Sabit Rrustemi: Si nuk u mërzita prej teje, aspak

nga **Agim Gashi** Mon Mar 07, 2011 4:25 am

Sabit Rrustemi

SI NUK U MËRZITA PREJ TEJE, ASPAK

PO MUNGOVE DHE TI

Aty ku nuk ka lumë

Mos kërko freski

Ku s'ka mal

Mos prit puhi

Me shtëpinë buzë rruge

Nuk ke qetësi

Po mungove dhe Ti

S'ka as dashuri

23.07.2009

PUHI MBRËMJEJE

Mbrëmja vjen

Me pjesën tjetër të ditës .

Dhe flokët tu

Mbi fytyrën time

Si puhi flladitëse

(30.07.2009)

MIDIS VERE

Ende nuk e zura mes duarsh

Atë Maje

Mbeta e treta

Duke e parë

Vetëm nga larg

E duke u përbetuar

Do nisem n’mot

Për tim zot.

(2.08.2009)

POROSI

Kurseni të dashurat fjalë

Po u hatruan

S’mjaftojnë as njëmijëenjë fjalë

Për t’i pajtuar

(3.08.2009)

LUTJE

Natë e mirë

Na mbyll gojën

Sa jemi në gjumë

4.08.2009

PAQJA IME

Paqja ime

Fshihet shtigjeve të Çepurit

Dhe syve T’u

Thellë diku

Sa tek ai sa tek ti

Paqen time s’ e gjej asesi

(9.08.2009)

LEXIMI I HËNËS SË RE

Kur e pashë Hënën e Re

Thashë

Pa u bë e plotë

Nuk ka shi

Nuk më besuan

Që lexova nga larg

Shenjat në fytyrën e saj

Majevetullat e ngritura

Thik

Tek luteshin pa pushim

Qeshën

E më përqeshën

Ndërkohë ditët ecën

Nëpër vapë e kaltërsi

Pa asnjë Pikë Shi

As për dashuri.

Kur u mbushë Hëna

N'Pesëmbdhjetën ditë

U mbarsën retë

Ra shi e shi

Tokës së etur gjithandej

Paqe mbolli

Dhe Ty të solli

Mbi qiellin tim

Fytyrëpogaqeje

(11.08.2009)

BILETA QË DIGJEN

Ç’fat i pashkruar

Ëndrrat e natës

Nuk ikin me mëngjes

Biletat e tyre

shpesh na digjen nëpër bebëza

(19.08.2009)

PËRJETËSIA

Ëndërr e përkohshme

Është jeta

.

Në momentin që nxinet

Kjo ëndërr

Fitohet përjetësia

(19.08.2009)

NGJASHMËRI

Grishëse është mbrëmja

Përgjatë detit

Po qe dhe krejt vetëm

Kur i sheh ato dallgë

Të të vijnë valë - valë

Se si ëndërron

Mbështjellur me to

Dhe atë nimfë

Valët sa afrohen e tërhiqen

Në ëndërra të reja mblidhen

E kthehen

Në pritje harron që je vetëm

Ngjashëm dhe këtu rrëzë Çepurit

Ndez ëndërrat puhi e malit

Po ajo Orë

Humb diku shtegut t’kroit

Si vetë mbrëmja syve t’ mi

(19.08.2009)

PJESA TJETËR

Me ag

Fillon vetëm njëra pjesë e ditës

Pjesa tjetër nuk përmbyllet pa ty

(20.08.2009)

HATRI I NJË DASHURIE

Deti nuk perplaset në mua

Mes nesh ka male e male

Nuk e trazoj atë krua

Ku pijnë ujë buzët tua

Rri këtu ku jam

Buzë mali

E deti atje në fushëgropë

Sall trupi yt

Dridhet e përdridhet në mes

Lidh një det e një varg me male

Hatri një dashurie

(20.08.2009)

BRAKTISE PËRPAK

Braktise përpak

Atë vapë betoni

Rrëzë Çepurit

Po shtrihet çasti flladitës

I mbrëmjes

Puhia e malit

S'ka se si na ikën

Përmes gjethesh

Erëlehtën përpushim

Një serenatë zogjsh tek pemët

Tutje dritares grishim

E nuk vonon as hëna

Tek ajo maje mali

(21.08.2009)

