Çdo gjë që ka të bëj me Qeverinë e Kosovës

Hapen “dyert e mbyllura” të Qeverisë

Ramiz Bojaj, BOTA SOT
Planifikohet programi për qasje elektronike në dokumente zyrtare

Në tryezën: “Korniza normative për qasjen në informacion zyrtar”, organizuar nga Ministria e Shërbimeve Publike MSHP, në bashkëpunim me
asociacionin e gazetarëve profesionistë të Kosovës, (AGPK), është vlerësuar se pavarësisht se qasja në dokumentet zyrtare është parim kushtetues, shoqëria civile dhe qytetarët nuk janë të kënaqur me këtë shërbim. Po ashtu, në debatin e sotëm temë qendrore ishte edhe moszbatimi i akteve ligjore, të cilat shpesh nuk janë përfillur gjatë kërkesave të shoqërisë civile për qasje në dokumente zyrtare.
Në këtë kontekst, ministri i MSHP-së, Arsim Bajrami, theksoi se institucionet qeveritare janë treguar mjaft transparente në raport me qytetarët, mirëpo interesi qytetar nuk ishte treguar edhe aq i madh në këtë aspekt. “Qasja në dokumentet zyrtare është parim kushtetues dhe i lejueshëm për të gjithë, ndërkohë që transparencën e Qeverisë aktuale e quajti si më të mirën në rajon”, theksoi ministri Bajrami, duke shtuar se Qeveria e Kosovës planifikon të krijojë së shpejti qasje elektronike për të gjithë qytetarët në dokumente zyrtare. Ai thotë se duke u bazuar në të drejtën legjitime dhe kushtetuese, qytetarët kanë të drejtë që të kenë qasje në dokumentet zyrtare me përjashtim në rastet specifike ku mund të ndodhin edhe përkufizime.
“Vlen një parim absolut dhe parimi i kufizimit është në favor të transparencës dhe se kufizimet janë përjashtim. Mund të them me modesti se Kosova është mbi mesataren e rajonit sa i përket transparencës dhe qasjes në dokumente zyrtare,”theksoi Bajrami. Ndërkaq, duke u bazuar në këndvështrimin ligjor mbi kornizën normative aktuale dhe ndryshimet e parapara, Besim Kajtazi, drejtor i Departamentit Ligjor në MSHP, theksoi se jo gjithmonë qytetarët mund të kenë qasje në të gjitha dokumentet, mënyra e këtij segmenti është i qartësuar me anë të ligjit.
“Qeveria është angazhuar në hartimin e një udhëzimi, që ka të bëjë me parimet, procedurat dhe shenjat e kualifikimit të dokumenteve zyrtare duke nënkuptuar se në cilat dokumente nuk mund të jenë të qasshme për opinionin publik. Kjo nënkupton ato aspekte që kanë të bëjnë me sigurinë kombëtare, sigurinë publike, jetën private të ligjshme dhe interesa të tjera të ligjshme”, vlerësoi ai.
Shoqëria civile dhe mediat kanë kritikuar institucionet qeveritare për mos transparencë në raport me kërkesat e ndryshme për qasje në dokumente zyrtare. Në këtë kontekst, kreu i AGPK-së, Mentor Shala, theksoi se asociacioni i gazetarëve është ballafaquar me një sërë pakënaqësish të mediave rreth transparencës së treguar nga institucionet në këtë drejtim. Ai thotë se demokracia në një vend matet pikërisht me këtë parim. “Problemet kryesore të cilat i hasin mediat duke përfshirë edhe shoqërinë civile, vijnë nga mos përgjigjja ndaj kërkesave të tyre për të parë një dokument zyrtar”, vlerësoi Shala, duke shtuar se Ligji pavarësisht mangësive nuk paraqet ndonjë problem të madh sa paraqet zbatimi në parim i tij. Së fundi edhe Raporti i programit për asistencë të mediave i Kosovës i mbështetur nga USAID – i tregon se vetëm 15 për qind e kërkesave të mediave për një çështje të tillë kanë përfunduar me sukses. Duke u mbështetur në kërkesa dhe ankesa rreth qasjeve në dokumente zyrtare, zyrtarë të Qeverisë së Kosovës theksojnë se shumë shpejt do të hartohet një strategji e re e cila me automatizëm i mundëson qytetarët që të kenë qasje në dokumentet zyrtare, të cilat janë të lejuara me kodin ligjor.

Thaçi: As ne nuk po shkojmë, as ata të mos vijnë







Shefi i ekzekutivit të vendit, Hashim Thaçi ka dhënë një këshill për zyrtarët serbë që po bëjnë përpjekje për të vizituar Kosovën pa marr leje nga autoritet e kosovës, që mos të vijnë, se do të kthehen.
“Këshilla ime më e mirë është që as ne nuk po shkojmë, as ata të mos vijnë. Kosova është shtet dhe do të kthehen edhe të tjerët”, ka thënë të hënën kryeministri Thaçi.
Këto deklarata të kryeministrit u bënë pas paralajmërimeve të disa zyrtarëve serbë se do ta vizitojnë sot Kosovën, pa kërkuar leje nga autoritete e Kosovës.
Lidhur më këtë çështje, zyrtarët e Policisë së Kosovës kanë deklaruar për Kosovapress, se autoritet policore janë të vendosura që ta respektojnë ligjin, dhe çdo person që tenton të hyjë në Kosovë pa e respektuar ligjshmërinë e vendit, do t’i ndalohet hyrja, kushdo qoftë ai.

Thaci shkarkon sekretaret politike

25.03.2009
Kryeministri Hashim Thaçi shkarkoi tetë ushtrues detyre të sekretarëve të përhershëm me arsyetimin e vënies së ligjshmërisë. Para se t’i merrnin këto pozita, ata kishin qenë këshilltarë politikë të ministrave përkatës.
Opozita vlerëson se kjo është një dëshmi e fortë e politizimit të administratës publike dhe fërkimit mes partive në koalicion.

Kryeministri Hashim Thaçi shkarkoi sot tetë ushtrues të detyrës së sekretarëve të përhershëm, me arsyetimin e shkeljeve ligjore që janë bërë në rastin e emërimin të tyre nga ministrat përkatës.

Duke u bazuar në Udhëzimin Administrativ, Nr. 11/2008, Kryeministri shkarkoi Enver Buçajn (MASHT), Afrim Sylejmanin (MSH), Kadir Hyseini (MMPH), Daut Rudin (MTI), Skënder Ahmetin (MEM), Bashkim Isufin (MEF), Florian Dushin (MD) dhe Bardhyl Jasharin (MPB).

