Kolegji Zgjedhor nesër publikon vendimin për Tiranën

nga **Agim Gashi** Thu Jul 07, 2011 8:38 pm

Kolegji Zgjedhor nesër publikon vendimin për Tiranën

(I plotësuar)-Kolegji Zgjedhor ka përfunduar sot shqyrtimin administrativ për kërkesën e Partisë Socialiste (PS) ndaj Komisionit Qendror të Zgjedhjeve (KQZ), kjo në fakt, ka pësuar një ndryshim, duke mos kërkuar më kthim pas në Komisionin Qendror të Zgjedhjeve (KQZ), por duke i lënë të drejtën Kolegjit që të vendosë rreth saj.

Nga ana e saj, Partia Socialiste (PS) ka paraqitur edhe ato që i ka quajtur "prova" mbi pavlefshmërinë.

Ndërsa Kolegji vendosi që t'i merrte në shqyrtim ato dhe seanca do të zhvendoset ditën e nesërme, duke pritur që në orën 10:00 të paradites, të publikohet vendimi për Tiranën.

Relatore e çështjes ishte gjyqtarja Sashenka Jonuzi, ndërsa anëtarë të trupit gjykues Dhurata Haveri, Astrit Kalaja, Meriban Mullaj dhe Maria Qirjazi.

* * * * * * *

Debate të forta në Kolegjin Zgjedhor, sulme nga PS-ja

Seanca e sotme e Kolegjit Zgjedhor po zhvillohet me debate të forta për shkak se përfaqësuesit e Partisë Socialiste (PS) po devijojnë nga objekti kryesor i padisë.

Pas tërheqjes nga pavlefshmëria e zgjedhjeve, sot Kolegji do të marrë në shqyrtim vetëm padinë që kërkon anulimin e vendimit të Komisionit Qendror të Zgjedhjeve të datës 28 qershor.

Deputeti Damian Gjiknuri fillimisht ka kërkuar anulimin e vendimit të KQZ-së, duke e quajtur arbitrar dhe të paligjshëm. Gjiknuri mbrojti idenë se kërkesa ishte brenda afateve që parashikon Kodi Zgjedhor, por KQZ e ka hedhur poshtë atë në mënyrë të padrejtë.

Kjo çështje ishte objekti i padisë së socialistëve, por përfaqësuesit ligjorë gjithashtu kanë artikuluar në fjalën e tyre edhe kërkesën për pavlefshmëri të zgjedhjeve, për të cilin socialistët u tërhoqën një ditë më parë.

Pikërisht kur relatorja e çështjes, Sashenka Jonuzi, ka dashur të sqarojë këto dy momente, atëherë njëri nga avokatët e Partisë Socialiste ka akuzuar Kolegjin, se po provokonte opozitën. Relatorja e çështjes, Sashenka Jonuzi, ka kërkuar që avokatët e PS-së t’i përmbahen objektit të padisë që po shqyrtohet sot.

Avokatët e Partisë Demokratike gjithashtu kanë kërkuar të dinë, nëse socialistët sot kërkojnë anulimin e vendimit të KQZ-së apo pavlefshmërinë e zgjedhjeve?

Përgjigja nga ana e socialistëve ka qenë se: Këtë duhet ta vendosë Kolegji.

Në anën tjetër, përfaqësuesit ligjorë të KQZ-së kanë shpjeguar procedurat që kanë ndjekur ata për të marrë vendimin në datën 28 qershor, duke konstatuar se vendimi i këtij institucioni ishte i drejtë.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30