PO FJALËT

Mesnata nxjerr në skenë pastruesit

Me krejt aletet

Rrugët lahen prej njollave

Pështymave

Prej mbetjeve

Që la dita

Po fjalët

Kush na i pastron fjalët

Ëndrrat e liga të natës

(22.08.2009)

MELODI E ETUR

Dita e parë e javës

Me peisazhin e fshehur të Hënës

E pritjen e pasosur të Vashës

Mbështillet fundit të lëmës

Në melodinë e etur të këngës

As përpushja ime

Nën qiellin me re

Heshtjen e saj

Nuk e kthen në shi

Dashurisë i mbet veç hiri

Tek ato rrënjë bliri

Pas një gjethi

Rrah flatrat kolibri

(24.08.2009)

MËKATESH S’U KTHELLËM

Me orë e orë

Nata u la nën rrëketë e shiut

Ih sa ujë i turbullt rrodhi

Nga mëkatet tona

Të vogla ishin përrockat e shpirtit

Ai lumë zemre

Për ta mbajtur brenda vetes

Atë vërshimë

U deshën dhe rrugët

Dhe krejt hapësira rreth nesh

Dhe i madhi shesh

U desh

Për t'u shpërlarë mëkatesh

U zbrazën krejt retë

U shterrën për pikë

Mëkatesh ende s’u kthejllëm

mbi/ për t'u kthyer sërish të paqtë/ të freskët/ nëpër qeniet tona/ deri te kjo ditë e re/ dashuri.

(25.08.2009)

JAM ATY

Jam Aty

Ku mbinë Ti

Lëshon shtat e aromë

Përmes gjethesh

Petalesh

Dhe frut te ri

Shije e bukuri

Jam aty

Ku një botë ngazëllen

Me dashuri

(27.08.2009)

LEGJENDË E HESHTUR

Një legjendë e fshehur

E harruar është Çepuri

Mes dy lumenjsh njomë buzët

Lanë faqet

E trupin me një rigë shi

Flokët i krehë e shkrehë

Për dritë të hëne

Rrobat i thahen

Me një paradite dielli

Vetëm hijes ngrinë dimrit

Nuk lëshon gjëmë

As ofshanë

Kur ngusht e nxënë

Përmes gjethesh shushurinë

Qanë e k'non si shpend mali

Kur e shkundë jugu

Ushton prej malli

Për atë Zanë fushe

Që s'ju bë Orë mali.

(28.08.2009)

MË MJAFTON

Ecjeve të mia

Shpesh zura në thua

Më vonuan plagët

Nuk arrita ku dua

Pa strehë nuk mbeta

E një cung nën kokë

Dhe të gjyshit tokë

Ai që isha prapë jam

Më mjafton dhe kjo që kam

28.08.2009

RETË

Enden qiellit tim

Mbi kokën time

Enden e s'ndalen

As hiqen as zbrazen

Më mbajnë me fytyrë kah to

Me dro

Nëpër një mal vetëtimash

Bubullimash

Zot o zot

Do shuajnë etjen tonë përngadalë

Apo do i vërshojnë qeniet tona

Ec e dije

Mbi kokën time

Qiellit tim

Ato endjen s'e ndalin

Një rrebesh shiu

Mbi buzëçarat e dheut

Shprazin

ës në këtë fundverë dhe tuat flokë të shkunden mbi mua njëherë

(30.08.2009)

PASDITJA E ETUR

Pasdijta e vrantë

Mbi qytetin tim

Nuk sjell shi

As puhi

As edhe ty

Si ngushëllim i syve t’mi

Kjo pasdite

Vetëm shton etje

Ngadalë ikën pa një buzëqeshje

31.08.2009

LE TË BIE SHI

Le të bie shi

Me erë e furi

Le të bie

Vetëm le të bie

Oh

Po si të mos bie

Kur e dëshirojmë

Rrëmbyeshëm

Le të vërshojë

Buzëve shkrum

Le ta flakë dhe këtë mëri

Që struket plasave të pritjes

Tej detit të zi

Se pas shiut

Shfaqesh Ti hënë e plotë

Në qiellin e syve të mi

(2.09.2009)

