Dorëzohet Qeveria, pranon marrëveshjen e KFOR-it me delegacionin serb

Kjo marrëveshje ishte thënë se parashikon që në pikat kufitare 1 dhe 31 sistemi i tanishëm i kontrollit do të vazhdojë i pandryshuar deri në mes të shtatorit, veturat, kamionët me peshë deri në 3.5 tonë dhe kamionët që transportojnë ndihma humanitare, përfshirë edhe ushqimin, mund të kalojnë pas kontrollit të identitetit dhe kontrollit për armë, si dhe të largohen bllokadat rrugore dhe të bëhet rivendosja e lirisë së qarkullimit.

Sipas marrëveshjes së arritur në kampin e KFOR-it “Nothin Hill” në Leposaviq, KFOR-i mban komandën dhe kontrollin në kalimet kufitare 1 dhe 31 dhe që afati kohor i sistemit të tanishëm të kontrollit nga ana e KFOR-it në këto dy pika nëse do të jetë e nevojshme mund të vazhdojë edhe pas mesit të shtatorit.

Në një komunikatë për media që kishte lëshuar KFOR-i, thuhej se komandanti i KFOR-it ka pasur autoritetin e plotë e të gjitha institucioneve të përfshira, por që nuk saktësohej nëse e kishte autoritetin e Qeverisë së Kosovës.

I menjëhershëm ka qenë reagimi i Qeverisë së Kosovës, e cila nuk e ka pranuar këtë marrëveshje, përderisa të nesërmen e ka sqaruar se nuk bëhet fjalë për marrëveshje, por për pika të diskutimit.

Ndërkohë, Qeveria e Kosovës ka caktuar pikat e saj për arritjen e marrëveshjes për veriun, e që përfshijnë dhjetë pika: 1. Hapjen e bllokadave të rrugëve, 2. Mirëmbajtjen e gjendjes së tashme në porta, 3. KFOR-i është përgjegjës për portat, 4. Portat janë të mbyllura për arsye të sigurisë dhe janë zona të kufizuara ushtarake, 5. Ndihmat humanitare do të lejohet që të hyjnë në Kosovë në makina deri në 3.5 tonë, në pika të caktuara kufitare pas një vlerësimi nga një organ i caktuar i pavarur ndërkombëtar që ekziston nevoja për ndihma humanitare, 6. Mallrat për kishën ortodokse serbe lejohet të kalojnë, 7. Çdo person dhe makinë do të kontrollohet për armatim, 8. Çdo person do të kontrollohet për ID, 9. Treni Beograd-Mitrovicë: kontrollohet nga EULEX dhe Policia e Kosovës, si dhe ndihmohet nga KFOR-i dhe 10. KFOR-i do të kryej operacionet e kontrollit në vendkalimet e paautorizuara kufitare për të ruajtur një mjedis të qetë dhe të sigurt.

Pas disa takimesh brenda ditës së djeshme dhe sot ndërmjet kryeministrit të Kosovës, Hashim Thaçi dhe gjeneralit të KFOR-it, Erhard Buhler, më në fund është arritur marrëveshja, por për dallim prej takimeve të tjera, në këtë takim ku u arrit marrëveshja ishin të pranishëm edhe përfaqësuesi i BE-së, Fernando Gjentilini dhe ambasadori i SHBA-ve në Kosovë, Kristofer Dell.

Zyrtarët qeveritarë kanë thënë se pikat e diskutuar në këtë takim dhe të pranuara nga palët ndërkombëtare janë në përputhje të plotë me vendimet e Qeverisë së Kosovës të marra nga 20 korriku, e që përfshijnë masën e reciprocitetit me Serbinë dhe vendosjen e ligjshmërisë dhe kushtetutshmërisë në veri të vendit.

Marrëveshja pa nënshkrime përcakton që të bëhet zhbllokimi i të gjitha rrugëve që çojnë për tek pika 1 dhe 31, që KFOR-i të jetë përgjegjës për aspektet e sigurisë në këto pika, që në parim këto pika të mbesin të mbyllura për shkaqe sigurie dhe të cilësohen si zona të kufizuara ushtarake, që ndihmat humanitare të lejohen të futen në pikat 1 dhe 31, pasi që të konstatohet nga një organizatë ndërkombëtare e pavarur se atje vërtetë ekziston nevoja për ndihma humanitare, që të ketë masa rigoroze të kontrollit të kufirit dhe ndaljes së kontrabandës dhe qarkullimit me armë, ku çdo person dhe automjet që kalon në pikat 1 dhe 31 do të kontrollohet për armë dhe për kontroll të dokumenteve të identifikimit.

Po ashtu, me marrëveshjen e arritur parashihet që për herë të parë treni që qarkullon në relacionin Beograd-Mitrovicë dhe anasjelltas do të kontrollohet nga Policia e Kosovës, e ndihmuar nga EULEX-i dhe KFOR-i, përderisa KFOR-i do të ketë operacione kontrolli edhe nëpër rrugët dytësore me qëllim të krijimit të një ambienti të sigurt, ndërsa dedikimet për Kishën ortodokse serbe do të lejohen të kalojnë.