Sabit RRUSTEMI:I PAMBROJTUR DËSHMOJ

nga **Agim Gashi** Fri Feb 04, 2011 1:14 pm

Sabit RRUSTEMI

I PAMBROJTUR DËSHMOJ

Nuk e dua Karla del Ponten
Ka frizurë fallse

Ma sillni një rriskë marti-ni
Ta shterrë me fund
Për Shtëpinë e Verdhë
Një dëshmi kam dhe unë

Ishte Pranverë Tetëdhjetë e Një
Sapo kishim shkrirë një dimër
Stina e re mugulloi me dimër të ri

Aty në Breg Dielli
Një Shtëpi e Verdhë
Lëshonte kobra helmues
Mbi Pëllumba të rinj

Ua them dhe datën dhe vendin
Njëzetegjashtë Mars Tetëdhjetë e Një
Qyteza Studenti në Prishtinë

Atëkohë Haga s’ na shihte me sy
Një mur ndante dhe Brukselin
Nga mua nga ty

Ma sill dhe një martini
Atë frizurë alla del ponte
S’dua ta shoh

Në burgun e Prishtinës
Me njërin nga kobrat e asaj shpie
Kemi qenë pjesë e një dhome
Një çatie

Njëzetetri ditë rreshtë
Sytë s’ ia kam ndarë
As m’i ka ndarë

Në ditën e njëzetekatërt
Deli Kobrashiqit ia zgjidhën duart

Me urdhër prej lart
Mes rreshtas iu tha
I lirë je sall helmo

Ajo e Verdha Shtëpi
Ende aty është

Deri në të nëntëdhjetenëntin vit
Na therri sysh
Zemrave tona u katrris

Dëshmi keni një det lotsh
Prej tonave nëna
Dhe një mal të prerë gërshetash
Nëpër porta pritjesh
Me sy motrash
Dashurish të shterrura

Ç’ doni më shumë

Shtëpia këtu është
Gjejini vetëm kobrat
Unë vij

I pambrojtur dëshmoj

Dhe dy martyni
I pijë me fund

Sall ta flakë tutje këtë Ithatë
Që m’është mbështjellur fundit të barkut
Si kobër

E të fleji shlirë në timen votër

(5 janar 2011)

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30