Protestë kundër privatizimit të PTK-së

nga **Agim Gashi** Fri Mar 25, 2011 8:31 pm

Protestë kundër privatizimit të PTK-së

Derisa në Kuvendin e Kosovës po diskutohej për buxhetin e vitit 2011, ku përfshihet edhe privatizimi i PTK-së, Sindikata e Pavarur e Postës dhe Telekomit të Kosovës, ka protestuar para ndërtesës së Kuvendit të Kosovës, duke kërkuar nga deputetët që të votojnë kundër privatizimit të PTK-së.

Me parulla në dorë, në të cilat shkruante “Deputet thoni jo Qeverisë për Privatizimin e PTK-së”, “Duam Referendum, duam ligj të veçanet për PTK-në”, protestuesit, të cilëve iu ishin bashkëngjitur edhe deputetë të Lëvizjes Vetëvendosje kërkuan që të mos privatizohet PTK-ja.

Kryetari i Sindikatës, Milazim Alshiqi, ka thënë se privatizimi i PTK-së do të rrisë problemet ekonomike dhe sociale në Kosovë, si dhe do të rrisë shkallën e varfërisë. Ai u bëri thirrje deputetëve që të kundërshtojnë privatizimin e PTK-së.

Sipas tij, PTK-ja vetëm në vitin 2009 ka ndihmuar buxhetin e Kosovës me 335 milionë euro, andaj sipas tij privatizimi i kësaj ndërmarrjeje do të rrisë papunësinë në vend.

“Të nderuar deputetë jeni dëshmitarë se këto figura janë negative, në qoftë se propozimi i juaj është meritor, ndikon në zhvillimin e Kosovës. Ne sindikalistët e PTK-së, ne qytetarët e Republikës së Kosovës do t’ju mbështetnim. Mirëpo, derisa këto figura janë të prekura, ne punëtorët dhe sindikalistët e PTK-së, mendoj që edhe pjesa dërrmuese e popullit të Kosovës do të thotë jo privatizimit të PTK-së”, ka thënë Alishiqi.

Për të përkrahur Sindikatën e Pavarur të PTK-së kishte dalë edhe deputeti i Vetëvendosjes, Visar Ymeri, i cili para masës ka thënë se PTK-ja është pasuri e Kosovës e jo barrë e vendit siç po quhet nga qeveritarët.

“Në vend se kjo Qeveri e Kosovës të zhvillojë projekte që e rrisin punësimin në vend, kjo po zhvillon projekte të privatizimit të cilat e rrisin papunësinë në vend. Pra, po synon që të shesë Postën që edhe ju të mbeteni pa punë siç po mbesin pa punë tash punëtorët e Aeroportit, siç rrezikojnë të mbesin pa punë punëtorët e KEK-ut, dhe ne këtë privatizim do të kundërshtojmë”, ka thënë Ymeri.

Ai ka shtuar se deputetët e Lëvizjes “Vetëvendosje” do të votojnë kundër privatizimit të PTK-së.

“Unë nuk e di se si do të veprojnë deputetët e partive tjera edhe sot karshi buxhetit, por edhe nesër kur do të diskutohet privatizimi i postës. Por një gjë e di shumë të sigurt, Lëvizja Vetëvendosje nuk do të pranojë kurrë privatizimin e Postës dhe ne do të luftojmë këtë privatizim edhe brenda këtyre ndërtesave” ka thënë Ymeri.

Për të përkrahur kundërshtimin e privatizimit të PTK-së, dhe për t’u solidarizuar me protestuesit e PTK, nga Shqipëria kishin ardhur edhe përfaqësues nga Sindikata e Postë-Telekomit të Shqipërisë.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31