Të gjithë - përpara se të emëroheshin ushtrues të detyrës së sekretarëve të përhershëm - kishin qenë këshilltarë politikë/të politikave tek ministrat.

“Në kuadër të kompetencave kushtetuese, Kryeministri i Qeverisë së Republikës së Kosovës, Hashim Thaçi ka nënshkruar një vendim me të cilin ka shkarkuar nga pozita e ushtruesve të detyrës së sekretarëve të përhershëm, apo të kryeshefave ekzekutiv në Agjencitë Ekzekutive në Qeverinë e Republikës së Kosovës, të cilët kanë qenë të emëruar në këto pozita nga pozita e këshilltarëve politikë”, thuhet në një komunikatë për media të Zyrës së Kryeministrit. (express)

Përgjigjet Qeveria në pyetjet e Deputetëve






Nga Express më 26.03.2009 në ora 11:15

Deputetët e Kuvendit të Kosovës, në seancën plenare janë bërë pyetje, të cilave po iu përgjigjet Kryeministri dhe ministrave të qeverisë së Kosovës.

Pas kësaj pike të rendit të ditës, ligjvënësit do të shqyrtojnë programit të punës së Kuvendit për vitin 2009, dhe më pas do ta shqyrtojnë për herë të parë projektligjin për ndryshimin dhe plotësimin e Ligjit për Rregullatorin e Energjisë.

Në këtë seancë, gjithashtu do të shqyrtohet dhe votohet projektligjit për parandalimin dhe kontrollin e integruar të ndotjes, do të rishqyrtohet ligji për shpronësim, do të shqyrtohen vërejtjet e presidentit në Ligjin për tubimet publike, raporti për mbikëqyrjen e zbatimit të Ligjit për veprimtarinë private në shëndetësi, dhe propozimi i Grupit Parlamentar të LDK-së për zëvendësimin e anëtarit në Komisionin për Arsim, Shkencë, Teknologji, Kulturë, Rini dhe Sport

Thaçi: Këto janë kohë historike për Kosovën!

Lirie Hajdari, BOTA SOT
Qeveria zotohet para donatorëve



Nga konferenca e mbajtur në Prishtinë
Një pjesë e mjeteve të zotuara kanë filluar të implementohen dhe rezultatet e donacioneve tashmë kanë filluar të shihen


Kryeministri Hashim Thaçi, është zotuar para komunitetit të donatorëve se për çdo cent që vjen nga donatorët do të japin llogaridhënie, përderisa ka shprehur përkushtimin e institucioneve të Kosovës për ta modernizuar ekonominë dhe transformuar Kosovën në qendrën më të re të rritjes në Evropë. Në takimin e parë të Forumit të nivelit të lartë të Qeverisë së Republikës së Kosovës dhe Komunitetit të Donatorëve, ku është diskutuar për zhvillimet dhe veprimet që kanë ndodhur që nga Konferenca e Donatorëve për Kosovën, kryeministri Thaçi falënderoi shtetet që kanë mbështetur vendin, duke theksuar se sfidat me të cilat ballafaqohet Kosova dhe nevojat e saj i tejkalojnë kapacitetet financuese të saj, andaj edhe nevojitet ndihmë më e madhe.
Kosova ka nevojë për ndihmën tuaj
“Kosova ka nevojë për ndihmën tuaj teknike, profesionale dhe mbështetje financiare nëse duam të përballemi me sukses me këto sfida. Kriza financiare globale që ka prekur pjesën më të madhe të botës, ka shkaktuar një barrë shtesë për Kosovën, por ne jemi realistë dhe e dimë se shteti ynë i ri nuk është imun nga sëmundja e botës”, tha ai. Kryeministri i ka inkurajuar donatorët që të bashkëpunojnë ngushtë me Agjencinë për koordinimin e zhvillimit dhe integrim evropian, ngase sipas tij formimi i këtij agjencioni do të shërbejë si pikë kryesore kontakti për ministritë e linjës dhe donatorët.
Forumit të nivelit të Lartë, i është drejtuar edhe Lorenc Meredith, shef i njësisë për Kosovën nga Departamenti i Zgjerimit të BE-së, i cili e cilësoi si të arritur themelimin e Agjencisë që koordinon përpjekjet e donatorëve dhe integrimit evropian, që është një hap përpara. Ai ka përgëzuar qeverinë për progresin e arritur gjatë muajve të kaluar që nga shpallja e pavarësisë, me theks të veçantë progresin substancial me miratimin e ligjeve. Z. Meredith inkurajoi kryeministrin që të vazhdojë luftën kundër korrupsionit dhe krimit të organizuar.
Ndërkaq shefi i Komisionit Evropian, Renzo Davidi, shfaqi nevojën për një koordinim më të madh, në mënyrë që të ketë më shumë efikasitet në implementimin e projekteve. Ai tha se është pajtuar me qeverinë për ekzistimin e një softueri të koordinimit për t’i mbajtur në gjurmë të gjitha kontributet.
Qeveria e SHBA-ve, mbështetëse e Kosovës
Edhe përfaqësuesit e FMN-së dhe BB-së, vlerësuan të rëndësishëm këtë takim, ndërkaq shprehën gatishmërinë e tyre për të punuar në partneritet me qeverinë dhe agjencitë tjera.
Ndërkaq përfaqësuesja e USAID-it, Patricia Rader përshëndeti progresin e arritur në Kosovë, duke premtuar se qeveria e SHBA-ve, si një mbështetëse e fortë e Kosovës, që në Konferencën e Donatorëve ka ndarë 400 milionë dollarë, edhe në të ardhmen do të vazhdojë të punojë me qeverinë dhe popullin e Kosovës, sidomos në sektorin e energjisë dhe në mirëqenien sociale. Para të pranishmëve zv.kryeministri Hajredin Kuçi paraqiti një pasqyrë të përgjithshme të donacioneve, duke theksuar se deri më tash kanë filluar të realizohen gati 1/3 e fondeve të zotuara në Konferencën e Donatorëve.
Në takimin e Forumit të Lartë kanë raportuar edhe disa nga ministrat e qeverisë së Kosovës. Përfaqësues nga 37 vende dhe 16 organizata ndërkombëtare pjesëmarrëse në Konferencën e Donatorëve të mbajtur në Bruksel më 11 korrik 2008, kanë dhënë zotime se do ta ndihmojnë Kosovën me 1.2 miliardë euro, për prioritetet e zhvillimit ekonomiko-social të Kosovës të prezantuara në Kornizën Afatmesme të Shpenzimeve (2008-2011).