HIJE IMAZHI

Vjeshta ante portas

Sa nuk ka trokitur

Ajo hënë tash ka zbritur

Përmes gjethesh

Parkut të rilindur

Në Gjakovë

Se si një imazh

I dikurshëm mbrëmjeje

Syve më katrriset

E sa mote kanë ikur

Nën urën e Terzive

Tabakëve

Dhëmbët kanë thyer

Kalldrëmit të Çarshisë së Vjetër

Në pakthim

Si shtrydhjet e ndrydhjet e Pashtrikut

Përvidhem nga ajo majë mali

Për hije t’ hënës

Shtratit të atij lumi

Tek ai stol parku

Ajo vashë fytyrë hëne

Ku ta dish ku ka tretur

Në Parkun e Gjakovës

Hije imazhi ka ngelur

(3.09.2009)

LERMË PAK PËR NESËR

Lermë pak për nesër

Mos më shterrë të tërin

Se si gdhinë ditë e re

Kush të pret Ty

Po i mbylli veç pak këta sy

Ta shijoj atë ëndërr të ëmbël

Që thellë diku

Ma ke ndry

(05.09.2009)

MË MUNGON

Më mungon ai gjeth bliri

Që na solli hije –shi

E përlau para vetes era me furi

Dhe ajo palë floku

Që mbulon tëndin sy

E s'është dora ime aty

Ajo fjalë imja

Që shpëton me pahirë

Dhe Ti për një natë të mirë

E dashur

Kjo largësi

Ka bluar me miliona dashuri

(08.09.2009)

IMJA DASHURI

Imja dashuri

Je Ti

Po

E

Zi

Të hanë të tjerët

A unë

Gjithnjë kam uri

Etja

Ime

Poezi.

Mund të ikë

Unë

Në një tjetër botë

Me një mal të pathëna

Po Ti

Do mbetesh këtu.

Ku mbolla rrënjët tua

E i mbulova me dheun e trupit tim

Imja

Po

E

Zi

Do mbetesh këtu

Me etjen dashuri

(12.09.2009)

STINA QË NUK E SHIJUAM

Ikën dhe një verë

Me vapë

Me shi e stuhi

E një mal kujtimesh

Që fshihen në mua

Tek ty

Stinë e re vjen

Na bën me sy

Përmes yllit të mbrëmjes

Të mëngjesit yll

Shushurinë i blerti pyll

Tek e lëmë në mëshirë të erës

Shtëpisë ia mbyllim derën

Marrim udhë

Ngado që shkojmë

Stinë tjetër kërkojmë

Stinën që nuk e shijuam

Atë ëndërr që na iku

Moj

(22.09.2009)

IMAZH I BRAKTISUR

Shtëpi e rrënuar ish aty

Ajo dardhë ujce vjeshte

Që pikonte nga më e vogla erë

Dhe kopshti i bërë livadh

Ajo arë brije ku rrëshqitnim dikur

Mungonin vetëm njerëzit e sh'pisë

Ata zogj mali

Po jo dhe mbrëmja

Që na m’lonte ngadalë

Tutje

Tek ai sfond qielli

Ai rrisk i ri hëne

Zbriste shpejt pas bjeshkëve

Si hapi yt

(22.09.2009)

BRENDA TEJE

Mos iu tremb këtij mëngjesi

Ëndrrës që posa iku

Prej syve tu

E dashur

Aty

Brenda teje jam

Shtresave të shpirtit

Me dashuri t’i njomë rrënjët

Përjetësisht

(25.09.2009)

MBETA NË ATË STREHË ZEMRE

Gjelbrimi tej dritareve pret e fton

Dhe ai det i kaltërt

Ato valë që vijnë e kthejnë

Po si t’i prekë

Si t’i nxë

T’i shijoj

Si

Kur Ti je larg

Mbeta në atë strehë zemre

Tek ata sy

Në të cilët jam thelluar

E nuk hiqem dot

(26.09.2009)

PIKOI

(variant)

Një diell pogaqeje

Me mbrëmjen pikoi

Në këtë fushë të kaltërt e pambarim.

