OKB-ja përdhosi fitoren e NATO-s

OKB-ja përdhosi fitoren e NATO-s

Kosova falënderon përjetësisht NATO-n




“E kemi fituar me sakrificën tonë gjithë popullore, me mbështetjen e plotë të botës perëndimore, Uashingtonin, BE-në dhe NATO-n”, tha Thaçi.

Shqiptarët nuk mund t’i jenë kurrë mosmirënjohës SHBA-ve dhe NATO-s që mori vendim për ndërhyrjen në Kosovë, por kurrë nuk mund t’ia falin OKB-së, që e përbuzi fitoren madhështore të Aleancës mbi regjimin gjenocidal të Beogradit. Kosova ka përjetuar për herë të parë lirinë pas shekujsh kur NATO-ja i dha fund okupimit të Kosovës nga Serbia. Por, Kosova vazhdon të vuajë përbuzjen që OKB-ja i bëri ndërhyrjes së NATO-s, dhe fitores së saj ndaj Serbisë. OKB vazhdon ta konvertojë “paqën” si “liri”.
Aleanca më e fuqishme ushtarake në historinë e njerëzimit, NATO-ja, e nisur nga ideja humane për shpëtimin e popullit të Kosovës, filloi sulmet ajrore kundër makinerisë vrastare serbe, sulme këto që zgjatën 78 ditë me radhë.
Kryeministri Hashim Thaçi tha se periudha nga data e fillimit të bombardimeve të NATO-së deri këtu ku jemi është një periudhë e historisë së re të Kosovës dhe e suksesit të plotë. “Data e 24 marsit është e një rëndësie të veçantë për vendin tonë, Kosovën e pavarur, sovrane dhe demokratike, për lirinë që e kemi fituar me sakrificën tonë gjithë popullore, me mbështetjen e plotë të botës perëndimore, Uashingtonin, BE-në dhe NATO-n”, tha Thaçi. Xhavit Beqiri zëdhënës i presidentit Fatmir Sejdiu, 24 marsin e quan ditë të shpresës “Padyshim se është një datë tepër e rëndësishme e historisë moderne të vendit tonë. Fushata e NATO-s kundër caqeve ushtarake, policore e paramilitare serbe që kryenin krime të rëndë në Kosovë është ndërmarrja më e madhe humanitare që ka njohur ndonjëherë njerëzimi, me qëllim të shpëtimit të në populli të pambrojtur nga shfarosja kolektive”, tha zëdhënësi Beqiri. Ai falënderon SHBA-të, BE-në dhe vendeve të tjera të botës demokratike të cilat ndihmuan Kosovën dhe popullin e saj në orët më të liga të historisë sonë.
Kryeparlamentari Jakup Krasniqi, tha se gjatë gjithë viteve pas qershorit 1999 institucionet dhe qytetarët e Kosovës kanë arritur suksese të lakmueshme që duhet t’i vlerësojmë. Krasniqi e sheh të domosdoshëm praninë e NATO-s në Kosovë deri në konsolidimin e plotë të institucioneve të sigurisë.
Për ekspertin ushtarak Ramadan Qehaja, data e 24 marsit është një përvjetor shumë i rëndësishëm para së gjithash nga aspekti ushtarak. “NATO-ja, edhe pse me vonesë, arriti të ndërpresë një spastrim etnik të popullatës shqiptare nga trojet e veta, që ishte pozitive jo vetëm për shqiptarët në Kosovë, por edhe më gjerë”, tha z. Qehaja.
Kryetari i AAK-së, Ramush Haradinaj, ka kujtuar ditët e tmerrshme të viteve të ‘99-ta, dëbimet e shqiptarëve nga shtëpitë e veta, përballjen me frikën e vdekjes. “Sulmet e NATO-s mbi forcat serbe i dhanë drejtim një lufte të pabarabartë, të drejtë nga ana e popullit të Kosovës për liri dhe u sigurua edhe përmbyllja e kësaj lufte që rezultoi me kthimin e njerëzve të shpërngulur në vend, me fillimin e jetës në një ambient të sigurt me ardhjen e forcave të NATO-s dhe me ndërtimin e proceseve të cilat kanë rezultuar deri në ditën e sotme me Kosovën shtet”, tha z. Haradinaj.
Për Adem Salihajn, nënkryetar i LDD-së, intervenimi i NATO-s ka vulosur fatin e Kosovës. “Ishte një intervenim i drejtë, energjik dhe roli i NATO-së duke filluar nga 24 marsi ka qenë i pazëvendësueshëm dhe askush tjetër nuk do të kishte munduar ta arrijë këtë që është arritur”, tha ai.
Ismet Mulaj, anëtarë i kryesisë së AKR-së, thotë se NATO-ja e shpëtoi një popull nga shfarosja e planifikuar nga regjimi i Beogradit. “Tash dhjetë vjet nga ajo ditë, shqiptarët e vlerësojnë pozitivisht ndërhyrjen e NATO-së si dhe falënderojnë gjithë atë ushtarë që rrezikuan jetën e tyre që ne sot të jetojmë si vend i lirë”, tha Mulaj.