Kontrabanda nuk ka përkatësi nacionale!

Lirie Hajdari, Bota sot
Në takimin që kryeministri Thaçi ka zhvilluar me drejtorin e Policisë së Kosovës, Sheremet Ahmetin dhe me atë të Doganave, Naim Huruglica, përsëriti qëndrimin e Qeverisë për zero tolerancë ndaj korrupsionit dhe dukurive tjera negative




Kryeministri Thaçi është shprehur optimist se shumë shpejt edhe pikat 1 dhe 31 do të kthehen në funksion, por pa saktësuar se kur do të ndodh kjo. “Atje janë doganat e Kosovës, është territori i Kosovës”, tha kreu i qeverisë.

Prishtinë, 20 prill
Kryeministri Hashim Thaçi u ka dhënë mbështetje drejtuese të Policisë së Kosovës dhe të Doganave për përkushtimin e tyre për të luftuar kontrabandën, krimin e organizuar, korrupsionin dhe dukuritë tjera negative që po ndodhin në Kosovë, sidomos në pjesën veriore. Edhe pse ende nuk është arritur tërësisht të eliminohet fenomeni i quajtur kontrabandë, megjithatë zyrtarë të doganave njoftojnë se në muajt e kaluar është ulur niveli i kontrabandimit në gati 80 për qind. Në takimin që kryeministri Thaçi ka zhvilluar me drejtorin e Policisë së Kosovës, Sheremet Ahmetin dhe me atë të Doganave, Naim Huruglica, përsëriti qëndrimin e Qeverisë dhe institucioneve tjera të Kosovës për zero tolerancë ndaj korrupsionit dhe dukurive tjera negative, ndërkaq theksoi se lufta kundër dukurive negative nuk njeh nacionalitet. Ai premtoi se gjatë kësaj jave qeveria do të procedojë në Kuvend strategjinë Antikorrupsion, Ligjin Antikorrupsion, si dhe Ligjin kundër shpëlarjes së parasë.
“Është inkurajues 6 mujori i fundit në betejën kundër kontrabandës kudo që ajo paraqitet në territorin e Kosovës. Është një betejë jo edhe e lehtë, por nuk është e paarritshme. Jemi zotuar të punojmë me gjithë potencialin në luftimin e këtyre dukurive. Puna e mirë e këtyre dy institucioneve është vlerësim edhe për qeverinë, edhe për shtetin tonë të ri, dhe një forcim i buxhetit të konsoliduar të Kosovës”, tha kryeministri Thaçi.
Kryeministri Thaçi është shprehur optimist se shumë shpejt edhe pikat 1 dhe 31 do të kthehen në funksion, por pa saktësuar se kur do të ndodh kjo. “Atje janë doganat e Kosovës, është territori i Kosovës”, tha kreu i qeverisë.
Drejtori i Doganave, Naim Huruglica, ndërkaq tha se janë shënuar rezultate në luftën kundër korrupsionit, e po ashtu është bërë një luftë të vazhdueshme brenda institucionit për ngritjen e nivelit të përgjegjësisë tek oficerët doganorë. Ai theksoi se ka rënie të kontrabandës prej 80 për qind, që është një tregues i mirë për një punë të jashtëzakonshme që po bëhet nga policia dhe doganat. “Pas shpalljes së pavarësisë dhe djegies së dy pikave kufitare ne u ballafaquam me një problem të madh të rritjes së kontrabandës në veri. Por, e them me kënaqësi se në muajt e kaluar kemi arritur ta ulim atë nivel të kontrabandës”, tha z. Huruglica. Edhe drejtori i Policisë së Kosovës Sheremet Ahmeti, theksoi bashkëpunimin e mirë ndërmjet policisë dhe doganave, gjë e cila sjellë edhe rezultate në uljen e kontrabandimit. Ai tha se është krijuar një grup i veçantë për ta luftuar kontrabandimin në pjesën veriore të vendit, që ka dhënë rezultate të mira deri më tash. “Kemi disa kallëzime penale që kemi bërë. Kemi arrestuar edhe një grup me kontrabandim, dhe si rezultat i asaj ka rënë numri i kontrabandimeve. Por kemi kallëzime penale të ngritura edhe ndaj policëve të vendit. Ne kemi suspenduar dy nga këta policë dhe tre janë duke u udhëhequr procedurat”, tha z. Ahmeti.

Pavarësia krijoi kushte për zhvillim ekonomik






Nga Express më 21.04.2009 në ora 16:23

Pavarësia e Kosovës ka sjellë qartësi dhe stabilitet në rajon të cilat edhe janë parakushte për zhvillim ekonomik të vendit dhe rajonit, tha sot kryeministri Hashim Thaçi, në hapje të Panairit Ndërkombëtar “Ekspokos” në Prishtinë.

Sipas Thaçit, Qeveria e Kosovës inkurajon zhvillimin e bizneseve përmes politikave aktive dhe pakove fiskale dhe duke minimizuar pengesat burokratike, me të cilat është ballafaquar biznesi në të kaluarën.

“Ne kemi zvogëluar barrën tatimore për bizneset në Kosovë duke ulur tatimin në korporata dhe duke ofruar lehtësira të tjera tatimore. Përkushtim i Qeverisë të cilën e drejtoj unë është lufta e pakrompomis ndaj kontrabandës, krimit të organizuar dhe korrupsionit”.

Më tutje kryeministri shtoi se, Qeveria është duke punuar aktivisht për reformimin e sistemit gjyqësor, që është kusht i domosdoshëm i funksionimit të biznesit. Gjithashtu, Qeveria e Kosovës e konsideron biznesin si partner në rrugën e zhvillimit ekonomik të vendit.

Duke folur në hapje të Panairit “Ekspokos”, kreu i Ekzekutivit u shpreh i vetëdijshëm për efektet e krizës financiare globale edhe në Kosovë. “Qeveria e Kosovës është duke e monituar gjendjen me kujdes dhe është e përgatitur të marrë masa në zbutjen e pasojave të saj”.

