetëm një frikë. Frikën se mund ta ofendojë Zotin. Të gjithë jemi krijesa njerëzore, kjo është dobësia jonë apo jo? Djalli do të bënte çdo gjë për të na shkatërruar, dhe për të na larguar nga Jezusi.

"Time": Si e shihni djallin në punë?
Nënë Tereza: Kudo. Kur njeriu përpiqet t'i afrohet Zotit, djalli bën çdo përpjekje për t'ia shuar këtë dëshirë. Mëkati hyn kudo dhe në vendet më të mira.

"Time": Cila është frika juaj më e madhe?
Nënë Tereza: Unë i besoj Krishtit dhe nuk kam frikë.

"Time": E cila është pakënaqësia juaj më e madhe?
Nënë Tereza: Unë bëj vullnesën e Zotit, apo jo? Duke bërë vullnesën e Zotit nuk ekziston pakënaqësia.

"Time": Nëse puna juaj dhe jeta shpirtërore bëhen më të lehta me kohën?
Nënë Tereza: Po, sa më afër Jezusit, punojmë më shumë. Sepse e dimë se për kë punojmë dhe me kë punojmë. Kjo është shumë e qartë. Për këtë duhet ta kemi zemrën e pastër për ta parë Zotin.

"Time": Cilat janë planet tuaja për të ardhmen?
Nënë Tereza: Unë kam vetëm një plan në ditë. E djeshmja ka kaluar, e nesërmja akoma nuk ka ardhur. Kemi vetëm të sotmen për ta nderuar Krishtin.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30