LDK, ofertë vetëm për Ukë Rugovën

nga **Agim Gashi** Tue Nov 09, 2010 10:01 pm

(Foto: Atdhe Mulla)

LDK, ofertë vetëm për Ukë Rugovën

Nga Express më 09 nëntor 2010 në ora 13:51

(E plotësuar) Këshilli Qendror i Lidhjes Demokratike të Kosovës ka miratuar sot listën e kandidatëve për deputetë për zgjedhjet e 12 dhjetorit. Lista kryesohet nga kryetari Isa Mustafa, ndërkaq janë lënë edhe tetë vende të zbrazëta për disa personalitete që mendohet të përfshihen. Një ofertë e veçantë i është bërë dhe Ukë Rugovës, por jo edhe anëtarëve të tjerë të Listës Ibrahim Rugova.

Lidhja Demokratike e Kosovës ka hartuar listën e kandidatëve për deputetë, me të cilën do të garojë në zgjedhjet parlamentare të 12 dhjetorit. Kjo listë ka edhe tetë vende të zbrazëta dhe pritet të plotësohet.

Kryetari i LDK-së, Isa Mustafa, tha se këto tetë vende do të plotësohen me emrat që mund ta freskojnë listën.

Ai konfirmoi se edhe Ukë Rugova, djali i presidentit të ndjerë, Ibrahim Rugova, e ka vendin në listën e kandidatëve për deputetë, nëse ai pranon.

Por, një ofertë të tillë, Mustafa nuk ua ka ofruar edhe anëtarëve të tjerë të Listës Ibrahim Rugova, ku përfshihen Bujar Bukoshi, Astrit Haraqija e personalitete të tjera që kanë aplikuar në Komisionin Qendror Zgjedhor si listë e pavarur nga ajo e LDK-së, në garën për zgjedhjet e 12 dhjetorit.

“Ne e kemi gatishmërinë tonë si këshill qendror dhe kryesi që zotin Ukë Rugova ta përfshijmë në listën tonë, në qoftë se ai dëshiron të hyjë në listën e LDK-së dhe të konkurrojë për deputet. Do të thotë, kjo është oferta që i është ofruar sot nga Këshilli Qendror i LDK-së dhe kryesia e partisë”, tha Mustafa, siç transmeton Evropa e Lirë.

Eqrem Kryeziu në Kryesi të LDK’së
Një ditë pasi kishte refuzuar të hyjë në Kryesi të LDK’së me arsyetimin se është lodhur duke mbajtur “Kryqin e kalvarit” dhe se po kërkon një pushim, Eqrem Kryeziu sot ka ndërruar mendje. Ai është anëtar i Kryesisë së re të LDK’së.

Përveç Kryeziut, anëtar i Kryesisë së re të LDK’së është zgjedhur edhe ish-Ministri i Tregtisë dhe Industrisë, Lutfi Zharku, i cili po ashtu ka qenë në kryesinë e kaluar të partisë.

Me Kryeziun dhe Zharkun, në ekipin e kryetarit Isa Mustafa tani janë dhjetë anëtarë nga përbërja e kaluar e Kryesisë së LDK’së.

Edhe në mbledhjen e sotme të Këshillit të Përgjithshëm të LDK’së ka pasur pakënaqësi. Kësaj here mbledhjen e ka lëshuar Sali Asllani kryetar i Degës së Suharekës, i cili nuk pajtohet me përfaqësimit e kësaj komune në listën e kandidatëve për deputetë.

Protestë para LDK’së
Rreth 40 persona nga Prizreni kanë protestuar sot para LDK’së duke kërkuar përfshirjen e Xhavit Ukaj në listën për deputetë. Sipas tyre, Ukaj është hequr nga lista për deputetë nga ana e Eqrem Kryeziut, ka njoftuar portali “Telegrafi”.

Protestuesit kërkuan nga kryetari i ri i LDK-së Isa Mustafa që ky person të kthehet në listë, dhe pas një takimi që Ukaj pati me Mustafën u vendos që i fundit të rikthehet në listën e deputetëve të LDK-për zgjedhjet e ardhshme.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30