Anëtarësimi i shpejtë në Fondin Monetar Ndërkombëtar dhe Bankën Botërore, sipas kryeministrit Thaçi, do t’i ofronte Kosovës mbështetje dhe siguri edhe më të madhe për zhvillim ekonomik dhe investime të huaja.

Qeveria “lufton” korrupsionin me ligje!

Lirie Hajdari, BOTA SOT
Miratohet Strategjia dhe Projektligji kundër korrupsionit




Nga mbledhja e Qeverisë
Bordi i Trustit
Qeveria e Kosovës i ka përzgjedhur anëtarët e Bordit të Trustit Pensional të Kosovës, të përbërë nga anëtarë vendorë dhe ndërkombëtarë. Nga përfaqësuesit vendorë janë Besim Beqaj, Ruzhdi Morina dhe Ymer Havolli, ndërkaq tre ndërkombëtarët do të jenë Angela Bërns, Stiv Bates dhe Harvey Richard Kember.
Këshilltarët
Me këtë ligj përcaktohet limiti i numrit të këshilltarëve politikë të Kryeministrit, i cili parasheh që ky numër të jetë 10, ndërsa te ministrat dhe zëvendësministrat 5 këshilltarë. Numri i këshilltarëve për ministrat pa portofol në projektligj është tre, mirëpo është kërkuar që ky numër të ulet në dy.
Kryeministri Hashim Thaçi kërkoi bashkëpunimin e të gjithëve për të jetësuar angazhimin institucional për zero tolerancë ndaj dukurive negative
Numri i këshilltarëve për ministrat pa portofol në projektligj është tre, mirëpo është kërkuar që ky numër të ulet në dy. Ministrat pa portofol kanë të gjitha të drejtat me ministrat e tjerë


Qeveria e Kosovës miratoi të premten Strategjinë e re Kundër Korrupsionit 2009-2011, Projektligjin Kundër Korrupsionit dhe Projektligjin për Qeverinë, duke i cilësuar si çështje të rëndësishme dhe që hapin perspektivë integruese për Kosovën. Kryeministri Hashim Thaçi, kërkoi bashkëpunimin e të gjithëve për të jetësuar angazhimin institucional për zero tolerancë ndaj dukurive negative, ndërsa Strategjinë Kundër Korrupsionit, e cilësoi si të domosdoshme dhe që përputhet me përcaktimin dhe vizionin e qeverisë, moto e së cilës është zero tolerancë në raport me korrupsionin, krimin e organizuar dhe përcaktueshmëri të plotë për sundimin e ligjit.
Po përhapet korrupsioni....
Ministrja e Drejtësisë, Nekibe Kelemendi, duke paraqitur para anëtarëve të kabinetit qeveritar Strategjinë e re Kundër Korrupsionit për periudhën 2009-2011, ka përkujtuar se Strategjia e vjetër nuk është arritur të përmbushet në tërësi për shkak të ekzistimit të mangësive dhe problemeve të shumta në Ligjin kundër korrupsionit. Sipas saj, bazuar në të dhënat për vitin 2007-2008 konstatohet se korrupsioni është i përhapur edhe më tutje dhe kjo dukuri prish imazhin e Kosovës dhe pengon funksionimin e mirëfilltë të institucioneve. Për këtë arsye qeveria në programin e vet ka radhitur si prioritet luftën kundër korrupsionit. “Hartimi i strategjisë së re kundër korrupsionit përfshin në vete ndërmarrjen e të gjitha masave konkrete për tërë infrastrukturën ligjore në funksion të luftimit sa më efikas të kësaj dukurie”, tha ministrja Kelmendi.
Miratimin e Projektligjit Kundër Korrupsionit, ministrja Kelmendi e konsideroi si nevojë imanente për ndryshimin dhe plotësimin e ligjit aktual, në mënyrë që të evitohen gjitha mangësitë. “Përmirësimi dhe plotësimi i ligjit reflekton përmbushjen e objektivit për zero tolerancë ndaj korrupsionit, si një nga kushtet për integrimin në BE. Me këtë projektligj mundësohet mbikëqyrja e punës dhe funksionimit të Agjencisë Kundër Korrupsionit me themelimin e Këshillit Mbikëqyrës të Agjencisë Kundër Korrupsion, thellohet bashkëpunimi ndërmjet AKK-së, qeverisë dhe organizatave qeveritare e joqeveritare”, tha ministrja Kelmendi.
Fundi i rregulloreve të UNMIK-ut
Kabineti qeveritar miratoi edhe projektligjin për Qeverinë e Kosovës, që përcakton qartë organizimin modern dhe funksionimin e plotë të qeverisë, mënyrën e punës dhe procedurat e vendimmarrjes në qeveri, bashkëpunimin ndërmjet qeverisë dhe institucioneve tjera të përcaktuara qartë në Kushtetutën e shtetit të Kosovës dhe aktet tjera nënligjore. Në prezantimin që i bëri këtij Projektligji, ministri i MSHP-së, Arsim Bajrami, tha se Ligji për Qeverinë është ligj organik dhe përmbushje e detyrimit Kushtetues, dhe me këtë po i jepet fund rregulloreve të UNMIK-ut. Ligji merret me mënyrën e funksionimit të qeverisë, me mënyrën e marrjes së vendimeve, rregullon mënyrën e organizmit të strukturave që punojnë për nevojat e kryeministrit, ministrave dhe zv.kryeministrave duke krijuar standarde unike për funksionimin e kabineteve. Me këtë ligj përcaktohet limiti i numrit të këshilltarëve politikë të kryeministrit, i cili parasheh që ky numër të jetë 10, ndërsa te ministrat dhe zëvendësministrat 5 këshilltarë. Numri i këshilltarëve për ministrat pa portofol në projektligj është tre, mirëpo është kërkuar që ky numër të ulet në dy. Ministrat pa portofol kanë të gjitha të drejtat me ministrat e tjerë. Sipas ministrit Bajrami Ligji përkufizon raportet e Qeverisë me Presidencën dhe Kuvendin, përcjell dispozitat kushtetuese, frymën kushtetuese dhe kërkon që qeveria t’i përgjigjet Kuvendit dhe të mbajë kontakte të vazhdueshme me Presidentin. Sa i përket mënyrës së punës, sipas ministrit ligji mundëson mbajtjen e mbledhjeve elektronike, pra të mbledhjeve pa letra dhe MSHP është duke përgatitur projektin për një mbledhje pa letra

Thaçi kthehet me premtime të presidentit Sarkozy

Lirie Hajdari
Vizita në Francë shënon pikën kulminante të marrëdhënieve ndërmjet Kosovës dhe shtetit francez, të mbështetjes së fuqishme të presidentit Sarkozy dhe të Francës për shtetin e pavarur, sovran dhe demokratik, për progresin që kemi arritur në Kosovë.




