Gërvalla: Pavarësia e Kosovës më e rëndësishme sesa “lufta” për pushtet !

nga **Agim Gashi** Fri Oct 08, 2010 10:40 pm

Gërvalla: Pavarësia e Kosovës më e rëndësishme sesa “lufta” për pushtet !
Nefail MALIQI
Hysen Gërvalla, veprimtar i çështjes kombëtare në Zvicër e këshilltar i lartë i liderit të AAK-së Ramush Haradinaj shpreh pikëpamjet e tij për situatën aktuale në Kosovë.
Bota sot: Z. Gërvalla ju si veprimtar në diasporë çfarë mund të na thoni mbi zhvillimet e fundit në Kosovë ?
H.Gërvalla: Me keqardhje shpreh brengën time për atë që po ndodhë sot në Kosovë. Në vend që liderit tanë energjinë ta përqendrojnë në lobime për njohje të reja të shtetit tonë, ne tash duhet të merremi me vetveten se çka thotë e nuk thotë Kushtetuta, apo se kush duhet të jetë president e kush kryeministër ?! Për këtë gjendje politike të krijuar në Kosovë kjo nuk u falet liderëve, as qeverisë, sepse Kosova sot nuk i ka punët bash aq mirë për salltanete politike, ose rokada të posteve e të disa liderëve.
Kosova duhet të ruajë imazhin e vet pas vendimit të GJND-së
Bota sot: Po largimi i papritur i Sejdiut nga kreu i shtetit të Kosovës, mund të ketë pasoja dhe si do të reflektohej në zhvillimet e mëtutjeshme në Kosovë apo jashtë saj ?
H.Gërvalla: Unë mendoj se për Kosovën dhe popullin shqiptar në këto momente vendimtare më me rëndësi është lufta për ruajtjen e shtetit, se sa ruajtja e një posti në parti. Për kaosin e fundit institucional pjesa më e madhe e fajit i bie, pas Qeverisë dhe Kuvendit edhe Sejdiut, aq më tepër kur dihet se ai ka qenë njëri nga përpiluesit e Kushtetutës së Kosovës. Përveç kësaj, askush s' mund të ma mbush mendjen se ai nuk është manipuluar nga Qeveria, Gjykata apo Kuvendi i Kosovës, meqë të gjithë e kanë ditur mirëfilli se presidentit të Kosovës i mundëson vetëm një funksion dhe jo dy. Kurse dikujt, mu tash i ka ra ndërmend, kur Kosova arriti kulminacionin e progresit si atij politik dhe integrimeve në arenën ndërkombëtare, se Presidenti i Kosovës duhet ta lëshojë postin, pse ai qenka “president ilegal”. Nga kjo del se këtu dikush ka manipuluar ose me kushtetutën, ose me Sejdiun. Presidenti Sejdiu dihet se mori votën e popullit për t’i bërë mirë Kosovës, por jo për t'i sjellë Kosovës krizë institucionale. Prandaj, këto lojëra politike janë shumë të rrezikshme sidomos tash, pas vendimit të GJND-së, kur e tërë bota i ka sytë kah Kosova. Një pyetje që më preokupon jo vetëm mua por edhe opinionin e gjerë në Kosovë është se për çfarë arsye presidenti Sejdiu një hap të tillë nuk e ndërmori më herët, nëse vërtetë Kushtetuta e Kosovës nuk po mundësuaka ushtrimin e dy funksioneve, meqë ajo nuk daton nga dje?! Prandaj, kjo krizë institucionale mund të ketë pasoja si në regresin e proceseve në vend, po ashtu edhe në arenën ndërkombëtare, jo vetëm duke humbur imazhin, por edhe duke frenuar njohjet e reja të filluara mbarë.
Bota Sot:: Flitet për zgjedhje të parakohshme në Kosovë. Jeni ju për mbajtjen e tyre dhe kur sipas jush duhet zhvilluar ato ?
H.Gërvalla: Unë jam për mbajtjen e zgjedhjeve , por jo sivjet siç kërkojnë disa, por të fokusohen tani me lobime në arenën ndërkombëtare për njohje, meqë numri i këtyre njohjeve është bllokuar. Për zhbllokimin e këtij numri të njohjeve liderët tanë duhet të lënë anash zënkat, apo luftën për karrige, për poste e për pushtet. Duke luftuar korrupsionin dhe t'i kthehen avancimit të proceseve të vendit tonë që Kosovën ta njohin së paku 100 vende, që pastaj vendit tonë do t'i hapeshin rrugët më lehtë në anëtarësimin e saj në OKB-së, apo në integrime në institucionet tjera ndërkombëtare.
Sa u përket zgjedhjeve të reja është pak herët të flitet, sepse dyshimet, qysh tash u vjen era manipulimeve nga pushtetarët. Ne kemi pritur dhe presim deklarata nga pushtetarët¨ tanë se zgjedhje nuk mund të mbajmë në Kosovë përderisa liderin e AAK-së e kemi në Hagë. Thash për dyshimet për manipulime të zgjedhjeve, sepse këta pushtetarë kur janë në gjendje të shkelin Kushtetutën e vendit, atëherë kush mund të na sigurojë neve se edhe zgjedhjet e ardhshme do të jenë të ndershme dhe serioze ?! Prandaj, edhe zgjedhje të reja po, ato duhet të përgatiten mirë dhe pa manipulime, sepse këta liderë aktual e treguan veten duke e shndërruar Kosovën në një poligon korrupsioni dhe kaos politik. Prandaj, po the edhe njëherë se pa prezencën e liderit të Aleancës, zotëri Haradinajt, që shpresojmë se së shpejti do të gjendet në Prishtinë, nuk duhet organizuar kurrfarë zgjedhjes. Ndryshe pa praninë e tij, ato janë ilegale, sepse diskriminohet një numër i madh i elektoratit të qytetarëve në Kosovë.
Dialogu i kërkuar nga Serbia, strategji e Beogradit për ta futur në lojë BE-në
Bota Sot: Dhe në fund zoti Gërvalla, çfarë mendoni ju për dialogun mes Prishtinës dhe Beogradit që po flitet ditëve të fundit?
H Gërvalla: Siç e dini dialogu shërben si masë preventive për evitimin e një lufte, për parandalimin e krimeve dhe masakrave, për parandalimin e gjenocidit dhe spastrime etnike në një mjedis. Por, Kosova, populli ynë të gjitha këto i ka përjetuar siç e dinë mirë edhe zyrtarët e NATO-s për të cilën politikë shfarosëse edhe intervenuan ushtarakisht, për çka populli ynë është mirënjohës. Dhe tash për çfarë mund të flasin këtu ? Serbia dhe Kosova, përveç aspektit turistik, për çfarë mund të flasin më? Bile politikanët serbë në Kosovë po hyjnë sa herë po duan, sa herë po iu teket.! Pra, dialogu i kërkuar vazhdimisht nga Serbia është edhe një strategji e Beogradit për ta futur në lojë BE-në, gjoja për dialog me qëllim të ngadalësimit të njohjeve të reja dhe integrimeve të Kosovës në instancat ndërkombëtare, siç u përpoq me kërkesën pranë GJND-së, por pësoi disfatë.,,

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30