S'di ishte faqja jote e zjarrtë

Apo ai lot zemre më kërkoi

Tërë natën prita e prita

Deri tek kjo Ditë e re

Ajo fushë e kaltërt

Vezulloi lart

Universit

Skaj më skaj

Përmes dritës sate

E si mos të kthehem kah Ti,

Dashuri

Gjirin tënd kërkoj përsëri

(28.09.2009)

HARRESËN S’DI TA AKTROJ

Nuk mund ta aktroj haresën

Në raport me Ty

Po e Zi

Dash Uri

Vashë Ëdrre

A cilado qofsh Ti

Portën nuk e mbyll as Natën

Dritarja është po aty

Sa stina ka ardhur e ka shkuar

Pa pyetur e trokitur

Sa lule ka rritur mbledhur

Aromë e tyre brenda ka ngelur

Si Ti tashmë

S’pipëtinë

Pazëshëm shfleton dashurinë

A ka nevojë të të thërras

Të këlthas

Kur e di ku je

Si rri

Nuk mund të t’ harroj

Kur lenë ky diell

A shi kur bien

Kur hëna përmes hije pemësh

Tek dritarja vjen

E dashur

Në raport me ty

Harresën s’ di ta aktroj

(29.09.2009)

DERISA PRITJA TË GJUNJËZOHET

Nuk mërzitem në pritje

As vritem prej saj

Duke pritur ardhjen tënde

Kur Ti vonohesh

Nuk shfaqesh

Unë

Mungesën tënde pres

Pres dhe kur endesh

Nëpër të tjerë rreth meje

Endjet tua i mirëpres

Nuk heç dorë nga pritja

As kur mbetem i papërkëdhelur faqesh

I patrokitur dritaresh

Sepse të ndjej dhe në pritje

Ty idhnakja ime

Pritje e papritshme

Gjumë të ëmbël

E zgjim të hershëm

Në pritje

Nuk e gëzoj pritjen

Përmes një ikjeje

Pres

Derisa pritja të gjunjëzohet

Prej pritjes sime

(2.10.2009)

AROMË ËNDËRRE

Nën dritare

Trëndafilja e egër

Zhveshet prej lulesh

Shijimesh

Mbetet vetëm shtat

Peisazh i trishtë

Që dhemb pa zë

Kopshtare e zemrës sime

Zgjohu

Lëviz

Përpush

Rrënjët sëpaku t'ia ruajmë

Qenieve tona

T'i strehojmë

Pa këtë lule

Si do ta ndiejmë

Si do ta shijojmë

Aromën e ëndërrës sonë

2.10.2009

ETJEN FLAKIM

Çepuri lahet nën shi

Lahet e sh'plahet përngadalë

Për timin mall

Nga pluhur erërash

Ditësh me mërzi

Lahet e më merr në gji

Bashkë me Ty

Fshehur thellë

Shtresave të shpirtit

Si ajo pikë uji

Shtresave të gurit.

Zbresim tok Çepurit

Deri tek ajo majë e etur rrënje

Etjen flakim

(3.10.2009)

UNIVERSI I ZEMRËS SIME

Murana reshë

Mblidhen e mbështillen

Mes meje e teje

Murana reshë

Përzihen e enden kot

Mes meje e teje

Të pafuqishme janë

Këto lojëra resh,

Fytyrën tënde

Se' mbulojnë dot

Se këtu e kam

Në universin e zemrës sime

(4.10.2009)

VIJ E T’PËSHPËRIS

Gjumë të ëmbël dashuri

Kudoqofsh

Po pse s'mbyllen këta sy

Hapur rrinë

Të presin Ty.

Merrmë në krah

Në tëndin gji,

Më përkëdhel si puhi

E

Ma vajto njëherë

Sall dhe njëherë

Atë synë e zi

Tek jep shenjë

Për nën lamë

Tek ai bli

E

Lahet me hanë

Floktë i thanë

Me timin zjarr

Ndizem

Sa herë mendoj për ty

Kurrë nu fiket

As kur t’mbulohet

Prej dheut të zi

Vij tek veshi

T’pëshpëris si gjithnjë

Gjumë të ëmbël dashuri

(4.10.2009)

MËLLENJA E TREMBUR

Mëllenjë është

E dashur

Mos u tremb

Nga fushë e zhveshur iku

Në mal u struk

Ku ta dish ç'hoqi atje në rrafsh

Nga kush u tmerrua

Që ik kështu me britmë

Po ti

Mos ke frigë

Ecë e qetë

E plotë

Si Hana në t'pesëmbdhjetë

Mbrëmë e pashë

Qiellit të kthejlltë

Shëndriste si fytyra jote

syve të mi

Mos u tremb

Po u shfaq sërish

(6.10.2009)