“Vizita në Francë shënon pikën kulminante të marrëdhënieve ndërmjet Kosovës dhe shtetit francez, të mbështetjes së fuqishme të presidentit Sarkozy dhe të Francës për shtetin e pavarur, sovran dhe demokratik, për progresin që kemi arritur në Kosovë”, tha Thaçi pas kthimit nga Franca.

Prishtinë, 10 qershor
Kryeministri Hashim Thaçi, ka marrë mbështetjen e presidentit Nikolla Sarkozi, se Franca do ta përkrah në vazhdimësi shtetin e Kosovës, si një shtet që ka sjellë më tepër paqe, stabilitet, bashkëpunim rajonal dhe të ardhme evropiane për rajonin.
Kreu i Qeverisë së Republikës së Kosovës, është kthyer pasdite në Prishtinë, pas vizitës disaditëshe zyrtare në Francë, ku kishte takime me krerët më të lartë të shtetit francez, prej të cilëve u rikonfirmua mbështetja për rrugën e konsolidimit demokratik të shtetit të Kosovës. Gjatë vizitës në Francë, kryeministri Thaçi është shoqëruar edhe nga ministri i Punëve të Jashtme të Kosovës, Skënder Hyseni. “Vizita në Francë shënon pikën kulminante të marrëdhënieve ndërmjet Kosovës dhe shtetit francez, të mbështetjes së fuqishme të presidentit Sarkozy dhe të Francës për shtetin e pavarur, sovran dhe demokratik, për progresin që kemi arritur në Kosovë”, tha Thaçi pas kthimit nga Franca.
Kjo ka qenë vizita e parë e kryeministrit të Republikës së Kosovës, Hashim Thaçi në Paris, që pas shpalljes së pavarësisë së Kosovës. Ftesa nga presidenti Sarkozy ka ardhur në kuadër të takimeve të tij me kryeministrat e rajonit të Evropës Juglindore.
Gjatë qëndrimit në Francë, kryeministri Hashim Thaçi ka marrë premtimin e presidentit Nikolla Sarkozi, se Franca do të vazhdojë të jetë prezent në Kosovë në kuptimin ushtarak dhe civil në kuadër të organizatave ndërkombëtare, por edhe në sjelljen e investitorëve në francez në Kosovë. “Në Kosovë është krijuar një klimë e sigurt, e favorshme dhe atraktive për biznesin. Një shtet i ri me mundësi shumë të mëdha, prandaj dua të theksoj se presidenti Sarkozi dhe shteti frnacez do ta përkrahin në vazhdimësi shtetin e Kosovës si një shtet që ka sjellë më tepër paqe, stabilitet dhe bashkëpunim rajonal dhe të ardhme evropiane për rajonin”, tha Thaçi.
Në një paraqitje para gazetarëve në Aeroportin e Prishtinës kryeministri i Kosovës Hashim Thaçi u është përgjigjur edhe disa pyetjeve të gazetarëve lidhur me aktualitetin politik në vend që ishin jashtë kontekstit të vizitës së tij në Francë.
I pyetur se kur do të bëhet gati lista përfundimtare për ambasadorët e ardhshëm të Kosovës dhe a jeni të kënaqur me punën që kanë bërë deri tani të ngarkuarit me punë, kryeministri Thaçi tha se ai konsultohet rregullisht me presidentin dhe se shumë shpejt dhe pas atij konsultimi, besoj se gjërat do të qartësohen. Me rëndësi është se procedura ka shkuar mirë, është në rrugë të mbarë. Kështu që do të respektohet i gjithë procesi dhe do të respektohen procedurat adekuate në përputhshmëri të plotë më kushtetutën dhe ligjin.
Vizita e kryeministrit Hashim Thaçi në Francë ka patur një jehonë të madhe jo vetëm në mediat vendore por edhe në ato franceze.

Gjatë takimit në Francë, kryeministri Thaçi, mori premtime të forta nga homologu Sarkozy, për mbështetjen e Kosovës në sistemin shumëdimensional-ekopolitik.

Thaçi: Shqipëria ka hyrë në një stad të lartë të demokracisë

Kryeministri i Qeverisë së Republikës së Kosovës, Hashim Thaçi, përgëzon kryeministrin e Shqipërisë, Sali Berisha, me rastin e fitores në zgjedhjet e 28 qershorit 2009.




Hashim Thaçi,Kryeministër i Republikës së Kosovës

Në telegramin e urimit thuhet:
I nderuari kryeministër Berisha,
Kemi besim të plotë që Ju do të drejtoni një qeveri të koalicionit në të mirë të të gjithë qytetarëve të Shqipërisë, duke ruajtur unitetin kombëtar dhe stabilitetin e përgjithshëm drejt sukseseve dhe perspektivës euroatlantike të Shqipërisë. Pas anëtarësimit në NATO, Shqipërinë e pret rruga drejt integrimit në BE, dhe kemi bindjen e plotë, që qeveria shqiptare do t’i përmbush të gjitha kriteret për t’u bërë sa më parë pjesë e Bashkimit Evropian, - thuhet në telegramin e urimit të kryeministrit të Republikës së Kosovës, Hashim Thaçi, dërguar kryeministrit të Republikës së Shqipërisë, Sali Berisha, me rastin e fitores në zgjedhjet e 28 qershorit 2009
Kurorëzimi me sukses i Zgjedhjeve të 28 qershorit 2009 ishte fitore e demokracisë shqiptare dhe tregues i kulturës së lartë institucionale që po dëshmon shoqëria shqiptare përgjithësisht.
Qytetarët e Kosovës dhe institucionet e saj, me vëmendje kanë ndjekë të gjitha fazat e fushatës elektorale dhe janë entuziazmuar për nivelin e organizimit, debatin dhe përformancën e shpalosur nga të gjitha subjektet garuese.
Fushata transparente ka bërë që këto zgjedhje të dëshmojnë se Shqipëria ka hyrë në një stad të lartë të demokracisë, gjë që u tregua me dominimin e frymës paqësore, qetësisë dhe respektimit të njëri –tjetrit.
Në zgjedhjet e 28 qershorit doli fitues “Koalicioni për ndryshim”, duke ju dhënë Ju, i nderuar kryeministër, edhe një mandat për ta drejtuar shtetin shqiptar.
Kemi besim të plotë që Ju do të drejtoni një qeveri të koalicionit në të mirë të të gjithë qytetarëve të Shqipërisë, duke ruajtur unitetin kombëtar dhe stabilitetin e përgjithshëm drejt sukseseve dhe perspektivës euroatlantike të Shqipërisë.
Pas anëtarësimit në NATO, Shqipërinë e pret rruga drejt integrimit në BE, dhe kemi bindjen e plotë, që qeveria shqiptare do t’i përmbush të gjitha kriteret për t’u bërë sa më parë pjesë e Bashkimit Evropian.
Në emër të Qeverisë së Republikës së Kosovës dhe në emrin tim, kam nderin dhe kënaqësinë që t’Ju uroj fitoren, duke ju garantuar bashkëpunim të përhershëm me Qeverinë e Kosovës dhe institucionet e saj në të mirë të të dy vendeve, rajonit dhe më gjerë.
Urime!
Hashim Thaçi,
Kryeministër i Qeverisë së Republikës së Kosovës

