Arbana Xharra: Evropa injoron Thaçin

nga **Agim Gashi** Fri Apr 29, 2011 1:01 am

Evropa injoron Thaçin

Nga Arbana Xharra

Prej se është zgjedhur kryeministër në mandatin e fundit, nuk mbaj mend të ketë pasur vizitë apo të jetë ftuar diku në Evropë në ndonjë takim zyrtar. Është më se e qartë se Hashim Thaçi nuk e gëzon simpatinë e evropianëve sikur disa vjet më parë, dhe nuk duhet analizë e thellë për të kuptuar pozicionin që ka tash ai, karshi opinionit ndërkombëtar.

Nuk i dolën skandalet e njëpasnjëshme gjatë tërë vitit që lamë pas, të cilat u kurorëzuan me vjedhjen e votave, por i prishi marrëdhëniet edhe me dy organizatat më të rëndësishme financiare botërore, Fondin Monetar Ndërkombëtar(FMN) dhe Bankën Botërore (BB), pasoja të cilat do t’i shohim vetëm më vonë. Përkundër ideve proevropiane që promovon Thaçi, ai është duke u injoruar nga vendet më të fuqishme evropiane.

Edhe pse zyrtarisht luan me letra të Evropës, Kosova nuk është duke lëvizur asnjë hap drejt saj. Nëse qëndrueshmëria e një shteti dhe rruga drejt integrimit e ka shtyllën bazë zhvillimin ekonomik, të cilin Kosova mund ta ketë nga investimet perëndimore, tash për tash jemi në “kolaps” të rëndë. Prej se Hashim Thaçi është në pushtet, asnjë investitor serioz evropian nuk ka ardhur për të investuar në Kosovë.

Edhe ata pak investitorë potencialë për të investuar ikën prej nga kanë ardhur. Disa prej tyre, si RWE-ja gjermane dhe CEZ, grup kompani këto me renome botërore, ikën të dëshpëruara vitin e kaluar, duke pritur të nisë projekti për ndërtimin e termocentraleve të reja “Kosova e Re”, i cili as që ka nisur.

Kryeministri mund të arsyetohet se shkaktar i mosardhjes së investitorëve evropianë ka qenë kriza financiare, por kjo nuk qëndron, sepse Kosovës ia kanë mësyrë investitorët turq.

1. Konzorciumi turko-amerikan “Bechtel & Enka” e fitoi tenderin me vlerë prej 924.8 milionë dollarë (700 milionë euro) për ndërtimin e autostradës Morinë-Mrdar.

2. Konsorciumi turko-francez “Limak& Lion” mori me koncesion për 20 vjetët e ardhshëm aeroportin ndërkombëtar të Prishtinës “Adem Jashari”.

3. Kompania “Limak” ka shprehur interesim për privatizimin e distribucionit të KEK-ut.

4. Disa kompani nga Turqia kanë tërhequr dokumentacionin e parakualifikimit për tenderin e privatizimit të Postës dhe Telekomit të Kosovës (PTK) e ato janë: “Turkcell”, “Turkish Chamber of Comerce”, “Calik Telecom”.

Në mesin e shumë kompanive të huaja, kompanitë nga Turqia dominojnë për shprehje të interesit në tenderin për blerjen e PTK-së. Pos investimeve, edhe bashkëpunimi politik ka qenë dukshëm i orientuar nga Turqia. Në mars të këtij viti, kryeministri u nis për një vizitë zyrtare në Turqi, me ftesë të homologut turk Recep Tayyip Erdogan, me ç’rast mori pjesë në Samitin Botëror të Liderëve të Ndryshimeve.

Kryesuesi i Unionit Turk të Shkëmbimit të Odave dhe Mallrave (TOBB), Rifat Hisarciklioglu, organizoi konferencë për marrëdhëniet tregtare me Kosovën.

Është premtuar se volumi tregtar mes dy vendeve, që momentalisht është 300 milionë dollarë, do të rritej në 1 miliard brenda një viti.

Përveç kryeministrit, edhe lidershipi kosovar ka “zgjedhur” Turqinë për t’i zhvilluar vizitat pothuajse të vetme zyrtare në rajon.

Komandanti i FSK-së, gjenerallejtënant Sylejman Selimi, sivjet i shoqëruar nga një delegacion i lartë i FSK-së realizoi një vizitë zyrtare katërditore në Turqi, ku zhvilloi disa takime me përfaqësues të ushtrisë turke. Ministri i Punëve të Jashtme, Enver Hoxhaj, ditë më parë priti në një takim 46 diplomatë të rinj të Republikës së Turqisë.

Duke i parë këto trende ekonomike, nga të cilat është duke ecur Kosova në dhjetë vjetët e fundit, ka shumë mundësi që të krijojmë varshmëri ekonomike të orientuar nga Azia e jo nga Evropa, nga e cila janë orientuar të gjitha shtetet fqinje.

Mon	Tue	Wed	Thu	Fri	Sat	Sun
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31