QIELLIT TËND

Së njejtës rrugë u ktheva

Me atë imazh hëneje të plotë

Ehoja e zërit tënd

Çante eterin

Butësisht

Dashurisht

Si pëshpërimë mjaltore

Mbrëmjes së kaltërt

Më përfshive qetësisht

Ti vashë a hënë

Qiellit tënd

(6.10.2009)

KJO DASHURIA IME

Kjo dashuria ime

E pafundshme

E pandalshme

Si vetë jeta

S' është krejt dashuri

As poezi

Ka dhe pak mërzi

Pak mëri

E ku ta di

Nuk jam si krejt tjerët

Kur jepem

jepem i tëri

E dashura ime

Cilado qofsh ti

Vashë a poezi

Pusho një çikëz nga unë

Pusho

Se të lodha me fjalë

Vargjeve lumë

Të lashë pa gjumë

S'do ndahem nga ty

Do të të ndjej gjithnjë

Këtu

Anës tjetër do rri

Shfaqem kur më thërret Ti

(7.10.2009)

FJALË MAGJIE

Le të shkëlqejë kjo ditë

Përditë

Nëpër atë fjalë magjie

Që na drithëron

Kur e shqiptojmë

Oh

Sa kohë na duhet

Për ta thënë atë që ndjejmë

As shekujt nganjëherë

S'e përthekojnë

(10.10.2009)

LUM NDJENJASH

Ky qytet nuk zhvendoset gjetkë

Mësa unë prej asaj strehë zemreje

E dashur

Prej ndjenjash tona

Një lumë dashurie

Shtrat do krijojë

Njerëz e bimë

Gjallesa të mbidheshme

E të nëndheshme

Do freskohen

Nën himnin e ri

Për dashurinë

(11.10.2009)

SHIJA

Asnje varg

S' mund ta përshkruaj

Shijen e një puthjeje

Kësaj mbrëmjeje

Në këtë çast

(12.10.2009)

MËNGJES TETORI NË ÇEPUR

Lulet shijojnë Brymën e Parë

Puthjen rrënqethëse të vjeshtës

Akull e kanë atë trup të blertë

Ato faqe

Nata

Ah nata

Tinëzisht zhveshi qiellin prej reve

E volli nëpër të blertat gjethe

Ky diell mëngjesor

Nuk ngushëllon

As imja dorë

Bryma

Që me natë

Puthi rrejshëm Çepurin

Kur mua

Sapo më kish nxënë

Ai gjumi i parë

(15.10.2009)

E PALËKUNDUR

Ende nuk jam nisur

As zë të kam lëshuar

E Ti pret

E palëkundur

Pret

Si nuk të mposhtën pritjet

A s'ma thua tashti

Dashuri

(17.10.2009)

ACAR FJALËSH

Ftohet moti

Mërdhinë nga fjalët

Nëpër ecejaket

Pas një ëndrreje

Nuk na nxenë as mali

Drutë e prera

Të çara

I ka lagur shiu

Nata na nxë ndaras

E dashur

A na shpëton imagjinata

Ajo përrallë nastradini

Tek ndez koftor në kodër

E dridhet në të pandezurën

Votër

Mbylli veshtë

Sytë

E mbulohu

Me trupin tim deri në mëngjes

E dashur

Acar fjalësh

mërdhinë motin

Mua

Jotja mungesë

(18.10.2009)

PARA TEJE FJALËT ZBEHEN

Se si më kthen në botën time

Tek ajo strehëz

Poezi

Kur më shfaqesh Ti

Oh

Se si ndjehem

Fjalët s'e përshkruajnë

Zbehen

Derisa qenia ime ngazëllehet

Paqtohet

Për të satën herë

Rinohet

E niset kah ti

Je e ku s'je

Poezi

(20.10.2009)

HAJNISHT

Dikush përvidhet kah unë

Hajnisht nëpër dhomat intime të shpirtit

E nuk gjenë asgjë pos dashurisë

Dhe dhimbjes

Ai s’ ka emër

Ka veç thasë të mbushur

Me uri

Ku s’futet kjo pasuri

(23.10.2009)

STREHA E PAPREKUR

Një dorë tinzare

Fshinë mesazhet e mia

Në ballinë

Prekë dhe portretin

S'di ç'kërkon

Ky haker ziliçar

Kur kjo vjeshtë thanë

Dushk e bar

Vetëm në profil ende s'ka hy

Tek ajo strehë e paprekur

Në tëndin sy.