Thaçi: Shteti i Kosovës faktor paqeje në Ballkan

Bota sot
Thaçi ka përkujtuar se Kosovën e kanë njohur 61 vende dhe ka ftuar vendet tjera të njohin pavarësinë, sepse kështu i kontribuojn paqes dhe stabilitetit të gjithë rajonit.


Para pjesmarrësve të samitit, Thaçi ka thënë se Kosova është shtet demokratik, i lirë dhe multietnik në të cilin të gjithë qytetarët janë të barabartë.

Ditën e dytë të samitit të vendeve të Evropës Juglindore në Kroaci që po mbahet në Dubrovnik ka folur edhe kryeministri i Kosovës Hashim Thaçi. Në fjalën e tij ai ka thënë se qytetarët e Kosovës, pas luftrave në të kaluarën, hedhin posht dhunën dhe akceptojnë paqen dhe stabilitetin.Klima e ngrohtë dhe pamja e bukur e Dubrovnikut është një thesar i vjetër dhe destinim i Evropës dhe vizitorëve evropianë, ndërsa sot vendtakim i mrekullueshëm i iniciativave evropiane, i shpresave të reja dhe ëndrrave të vendeve të bashkuara evropiane, është shprehur Thaçi në fillim të fjalimit të tij, duke shtuar se "Republika e Kosovës është vendi më i ri i këtyre vendeve të bashkuara, të bashkuara për demokraci dhe zhvillim të Evropës Juglindore dhe të tërë Evropës". Ai tha se shfrytëzimi i vlerave dhe parimeve demokratike sigurojnë bazament të qëndrueshëm për të ardhmen e rajonit dhe të kontinentit. Bashkëpunimi dhe uniteti i Bashkimit Evropian, shtoi Thaçi, kanë depërtuar përtej kufijve të shteteve anëtare dhe përhapja e vlerave të BE së ka krijuar perspektivë evropiane si dhe aspirata evropiane për vendet e Evropës Juglindore. Ndërkaq për NATO n tha se ka bërë shumë për paqen në Evropën Juglindore duke i bërë bashkë kombet e lira dhe paqedashëse. NATO ja dhe Bashkimi Evropian kanë stabilizuar Evropën Juglindore, duke krijuar partnerë dhe jo kundërshtarë, theksoi Thaçi. "NATO ja doli në mbrojtje të popullit të Kosovës, popullit që gjeti shpresë dhe ardhmëri në mbështetjen e NATO s për çlirim - popullit gjithmonë mirënjohës ndaj shteteve aleate që respektuan aspiratat e tyre për të ardhmen e lirë", nënvizoi Kryeministri i Kosovës. Në vijim të fjalës së tij Thaçi tha se shumica dërmuese e vendeve të Bashkimit Evropian e kanë mirëpritur pavarësinë e Kosovës, e cila është "një zgjidhje e përhershme dhe e pakthyeshme" që populli i Kosovës e ka arritur, me BE-në, NATO n, SHBA-të. Ndërsa për misionin e BE-së për sundimin e ligjit EULEX, ai tha se po punon së bashku me institucionet e Kosovës dhe se "sundimi i ligjit dhe gjyqësia më e fortë po bëhen gjithnjë e më shumë realitet". "Shoqëria jonë përfaqëson të gjithë qytetarët tanë dhe institucionet tona publike po vazhdojnë të mbështesin zhvillimin e një shoqërie më të lirë dhe më demokratike për të gjithë, me një qasje sensitive për integrimin e të gjitha komuniteteve tona minoritare në shoqëri". Thaçi tha se Kosova deri më tash është e njohur nga 61 shtete, dhe u bëri thirrje të gjitha vendeve që nuk e kanë bërë këtën, ta njohin shtetin e pavarur, demokratik, sovran dhe shoqërinë tonë multietnike të Kosovës. Ai shtoi se "Kosova e pavarur është faktor i stabilitetit në regjionin e Evropës Juglindore" dhe njeherësh theksoi përkushtimin për marrëdhënie fqinjësore me të gjitha vendet në rajonit. Ai u zotua se Qeveria dhe institucionet e Kosovës do të vazhdojnë të miratojnë standardet e BE së dhe do të vazhdojnë të kompletojnë objektivat në përputhje me Planin për Veprim të Kosovës për Partneritet Evropian.

Thaçi:Stabiliteti dhe paqja hapin perspektiva për investime, për zhvillim dhe për të gjitha iniciativat tona të përbashkëta.

Qeveria i jep mbështetje vendimeve të KQZ-së

Lirie Hajdari
Kreu i qeverisë, është zotuar se qeveria do të vazhdojë punën e vet me agjendën e paraparë, e pandikuar nga procesi elektoral.


Kosova me objekt për ambasadë edhe në Gjermani
Pas konsultimeve që kryeministri Thaçi ka zhvilluar me presidentin Sejdiu, dhe pas vendimit të qeverisë për blerjen e objekteve për 4 ambasadat e para të Kosovës, qeveria u pajtua që në vendim të përfshihet blerja e objektit të ambasadës edhe në Republikën Federale të Gjermanisë, duke pasur parasysh kontributin e Gjermanisë për ndërtimin dhe zhvillimin e Kosovës si dhe prezencën e madhe të diasporës në këtë vend.

