Vazhdojnë bisedimet Kosovë-Serbi

nga **Agim Gashi** Tue Jan 03, 2012 9:16 pm

Vazhdojnë bisedimet Kosovë-Serbi

Zëvendëskryeministrja e Kosovës, Edita Tahiri.

Kosova dhe Serbia do të vazhdojnë bisedimet gjatë janarit, për tri çështje: energjetikën, telekomunikacionin dhe përfaqësimin e Kosovës në nisma rajonale. Data e saktë e takimit të radhës akoma nuk dihet, por të dyja palët, Prishtina edhe Beogradi, konfirmojnë se dialogu do të vazhdojë.

Udhëheqësja e delegacionit të Kosovës, zëvendëskryeministrja Edita Tahiri, citohet të ketë thënë se gjatë takimeve të janarit do të diskutohen edhe çështje tjera.

“Besoj se nga mesi i muajit do ta kemi takimin e radhës dhe do të diskutohen çështjet që tashmë janë në agjendë: bashkëpunimi rajonal, energjia dhe telekomunikacioni. Po ashtu mendoj se gjatë muajit shkurt mund të kemi edhe një raund tjetër bisedimesh për çështjet si transporti rrugor dhe hekurudhor, transporti ajror, kompensimi i dëmeve të luftës, demarkacioni i kufirit, çështja e të pagjeturve dhe çështje të tjera që kërkojnë zgjidhje”, ka thënë Tahiri.

Nga ana tjetër udhëheqësi i ekipit të Beogradit, Borislav Stefanovic, ka thënë se pala serbe ka kërkuar që në çështjen e përfaqësimit rajonal të Kosovës të merret parasysh Rezoluta 1244 e KS-it. Por Tahiri ka thënë se nuk është hera e parë që Serbia vë kushte në kuadër të dialogut. Sipas saj, Serbia tashmë ka marrë obligime në raport me Bashkimin Evropian dhe ato duhet zbatuar, nëse vërtetë dëshiron që ta merr statusin e vendit kandidat për anëtarësim në bashkimin evropian.

“Qëndrimet penguese në kuadër të dialogut nga pala serbe nuk janë risi për palën kosovare. Pikërisht këto qëndrime të Serbisë bën që ajo në dhjetor të mos e merr statusin e vendit kandidat për anëtarësim në BE. Mendoj se Serbia tash nuk mund të vë kushte. Kosova është shtet i pavarur, ka kushtetutën e saj dhe Kosova nënshkruan dhe zbaton marrëveshje të cilat janë në harmoni të plotë më kushtetutën dhe ligjet e saj”, ka deklaruar ndër të tjera zëvendëskryeministrja Tahiri.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30