(23.10.2009)

MES PETALE LULESH

Nën ata qerpikë

Mbyllet e nuk zbehet

Dashuria

Përjetshëm shpirtërohet

Nën emrat tanë

Mes petale lulesh

Stinëve

Nëpër kohë

(24.10.2009)

NATA GJUNJËZOHET PARA NDJENJËS

Nëse kjo Natë vie me Ty

Mirë se ardhtë

Po erdhi vetëm

Do ta përzë

Me mbyllje sysh

Përmes ëndrrash

Malin e dashurisë shprush

Hapësirën e shpirtit tim

E të gjej

Nuk lejoj natën

Të tallet me mua

Për tënden mungesë

Imazhin tënd

Kam gravuar syve të mi

Nata gjunjëzohet

Ndjenjat tona e kanë pushtuar

(26.10.2009)

AMA E JETËS NA BEKOI

Nëpër detëra ndjenjash

Thellë jemi zhytur

Fundeve të parekura të shpirtit

E dashur

Nëpër vargojt e zjarrtë të dashurisë

Jemi regjur

S'ka rëndësi më

Në ç'kohë u takuam

U njohëm

A shihemi përditë

A s'shihemi hiç

Ama e jetës

Me nektar lulesh na bekoi

Ngado që të shkojmë

Të vetëm s'jemi

Asnjëherë

Drita e paqtë e shpirtërave të dashuruar

Përjetshëm në qeniet tona

Vend ka zënë.

(31.10.2009)

SI NUK U MËRZITE PREJ MEJE

Mesazhi yt shkyen ajrin

Të ftohtën natë

S'pyet në ra brymë e dytë a e tretë

Hyn dritareve

Para syve të mi

Me shpirtin tënd të ktjelltë

Mëngjesor

Më kthen brenda vetes

Më përkëdhel

Përmes asaj puhie të aromtë

Zërit të ëmbël

Që ngroh

Tërë ditën me ty e në ty

Nuk të braktisa moj

Asnjë çast

Si nuk u mërzite prej meje

Aspak

Aromë e shpirtit tim

(2.11.2009)

PREHJA JOTE JAM PARRESHTUR

Dheu që mbulon e ushqen rrënjët tua

E të njomë me ujë mali

Betohet heshtur

Para teje

Lulja ime

Prehja jote jam parreshtur

Në vazo

Në tokë

Në jetë

Kudo atje ku mbinë...

Ti hapë fletët

Drejton shtatin

N' secilën ditë

Stinëve të jetës

Më ngazëllen

Me tënden aromë

Nateditë

Ditenatë

(5.11.2009)

RRI E QETË

E dashur

Rri e qetë

Secilës ditë

Në çdo çast

Kudoqofsha

Përmes penës

Me ngjyrë zemre

Një varg poezie

Do nis andej ku je

Tek pret ti

Për ta thënë atë magji

Me dy fjalë

Po u vonua ai varg

Po ngeci udhës diku

Ti më ndjej

Më beso

Tjera fjalë më nuk mbaj mend.

Në vend timin

Pëshpëritja vetes ti

Atë magji

Që buron nga unë

Buron nga ti

Imja dashuri

Të dua

(6.11.2009)

NË SECILËN DITË

N'secilën ditë

Kudoqofsha

Përmes penës me ngjyrë zemre

Një varg poezie do nis

Tek pret ti

Për të ta thënë atë magji jete

Me dy fjalë

Po u vonua ai varg

Udhës diku

Ti më ndjej

Më beso

.

Tjera fjalë

Nuk mbaj mend.