Qeveria e Kosovës në kuadër të autoritetit dhe përgjegjësive kushtetuese që ka, i ka dhënë mbështetje të plotë Komisionit Qendror të Zgjedhjeve në të gjitha vendimet e saj, ndërsa ka mirëpritur kërkesat dhe nevojat e këtij institucioni, në mënyrë që procesi i zgjedhjeve të jetë në përputhshmëri me standardet e larta demokratike. Duke qenë se zgjedhjet lokale janë të parat që mbahen në Kosovën shtet i pavarur, kreu i ekzekutivit Hashim Thaçi beson se fushata parazgjedhore, por edhe procesi i zgjedhjeve do të zhvillohen sipas standardeve, për të pasur zgjedhje të lira, fer e demokratik, me një pjesëmarrje të të gjitha komuniteteve, e natyrisht duke respektuar edhe rezultatin zgjedhor.
Do të jemi model i organizimit të zgjedhjeve
“Çdo parti politike duhet ta kuptojë se e gjithë bota i ka të drejtuar sytë kah ne, se si ne do t’i organizojmë këto zgjedhje. Kemi përvojën tonë demokratike, prandaj shprehim besimin tonë se do të jemi model i organizimit të zgjedhjeve lokale të nëntorit të këtij viti”, tha ai. Sido që të jetë, Thaçi u zotua se qeveria do të vazhdojë punën e vet me agjendën e paraparë, e pandikuar nga procesi elektoral.
Edhe pse partitë politike opozitare kanë shfaqur pakënaqësitë e tyre me vendimin e marrë nga KQZ-ja për të mos vendosur kamerat nëpër qendra të votimit, shefi i qeverisë është i bindur se i gjithë procesi do të jetë transparentë. “Janë ftuar të gjitha institucionet ndërkombëtare relevante që të vëzhgojnë këtë proces, në mënyrë që Kosova të fitojë vlerësimin meritor në këtë proces të rëndësishëm”, u shpreh ai. Në këtë drejtim, ekzekutivi i ka dhënë mbështetje kërkesës së KQZ-së për ndarjen e shtesave në vlerë prej 200 euro për 70 zyrtarë të këtij institucioni. Kërkesa përfshin periudhën prej 1 korrik deri 31 më dhjetor 2009, kohë kjo që lidhet me përgatitjet dhe organizimin e zgjedhjeve lokale.
Raporti i progresit, udhërrëfyes për institucionet
Kabineti qeveritar miratoi projekt-rregulloren për Agjencinë për Koordinimin e Zhvillimit dhe integrimit evropiane, si një institucion përgjegjës për koordinimin dhe orientimin e veprimeve të qeverisë në çështjet e procesit të integrimit evropian, si dhe planin e veprimit 2009 për implementimin e partneritetit evropian për Kosovën.
Qeveria e Republikës së Kosovës pret që raporti i progresit i Komisionit Evropian për Kosovën do të jetë pozitiv dhe do të hap perspektivë evropiane, por që do të jetë udhërrëfyes për aktivitetet dhe angazhimet e ardhshme jo vetëm të qeverisë, por edhe të institucioneve tjera. Sipas kryeministrit Thaçi, plani i veprimit për partneritet evropian reflekton masat dhe aktivitetet të cilat qeveria do t’i ndërmarrë gjatë periudhës afatshkurtër deri në 2 vjet dhe afatmesme deri në 4 vjet për t’i adresuar sfidat e ngritura nga raporti i progresit për vitin 2008 të Komisionit Evropian. “Kosova paraqet në vetvete një plan shumë të avancuar për thellimin e reformave të brendshme institucionale në të cilat prioritetet e KE-së shërbejnë si rekomandime për identifikimin e sektorëve që duhet përmirësuar gjatë periudhës në vazhdim nga institucionet”, tha kreu i qeverisë.
Ai kërkoi përgjegjësi që në të gjitha segmentet institucionale të thellohen përkushtimet, ndërsa nga ministrat kërkoi që nga afër të përcjellin angazhimet në sektorët e tyre.
Qeveria shqyrtoj edhe rekomandimet për hartimin e programit dhe planit të veprimit të Qeverisë së Kosovës për parandalimin e vetëvrasjeve dhe vetëdëmtimit në Kosovë. Duke e quajtur shqetësues fenomenin e vetëvrasjeve në Kosovë, zëvendëskryeministri Ramë Manaj, tha se statistikat tregojnë se ky fenomen në periudhën e tashme të vitit është 30 për qind më i lartë se vitin e kaluar. Ai kërkoi që qeveria t’i kushtojë vëmendjen dhe të hartoj një plan veprimi në parandalimin e këtij fenomeni. “Synohet të bashkohen ekspertë vendorë e ndërkombëtarë, që eksperiencat e tyre ti konvertojnë në një program që do të përfshjë veprimtari konkrete, që do të përcaktoj mekanizma për të ngushtuar hapësirat e këtij fenomeni”, tha Manaj, sipas të cilit me këtë dokument qeveria synon të arrijë standardet ndërkombëtare drejt mbrojtjes dhe respektimit të të drejtave të qytetarëve

Qeveria me strategji kundër vetëvrasjeve


Njëzetvjeçarja Lamtumira Zogaj nga Mamusha e Prizrenit, në odë, ka varur veten në litar. Motivet nuk dihen. Emri i saj i shtohet listës së 37 vetëvrasjeve të gjashtëmujorit të parë të këtij viti. Ajo është varrosur në ditën kur qeveria e vendit ka biseduar për hartimin e një strategjie kundër vetëvrasjeve

Nga Jeton Musliu

Askush nuk e di ndonjë arsye pse 20-vjecarja Lamtumira Zogaj i ka dhënë fund jetës në mënyrë tragjike, pa i thënë lamtumirë askujt.

Kjo vajzë shqiptare nga fshati Mamushë të Prizrenit, të mërkurën, shumë herët në mëngjes, në një tra të odës, ka lidhur litarin në të dhe ka varur veten.

Familjarët e saj i kanë shpjeguar hetuesve të policisë në Prizren se të ndjerën e kishin gjetur të varur rreth orës 5 e 20 minuta të mëngjesit.

Prindërit e saj, deri më tash, duket se kot janë marrë në pyetje nga hetuesit për të gjetur ndonjë motiv që mund të ketë shtyrë vajzën t’i japë fund jetës në këtë mënyrë.

