Protestë kundër Enciklopedisë në Tetovë

Protestë kundër Enciklopedisë në Tetovë

Në Tetovë organizohet marsh kundër enciklopedisë



Protesta kundër enciklopedisë maqedonase

Me parullat ‘Poshtë Enciklopedia’, ‘Poshtë Qeveria’, ‘Duam të Drejtat Tona’ dhe të tjera, sot qindra nxënës të shkollave të mesme të Tetovës mbajtën me orë të tëra të bllokuara, rrugët kryesore të Tetovës.
Protesta filloi nga sheshi i qytetit dhe përshkoi disa arterie kryesore, ndërsa në qendër, u bllokua për afër 30 minuta edhe udhëkryqi kryesor. Kërkesa e nxënësve ishte shumë e qartë, ‘të tërhiqet enciklopedia e cila fyen popullin shqiptar’.
“Thjesht, kërkojmë që të bëhet prishja e enciklopedisë që të mos ekzistojë ajo enciklopedi e cila nuk ka baza e cila na ka ofenduar neve si nacionalitet duke na quajtur shiptari, malësorë”, theksoi një protestues.
“Me këtë protestë duam të tregojmë se nuk mundë të tallen në këtë shtet me kombin i cili përbën 30 % të popullatës dhe kërkojmë që partitë politike tona sa më shpejtë ta lëshojnë qeverinë dhe asnjëra të mos hy në atë qeveri të fëlliqur”, shtoi një protestues tjetër.
Organizatorët e protestës së nxënësve, thanë se këto manifestime do të vazhdojnë deri në tërheqjen e enciklopedisë. Për nesër në mesditë ndërkohë, protesta kanë paralajmëruar edhe unionet studentore të dy universiteteve USHT dhe EUJL në Tetovë, me moton ‘Jo falsifikimit të Historisë Shqiptare’.
Studentët
Studentët e Universitetit të Tetovës dhe Evropës Juglindore protestojnë të mërkurën në Tetovë ndaj “Enciklopedisë Maqedonase”.Përfaqësues të protestuesve thonë se ata duan të shprehin kundërshtimin për 'të pavërtetat' që thuhen për shqiptarët në këtë botim. Protestat e tyre pasojnë takimin e së martës të partnerëve të koalicionit qeverisës: Ali Ahmetit, udhëheqësit të Bashkimit Demokratik për Integrim (BDI) dhe Nikolla Gruevskit.Ky ishte takimi i tyre i parë që nga botimi i Enciklopedisë kontraversiale.Ndërkohë është paralajmëruar se protestat e shqiptarëve do të vazhdojnë të enjten në Shkup.Inisiatore të kësaj proteste janë partitë shqiptare që nuk përfaqësohen në parlamentin e Maqedonisë.
'Keqardhje'
Kryeministri Gruevski kishte refuzuar të komentonte "Enciklopedinë Maqedonase" të botuar që para dy javëve.
Pas takimit të parë me partnerin e tij shqiptar në qeveri, njoftohet se ata i kanë kërkuar Akademisë së Shkencave që të gjejë zgjidhje për çështjet që botimi ka lënë të hapura.
Botimi i "Enciklopedisë" dy javë më parë më parë ngjalli indinjatë në mesin e shqiptarëve jo vetëm në Maqedoni, por dhe në Kosovë e Shqipëri.
Reagime për përmbajtjen e tekstit ka patur dhe nga vendet fqinjë, Bullgari e Greqi, por dhe nga ambasadat e Britanisë së madhe dhe asaj të SHBA-së në Shkup.
Subjektet shqiptare kishin kërkuar që kryeministri të distancohej nga botimi, por në komunikatën e lëshuar pas takimit me kreun e BDI-së flitet vetëm për 'keqardhje' nga fyerjet që ka shkaktuar ai.
Kërkohen dorëheqje
Vëzhguesit thonë se edhe pse kanë shfaqur kuptim në opinion për zemërimin e shkaktuar tek komuniteti shqiptar nga disa pjesë të Enciklopedisë, zyrtarë të lartë të partisë së z. Gruevski nuk duan të lënë përshtypjen se kanë ndikim tek Akademia e Shkencave.
Nga kjo parti thonë se shkencëtarët janë ata që duhet të zgjidhin çështjen.
Ndërkohë ata vetë, ende nuk kanë bërë të ditur se cilat do të jenë hapat që do të ndërmarrin.
Po shtohen zërat nga përfaqësues shqiptarë e maqedonas, që kërkojnë dorëheqjen e kryetarit të Akademisë së Shkencave dhe të redaktorit të Enciklopedisë.