Më

Vargu im je ti

Pëshpërite atë magji

Që buron imja dashuri

(7.11.2009)

TEK AJO STINË

Pas premtimeve boshe

Reklamave neveritëse

Nëpër sheshe

Rrugë

Mure

Dhe ekrane

Pas gjithë asaj zhurme

Që na bëri të nemitur

Nuk shoh gjë tjetër

Kësaj dite me diell

Sall fytyrën tënde që ndritë

Rikthehem tek ajo stinë

Tek ajo dashuri që stolis

Fronin e zemrës

17.11.2009

ËSHTË PAK

Një Mëngjes i Mirë

Me aurorë dielli

A një zemër luleje

Nuk mjafton

Është pak

Për një zgjim të ngrohtë

Dashuror

Ti

Dëshiron dhe një puthje

Dhe një përqafim

Dhe një seancë dashurie

Për një ditë tërësisht të mbarë

Ti pret

Pritjen tënde

E dëboj unë

(21.11.2009)

ËMBËLSIRË E ZJARRTË

Çepuri shkrihet nën diell vjeshte
Njësoj si unë tek Ty
Nën atë zjarr dashurie

Zgjate Zot
Këtë Ditë
Mos të na ikë
Pa u kthyer dhe ajo stinë
Ajo Grishëz
Këtu nën çati

Tek buzët
Që ëmbëlsohen me zjarmi

(23.11.2009)

PËRPLOT

Jam plot
Përplot me Ty
Jam

Në secilin ag
Hap krahët
Dritaret
E të përqafoj
Gjirit tim
Të marr

Si këtë ditë të re
Këtë kaltërsi
Që lind e vjen tek unë
Prej syve t’u
Imja dashuri

(26.11.2009)

MAJA E ËNDRRËS

Për t'a prekur Majën e Ëdrrës
Mos ndalo
Ec e mos nxito

Po u mbushe frymë
Nga rrugë e gjatë
Në këmbë
Ecjeve pusho

Mburojë e ëndrrës sate
Bëhu parreshtur

Dhe shigjetat kur të ngulen mishërave
( Se nuk do të kursehesh, jo )
Deri në zemër
Ti ecë
Ecë

Klithma mos lësho
As gjëmë
Se vrëhet ai qiell
Fytyra e saj

Ah

Edhe gjunjaz
Edhe zhagas
T’lumes tokë
Nëpër t’ëmblën baltë
Mos u dorëzo

Kur ta mbërrish atë Maje ëndrre
Për asgjë më
Mos lakmo

Ajo që e deshe përnjëmend
Në zemrën e saj
Të bëri vend

(30.11.2009)

PUTHË ATË ËNDËRR

Nuk dua të të trandë

Fli e dashur
Fli

Aty skaj dritares
Ballkonit
Fli

As rrezja e mëngjesit
Nuk të ngacmon

Është fshehur prapa reve
As era rreth e rrotull kopshtit

Fli
Si ajo lulja në vazo
Fli
E buzëqesh ëmbël
Tek ëndërron...

Vij qetas
Pa të trembur
Për ta puthur
Atë ëndërr të pafund me mua...

(2.12.2009)

LULES QË S’HAPET

Ke lëshuar rrënjë
Thellë shpirtit
Ke prekur
Moj shtatngrehur

Me freskinë e lumit
Njomesh
Me puhinë e mëngjesit
Lahesh

Faqesh sh’ndritë
Universit të pafund
Aurorë

Malit i bëhesh orë
Për t’ ia shprushur atë gji

Një strehë të bukur
Ngritë mbi tëndin sy

Hajde tash
Çile atë zemrën
Aë ëndërr jete
Ta shijoj me fund
Përmes ndjenjës që mrekullon

(4.12.2009)

HAPËSIRË E VIRGJËR

Ti Letër e bardhë
Hapësirë e paqtë
Natyrë e pazhurshme e shpirtit tim

Të falem çdo çast
Të falem përjetësisht
Që po më pranon hapur
Qetësisht
Të tërin
Ashtu si jam
Me krejt këtë dashuri
Këtë zjarr që vlon në gji
E derdhet shrkonjash
Vargjesh në Ty

E nuk rudhesh
Nuk ikën nga unë
Shtrihesh para meje
Me krejt këtë bardhësi
Per timen dashuri.

(11.12.2009)

AJO ...

Ajo LULEZEMËR

Ka lëshuar rrënjë
Nëpër çdo pore
Emër ka bërë

Ajo LULELOÇKË

Çdo çast
Lulëzon për timin sy
Mbushë aromë
Timen jetë

Ajo
Lule e Jetës Sime
Vetë

(13.12.2009)

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30