“Nuk kemi vërejtur ndonjë shqetësim te vajza. Gjithçka ka qenë qetë. Ajo ka qenë shumë e hareshme”, citon një zyrtar i policisë fjalët e 60 vjecarit, babait të së ndjerës, në deklaratën e dhënë.

Tash për tash asnjë rezultat nuk ka dalë në dritë, edhe pse zyrtarët e rendit shpjegojnë se familja e të ndjerës nuk qëndron shumë mirë ekonomikisht.

Kjo familje, me të ndjerën, numëron pesë vajza dhe dy djem më të rinj, njëri prej të cilëve është me të meta fizike.

“Policia nuk ka mundur ende të gjejë ndonjë motiv pasi rasti ka ndodhur vetëm dy ditë më parë dhe rezultatet e autopsisë ende nuk kanë përfunduar”, thotë toger Hazir Berisha, zëdhënës i policisë së rajonit të Prizrenit.

Kështu Lamtumira është varrosur të enjten, duke vendosur emrin e saj në një listë të gjatë të vetëvrasjeve që kanë ndodhur viteve të fundit.

Rasti i vetëvarjes së Lamtumirës do të përfshihet në statistikat për gjashtëmujorin e dytë të këtij viti.

Ndërkohë, numri i lartë i atyre që i kanë marrë jetën vetes në gjashtë muajt e parë të vitit 2009, sipas të dhënave të policisë, është gjithashtu i lartë.

Vetëm nga janari deri në qershor, kanë ndodhur 37 vetëvrasje, apo pesë raste më shumë sesa e njëjta periudhë e vitit të kaluar.

Në këtë rast, janë meshkujt ata që i prijnë kësaj dukurie me 22 vetëvrasje krahasuar me 15 të tilla që i përkasin gjinisë femërore.

Rajoni më i prekur nga kjo dukuri është ai i Pejës, i cili pasohet nga Prizreni e Ferizaj, për të vazhduar me Prishtinë e Gjilan.

Duke u bazuar në të dhënat e policisë për nëntë vitet e fundit, atëherë vetëvrasjet nuk janë diçka e re në Kosovë.

Megjithëkëtë, vetëm një ditë më herët qeveria e vendit ka vendosur për hartimin strategjisë për të luftuar këtë fenomen.

Në mbledhjen e fundit, ekzekutivi i vendit ka miratuar nismën në përpilimin e planit të veprimit në parandalimin e vetëvrasjeve.

Në fakt, se si do të duket ky plan apo mënyra e funksionalizimit të tij, ende mbetet e paqartë pasi është vendosur që fillimisht për këtë çështje të mblidhen ekspertë vendorë dhe ndërkombëtarë.

“Qeveria me këtë dokument synon të arrijë standardet ndërkombëtare të mbrojtjes së të drejtave të njeriut dhe qytetarëve, në mënyrë të veçantë të të rinjve”, është shprehur zëvendëskryeministri i Kosovës, Ramë Manaj.

Në lidhje me këtë çështje, ministri i Administratës Publike, Arsim Bajrami, thotë se nuk mjaftojnë vetëm kornizat ligjore.

Sipas tij, për të gjetur shkaqet e vetëvrasjeve duhet të angazhohen sociologë, psikologë si dhe ekspertë të tjerë.

“Duhet të ketë strategji shumë dimensionale pasi vetëvrasjet nuk ndalen vetëm me strategji legale”, shprehet ministri Bajrami.

Në lidhje me këtë çështje, ministri i Shëndetësisë , Alush Gashi, në mbledhjen e qeverisë ka kërkuar që bartës i mbledhjes së të dhënave në lidhje me vetëvrasjet të jetë Instituti Kombëtar i Shëndetit Publik.

Sa i përket rastit të Lamtumira Zogajt, policia është ende duke bërë hetimet, edhe pse sikurse në rastet e tjera, vështirë se mund të mësohen ndonjëherë arsyet që e kanë shtyrë 20 vjecaren t’i japë vetes dënimin kapital-vetëvarjen.

Tentimvetëvrasjet
(Janar-Qershor-2009)
145-raste
37-meshkuj
108-femra
46 ne Prizren, 38 Prishtinë...

Thaçi: Për Kosovën vendosin vetëm institucionet e saj

Lirije Hajdari





Prishtinë, 19 gusht
Për Kosovën vendosin vetëm institucionet e Republikës, dhe se vendimet e tyre kanë qenë dhe do të jenë edhe në të ardhmen autonome, deklaroi kryeministri Hashim Thaçi, të mërkurën në Prishtinë.
Këto komente kryeministri Thaçi i bëri lidhur me pretendimet e EULEX-it për të nënshkruar marrëveshje bashkëpunimi policor me Serbinë. “Vendimet e institucioneve të Kosovës kanë qenë dhe do të jenë edhe sot edhe në të ardhmen autonome dhe për Kosovën vendosin institucionet e Republikës së Kosovës. Ne do të respektojmë Kushtetutën, do të respektojmë edhe dokumentin Ahtisari të cilën jemi duke e implementuar, do të vazhdojmë të ndërtojmë raporte të mira me të gjitha vendet fqinje, por natyrisht duam të kemi raporte të mira të fqinjësisë ndërshtetërore edhe me Serbinë dhe këtë autoritet e kanë institucionet e Kosovës”, tha kryeministri Thaçi, pas një takimi me kryeministrin e Çekisë Jan Fisher. Por, Thaçi nuk u përgjigj prerazi se cili është qëndrimi i qeverisë, se nëse janë të gatshëm ta firmosin protokollin në emër të Kosovës, ndërsa theksoi se çdo vendim që marrin institucionet e Kosovës do të kenë edhe autoritetin nënshkrues vendor. I pyetur nëse institucionet e Kosovës kanë qenë në dijeni për marrëveshjet e këtij dokumenti, Thaçi tha se i gjithë procesi nëpër të cilin janë duke kaluar si institucionet e vendit, për dokumentet që dalin nga institucionet e Kosovës, këto të fundit janë ato që marrin përgjegjësinë, ndërsa dokumentet në të cilat është menduar të punohet diku tjetër jashtë institucioneve të Kosovës, e kanë refuzimin e plotë të institucioneve tona. “Në këtë drejtim do të veprojmë në mënyrë unike, si shtet i Kosovës, si institucione, si parti dhe si popull, por duhet të kuptojmë se edhe EULEX-i, edhe ICO-ja është në mbështetje të institucioneve, të respektimit të rendit dhe ligjit”, u shpreh ai.