Engjëll Koliqi: Në Lecco të Lombardisë, shqiptarët bujshëm kremtuan Ditën e Flamurit

nga **Agim Gashi** Sun Dec 05, 2010 4:02 am

O sa mirë me qenë shqiptar, këndonin të gjithë gjatë kremtimit

Në Lecco të Lombardisë, në fundjavën e kaluar, shqiptarët bujshëm kremtuan Ditën e Flamurit – të Pavarësisë dhe të Çlirimit të Shqipërisë:

O SA MIRË ME QENË SHQIPTAR

Manifestim shumë i bukur festiv u organizua në sallën famullitare të oratorios, në Malgrate të Lecco-s, nga shoqatat “Sofra Shqiptare” dhe “Dardania”, ku kremtuan, kënduan e vallëzuan qindëra shqiptarë të të gjitha trojeve tona etnike. I ftuar special ishte shkrimtari e shkencëtari i mirënjohur shqiptar Dr Zef Mulaj (doktor i farmaceutikës), nga Ankona, i cili u nderua me pllakatën speciale – anëtar nderi i shoqatës “Sofra Shqiptare”.

Shkruan: Engjëll KOLIQI

Garlate (Lecco), 29 nëntor 2010

Shqiptarët me banim në Lecco e rrethinë, të shtunën në mbrëmje, bujshëm e denjësisht kremtuan festën kombëtare – Ditën e Flamurit, të Pavarësisë dhe të Çlirimit të Shqipërisë. Në kremten madhështore që u zhvillua në sallën e oratorios famullitare të Malgrate-s, u inkorporua edhe Dita e paraqitjes së parë publike të UÇK-së dhe Ditëlindja e Heroit Legjendar – Adem Jashari.

Ishin mbledhur në Malgrate qindëra shqiptarë me banim në Lecco e rrethinë, por edhe të ardhur nga Bergamo, Brescia, Milano, Firenze, Ankona etj. Kremtonin këtu bashkë, shqiptarë nga Tropoja, nga Korça, nga Shkodra, nga Stublla e Kosovës, nga Prishtina, nga Ferizaji, nga Gostivari, nga Prizreni, nga Tirana, nga Vlora, nga Durrësi, nga Presheva e nga vende të tjera. Programin festiv e ka shpallur të hapur dhe e ka udhëhequr deri në fund, kryetari i shoqatës “Sofra Shqiptare” – Ndue Qokaj, ndërsa të pranishmit i kanë përshëndetur edhe drejtuesit e shoqatës “Dardania” – Kastriot Pjetërnikaj e Paulin Kolndreu. Përshëndetje dhe emocione të këndshme kanë sjellur edhe bashkëkombasë të tjerë të moshuar e sidomos të pranishmit i ka emocionuar përshëndetja e një të moshuari nga Frashëri (vendlindja e Abdylit, Naimit, Samiut).

Shkëlqimi i kësaj feste, që ngazëllei të gjithë të pranishmit, ishte ardhja nga Ankona dhe prania e shencëtarit dhe shkrimtarit shembullor – Dr Zef Mulaj, i cili ka mbaruar fakultetin e farmaceutikës në Tiranë, ndërkaq ka doktroruar po në farmaceutikë, në Itali. U bë edhe prezantimi i librave të tij poetikë e sidomos i librit shkencor “880 bimë mjekësore në Alpet e Shqipërisë”, që siç thotë edhe mjeku i famshëm kirurg italian e docent universitar dhe ekspert ndërkombëtar i farmakologjisë dhe i mjekësisë natyrore – Prof. Dr Lamberto Re, në parathënien e këtij libri “është kënaqësi e veçantë ta vlerësosh këtë vepër”. Dhe, me plot të drejtë, shoqata “Sofra Shqiptare” i kishte përgatitur Dr Zefit një pllakë speciale, me të cilën e kishte shpallur anëtar nderi i kësaj shoqate. Me dëshirën e kryesisë së shoqatës, pllakën Dr Zefit ia dërëzoi autori i këtij reportazhi – Engjëll Koliqi.

Do të ishte mëkat i madh po të mos e theksonim se muzika ishte shumë e bukur dhe e këndshme – tipike shqiptare, popullore e folklorike dhe kryesisht me motive patriotike, por nuk mungonin as motivet lirike, potpuritë dhe vallëzimet e këndshme nga mysafirët. Për ssa i përket muzikës, sidomos duhet falënderuar këngëtaren atshmë shumë të njohur dhe te dashur ndër shqiptarët e këtushëm – Znj. Majlinda Kapedani, pastaj rapsodi shumë i këndshëm – i mirënjohuri Gjergj Kaza, vëllezërit Pjetri nga Kosova etj. Shpesh ndodhte që në valle e gëzuara të jenë nga disa dhjetëra mysafirë përnjëherësh – burra e gra, pleq e të rinj, edhe fëmijë.

Kremtja dukej edhe më madhështore, kur të pranishmit po shijonin specialitete nga kuzhina shqiptare.

Në fund s’na mbetet tjetër, veçse të falënderojmë nga zemra drejtuesit e shoqatave “Sofra Shqiptare” dhe “Dardania” që na e mundësuan këtë takim kaq të këndshëm dhe na e kënaqën zemrën me kujtime te traditave tona të shenjta. Kremtja që kishte filluar para orës 19, u mbyll në orët e pasmesnatës dhe të pranishmit u shpërndanë me urimin që sa më parë, të gjitha kremtet të mund t’i kremtojmë në vendin tonë të shenjtë – në tokën e shqiponjave!

Gëzuar!