Autostrada Ibrahim Rugova

Autostrada Ibrahim Rugova


Nga Express më 03.04.2009 në ora 17:35

Lidhja Demokratike e Kosovës (LDK), kërkoi të premten që autostrada që do ta lidhë Kosovën dhe Shqipërinë, ta merr emrin e ish presidentit të Kosovës, Ibrahim Rugova, i cili ishte ideator i këtij projekti.

Nënkryetari i LDK-së, Ramë Manaj, njëherit zëvendëskryeministër në qeverinë e koalicionit me PDK-në, tha se kjo është një dëshirë e Lidhjes Demokratike të Kosovës dhe u shpreh se kjo rrugë nacionale meriton ta ketë emrin e presidentit Rugova.

“Magjistralja Kosovë-Shqipëri, e meriton emrin Ibrahim Rugova, pasi presidenti i ndjerë, ka qenë ideator i kësaj lidhjeje dhe i shumë lidhjeve tjera kombëtare”, tha Manaj.

Ai tha se ideja që autostrada Prishtinë–Durrës, të emërohet Ibrahim Rugova është e drejtë dhe nuk duhet t’i pengoj askujt, sepse lidhet me vizionarin Rugova, që sipas tij, shumë shpesh thoshte se “...nëpër vendin tim kalojnë rrugë të rëndësishme evropiane, siç ishte rruga antike via-egnatia”. (KosovaLive)