McGuffie: Raportimi i mediave i pasaktë

nga **Agim Gashi** Wed Mar 02, 2011 8:25 pm

McGuffie: Raportimi i mediave i pasaktë

Zyra e Përfaqësuesit Civil Ndërkombëtar nëpërmjet një deklarate për media ka mohuar të ketë bërë presion në Gjykatën Kushtetuese të Kosovës lidhur me rastin e zgjedhjes së presidentit, duke thënë se KMDLNJ është keqinformuar nga raportimi i pasaktë i mediave.

Në deklaratën e lëshuar në emër të zëdhënësit të ICO-së, Andy McGuffie thuhet se me interes është lexuar deklarata e KMDLNJ-së për shtyp të ditës së djeshme në lidhje me komentet e Përfaqësuesit Civil Ndërkombëtar sa i përket kërkesës që do të bëhet që Gjykata Kushtetuese lidhur me kushtetutshmërinë e votimit të presidentit dhe të Qeverisë së Kosovës.

Ai pretendon se fjalët që KMDLNJ, përkatësisht mediat vendore e rajonale ia atribuojnë ICO-së nuk janë të sakta, ndërsa jep prononcimin e plotë dhe të vetëm në një konferencë shtypi të dhënë nga Piter Feith më 28 shkurt.

“Pyetja ka qenë; Z. Feith a konsideroni se ka pasur parregullsi në zgjedhjen e Presidentit të Kosovës? ICR: Jo. Mirëpo nëse do të ketë ndonjë ankesë pranë Gjykatës Kushtetuese, atëherë varet nga Gjykata Kushtetuese që të marrë një qëndrim në lidhje me këtë”, sqaron Andy McGuffie.

Madje, ai shton se i vjen keq që KMDLNJ është keqinformuar nga raportimi i pasaktë i mediave.

Megjithatë, McGuffie duke iu adresuar KMDLNJ-së shprehet i sigurt se edhe ky institucion pajtohet që me këtë koment ICR-ja, derisa shpreh një pikëpamje aty për aty, ka po ashtu kujdes të nënvizojë rëndësinë e respektimit të plotë të vendimit eventual të Gjykatës Kushtetuese të Republikës së Kosovës.

“Sa i përket kësaj të fundit, duket se organizatat tona përkatëse ndajnë të njëjtin qëndrim”, thotë në deklaratën e tij Andy McGuffie.

Ndryshe dje, Këshilli për Mbrojtjen e të Drejtave e të Lirive të Njeriut ka shprehur shqetësimin mbi tendencën për të bërë presion mbi Gjykatën Kushtetuese të Kosovës, në kohën kur kërkohet pavarësia e gjyqësorit.

Një tendencë e tillë, sipas këtij këshilli, posaçërisht vërehet në prononcimet publike të zyrtarëve të lartë ndërkombëtarë në Kosovë, përkatësisht të z. Piter Feith, i cili në një deklarim për media thotë se: ‘Konsideroj se nuk ka pasur shkelje të Kushtetutës së Kosovës gjatë zgjedhjes së Presidentit...’apo ‘jo absolutisht nuk është shkelur Kushtetuta”.

“Një deklaratë tillë bie ndesh me pozicionin e z. Feith si shef i zyrës së ICO dhe përfaqësues i BE për Kosovën”, është thënë në reagimin e KMDLNJ-së.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30